بەپەلە

ژمارەیەک چەکداری داعش لە رۆژئاڤا بە بڕێکی زۆرچەک و تەقەمەنیەوە دەستگیرکران

- 11/9/2019 3:13:00 PM 9119 جار خوێندراوەتەوە

خەندان-

ناوەندی راگەیاندنی هێزەکانی سوریای دیموکرات (هەسەدە) رایگەیاند، لە ئۆپەراسیۆنێکی تایبەتی هێزەکانیان لە ناوەندی شاری رەققە، شانەیەکی نهێنی چەکدارانی داعش بە بڕێکی زۆر TNT، چەک و تەقەمەنی و پشتێنی خۆکوژییەوە دەستگیرکراون.

بەپێی ئاژانسی هاوار نیوز، ناوەندی راگەیاندنی هەسەدە لە راگەیەندراوێکدا رایگەیاندوە، لە ئۆپەراسیۆنێکی تایبەتی هێزەکانی لە ناوەندی شاری رەققە کە دوێنێ هەینی ئەنجامیانداوە دوای چاودێرییەکی ورد شانەیەکی نهێنی داعش، کە پێکهاتبون لە شەش ئەندام لە ئۆپەراسیۆنێکی تایبەتدا دەستگیرکراون.

ئاماژە بەوەشکراوە، لەگەڵ ئەو چەکدارانەی دەستگیرکراون ژمارەیەک ژن کە لە داگیرکارییەکانی داعش بە دیل کەوتبونە دەستی چەکدارەکان، رزگارکراون.  

هەسەدە رونیکردەوە، لەو ئۆپەراسیۆنەدا ژمارە و ڕێژەیەکی زۆر بۆمب، TNT، دژە تانک و چەک و جبەخانە دەستی بەسەردا گیراوە.


Copyright © 2016 Xendan.org all rights reserved

designed and developed by AVESTA GROUP