وەزیری گواستنەوە وردەکاری رێکخستنەوەی کاری تاکسیەکان دەخاتەڕو

- 11/9/2019 8:04:00 PM 13856 جار خوێندراوەتەوە

خەندان-

وه‌زیری گواستنه‌وه‌ و گه‌یاندنی حكومه‌تی هه‌رێمی كوردستان رایگەیاند، تاکسی هەر پارێزگایه‌ك لۆگۆی تایبه‌تی ده‌بێت و شۆفێرانی تاکسیش دەبێت بیسەلمێنن کە تاوانیان نەکردوە ئەوكاتە رێگەیان پێ دەدرێت کار بکەن.

ئانۆ جەوهەر، وەزیری گواستنەوەی هەرێم، بە رادیۆی هاتوچۆی راگەیاند، شۆفێری تاکسیەکان دەبێت بچنە بەڕەێوبەرایەتیەکانی هاتوچۆ فۆڕمی زانیاری وەربگرن، پاش پڕکردنەوەی بیبەنە ئاسایش ناوچەکەیان، دواتریش بچنە پۆلیسی بەڵگەی تاوان لەوێ کە سەلمێنرا شۆفێرەکە کێشەی نیە، ئێنجا رێگەی پێ دەدرێت کاری تاکسی بکات.

وەزیری گواستنەوە ئاشکرایشکرد، شۆفێری تاکسیەکان کارتی زانیاری تایبەتیان بۆ دروستدەکرێت، وێنەی شۆفێر و ژمارە مۆبایلەکەی و ژمارەی ئۆتۆمبیلەکەی لێ نوسراوە و لە کوشنی پشتەوەی ئۆتۆمبیلەکەش ئەو کارتە جێگیر دەکرێت.

ئانۆجەوهەر رونیشکردوە، لەدوای ئەو رێکارە ئیترهیچ شۆفێرێک ناتوانێت ئۆتۆمبیلی کەسێکی تر بۆ کاری تاکسی بەکاربهێنێت.

ئاماژەی بەوەشکرد، لەماوەی شەش مانگدا دەبێت پرۆژەکە جێبەجێبکرێت و دوای ئه‌و واده‌یه‌ش هه‌ر شۆفێرێك  كارتی زانیاری و لۆگۆی وه‌رنه‌گرتبو، له‌لایه‌ن تیمه‌كانی هاتوچۆوه‌ ڕێكاری یاسایی به‌رامبه‌ر ده‌گیرێته‌به‌ر.


Copyright © 2016 Xendan.org all rights reserved

designed and developed by AVESTA GROUP