ترەمپ پێشنیاری مامەڵەیەکی بازرگانی 100 ملیار دۆلاری دەخاتە بەردەم ئەردۆگان

- 11/13/2019 7:21:00 PM 8347 جار خوێندراوەتەوە

خەندان-

سەرچاوەیەکی ئاگادار لەکۆبونەوەکانی نێوان دۆناڵد ترەمپی سەرۆکی ئەمریکا و رەجەب تەیب ئەردۆگانی سەرۆکی تورکیا رایگەیاند، ترەمپ پێشنیاری مامەڵەیەکی 100 ملیار دۆلاری لەبەرامبەر رێککەتنیان لەبارەی کڕینی سیستمی بەرگری موشەکی ( s-400) لەروسیا خستۆتە بەردەم رەجەب تەیب ئەردۆگانی سەرۆکی تورکیا.
 
لەوبارەیەوە سەرچاوەیەک بە رۆژنامەی واشنتن پۆستی راگەیاندوە، بەمەبەستی پتەوکردنی پەیوندییەکانی نێوان واشنتن و ئەنقەرە، و تاوتوێکردنی چەند پرسێکی پەیوەندیدار بەهەردولا، هەفتەی رابردو دۆناڵد ترەمپی سەرۆکی ئەمریکا نامەیەکی  بانگێشتنامەی ئاراستەی رەجەب تەیب ئەردۆگانی سەرۆکی تورکیا کردوە و لە ئێستاشدا ئەردۆگان لەئەمریکایە.
ئامانج لەبانگێشتکردنی سەرۆکی تورکیا بۆ پێشکەشکردنی پێشنیاری ئەو مامەڵە بازرگانییە بوە

سەرچاوەکە جۆری مامەڵەکەی دەستنیشان نەکردوە، بەڵام جەختی کردۆتەوە کە ئامانج لەبانگێشتکردنی سەرۆکی تورکیا بۆ پێشکەشکردنی پێشنیاری ئەو مامەڵە بازرگانییە بوە.
ئەم هەوڵەی سەرۆکی ئەمریکا ئەندامانی کۆنگرێسی ئەمریکا توڕەدەکات

بەگوێرەی رۆژنامەکە، ئەم هەوڵەی سەرۆکی ئەمریکا ئەندامانی کۆنگرێسی ئەمریکا توڕەدەکات، بەتایبەتیش لەئەنجومەنی نوێنەران پاش ئەوەی مانگی رابردو پشتیوانی سەپاندنی سزای ئابورییان بەسەر تورکیادا کردوە لەبەرامبەر لەشکرکێشییەکەی بۆسەر باکوری سوریا.

لەناوەڕاستی مانگی تەموزی رابردو، پرۆسەی گواستنەوەی سیستمی بەرگری موشەکی ( s-400) لەروسیاوە بۆ تورکیا دەستیپێکرد و لەنیوەی مانگی سێپتێمبەری رابردو قۆناغی دوەمی رادەستکردنەکە کۆتایهات.

بەرپرسانی ئەمریکا داوای هەڵوەشاندنەوەی ئەو گرێبەستە و کڕینی سستمی پاتریۆتی ئەمریکییان لە تورکیا کردوە و لەبەرامبەریشدا بەڵێنی هاوکاریکردنی ئەو وڵاتەیان داوە.


Copyright © 2016 Xendan.org all rights reserved

designed and developed by AVESTA GROUP