جڤاتی نیشتیمانی گۆڕان هەڵسەنگاندن بۆ کارەکانی کابینەی نۆیەمی حکومەت دەکات

- 11/9/2019 9:18:00 AM 1285 جار خوێندراوەتەوە

خەندان-

جڤاتی نیشتیمانی بزوتنەوەی گۆڕان ئەمڕۆ کۆدەبێتەوە و لەبارەی چەند پرسێکەوە گفتوگۆ دەکات لەوانە، هەڵسەنگاندن بۆ کارەکانی کابینەی نۆیەمی حکومەتی هەرێمی کوردستان لە ماوەی 100 رۆژی رابردودا.

پێنجشەممەی رابردو جڤاتی گشتی بزوتنەوەی گۆڕان کە (دەستەیەکی راوێژکارین) کۆبوەوە، کاتژمێر 10:00ی پێشنیوەڕۆی ئەمڕۆش جڤاتی نیشتیمانی لەشاری سلێمانی کۆدەبێتەوە.
یەکێک لە تەوەرەکانی کۆبونەوەکە هەڵسەنگاندنی کارەکانی کابینەی نۆیەمی حکومەتی هەرێم دەبێت

 

نزار مەحمود، ئەندامی جڤاتی نیشتیمانی بزوتنەوەی گۆڕان بە خەندان-ی راگەیاند، لەبارەی چەند پرسێکەوە گفتوگۆ دەکات، یەکێک لە تەوەرەکانی کۆبونەوەکە هەڵسەنگاندنی کارەکانی کابینەی نۆیەمی حکومەتی هەرێم دەبێت لەو کاتەوەی دەستبەکاربوە، تەوەرێکی دیکەش تاتوێکردنی دۆخی ئێستا عیراق و بەردەوامی خۆپیشاندانەکان و داواکارییەکانی گۆڕینی دەستوری عێراق دەبێت.
گۆڕان بە چوار وەزیر و جێگرێکی سەرۆکی هەرێم بەشدارە لە حکومەتی هەرێمدا 

 

بزوتنەوەی گۆڕان بە چوار وەزیر و جێگرێکی سەرۆکی هەرێم بەشدارە لە حکومەتی هەرێمدا و بڕیاریشە یاریدەدەرێکی سەرۆکی حکومەت و زیاتر لە 68 پۆست لە بەڕێوەبەری گشتی، بریکار و راوێژکاری وەزارەت لە حکومەتدا وەربگرێت.
لە کۆبونەوەی جڤاتدا ئامادەکارییەکان بۆ کۆنفراسی نیشتیمانی گفتوگۆی لەسەر دەکرێت و هەر رێکارێک کە پێویست بێت لەو بارەیەوە بڕیاری بۆ دەردەکەین

 

سەبارەت بە ئامادەکارییەکانی کۆنفرانسی نیشتیمانی گۆڕان کە بڕیارە مانگی داهاتو بەڕێوەبچێت، نزار مەحود رونیکردەوە، لە کۆبونەوەی جڤاتدا ئامادەکارییەکان بۆ کۆنفراسی نیشتیمانی گفتوگۆی لەسەر دەکرێت و هەر رێکارێک کە پێویست بێت لەو بارەیەوە بڕیاری بۆ دەردەکەن.

14ی ئەیلولی 2019، جڤاتی نیشتمانی بزوتنەوەی گۆڕان  لە کۆبوەنەوەیەکدا، رێكخەری گشتی و ئەندامانی خانەی راپەڕاندنی بزوتنەوەی گۆڕانی هەڵبژارد و بڕیاریشیدا لە کۆتایی ئەمساڵدا کۆنفرانسی نیشتیمانی  وهەڵبژاردنە ناوخۆییەکانی بزوتنەوەکە بەڕێوەبچێت.


Copyright © 2016 Xendan.org all rights reserved

designed and developed by AVESTA GROUP