بەپەلە

بەڕێوەبەرایەتی خۆسەر: تورکیا سیاسەتی پاکتاوی نەژادی و گۆڕینی دیمۆگرافیا لە رۆژئاڤا پەیڕەو دەکات

- 11/9/2019 4:07:00 PM 992 جار خوێندراوەتەوە

خەندان-

بەڕێوەبەرایەتی خۆسەری رۆژئاڤای کوردستان رایگەیاند، بەردبارانکردنی بارهەڵگرە سەربازیەکانی تورکیا لەلایەن دانیشتوانی رۆژئاڤاوە، بەڵگەیەکی دیکەیە لەسەر ئەوەی تورکیا رەچاوی ویستی کوردانی رۆژئاڤا ناکات و پاکتاوی نەژادی لە ناوچەکەیاندا ئەنجامدەدات.

دوێنێ هەینی سوپای روسیا و تورکیا گەڕانێکی هاوبەشیان لە شارۆچکەی مالیکیەی سەر سنور لە رۆژئاڤای کوردستان ئەنجامدا، لەمیانەی ئەو گەڕانەدا ئۆتۆمبێلە سەربازیەکانی تورکیا لەلایەن دانیشتوانی ناوچەکەوە بەردبارانکران.
بەردبارانکردنی سوپای توکیا بەڵگەیەکی دیکەیە لەسەر ئەوەی دانیشتوانی رۆژئاڤا لەدژی ئەو سیاسەتەن کە تورکیا پەیڕەوی دەکات

 

بەڕێوەبەرایەتی خۆسەری رۆژئاڤای کوردستان لە راگەیەندراوێکدا رایگەیاند، بەردبارانکردنی سوپای توکیا بەڵگەیەکی دیکەیە لەسەر ئەوەی دانیشتوانی رۆژئاڤا لەدژی ئەو سیاسەتەن کە تورکیا پەیڕەوی دەکات.
ئەو هەڵوێستەی دانیشوانی ناوچەکە لەوکارە دزێوانەوە سەرچاوەی گرتوە، کە سوپای تورکیا و گروپە چەکدارەکانی لایەنگری تورکیا لە ناوچەکەیاندا ئەنجامیانداوە

 

ئاماژەی بەوەشکردوە، "ئەو هەڵوێستەی دانیشوانی ناوچەکە لەوکارە دزێوانەوە سەرچاوەی گرتوە، کە سوپای تورکیا و گروپە چەکدارەکانی لایەنگری تورکیا لە ناوچەکەیاندا ئەنجامیانداوە، بەوەی خەڵکی رەسەنی ئەو ناوچانەیان ئاوارەکردوە و هەوڵی گۆڕینی دیمۆگرافیای ناوچەکەیان دەدەن".

بەرێوبەرایەتی خۆسەر ئیدانەی ئەو سیاسەتەی کردوە کە تورکیا لەناوچە کوردیەکاندا پەیڕەوی دەکات و بە "کارێکی دور لەڕەوشت" ناویبردوە هاوکات تورکیای بە بەرپرسی شەهیدبونی گەنجانی شارو شارۆچکە کوردیەکان تۆمەتبارکردوە.


Copyright © 2016 Xendan.org all rights reserved

designed and developed by AVESTA GROUP