هەواڵی ئەمڕۆ

بەپەلە

خورماتو بە دەست قەیرانی ئیداریەوە دەناڵێنێت

- 11/6/2019 8:08:00 PM 1341 جار خوێندراوەتەوە

 خەندان – نیگار عومەر

قەزای خورماتو توشی قەیرانی بەڕێوەبردن بوە و قایمقامی شارەکە هەڵاتوە، ئەنجومەن هەڵوەشاوەتەوە و شارەوانیش بێ سەرۆکە.

سەردار ئەحمەد ئەندامی ئەنجومەنی هەڵوەشیندراوەی قەزای خورماتو بەخەندان- ی ڕاگەیاند، "دوای ئەوەی پەرلەمانی عێراق بڕیاریدا بە هەڵوەشاندنەوەی ئەنجومەنی پارێزگا و قەزا و ناحیەکان، ئەنجومەنی قەزای خورماتوش هەڵوەشاوەتەوە و دەسەڵاتەکانی گەڕێندراوەتەوە بۆ پارێزگاری سەڵاحەدین.

ئاماژەی بەوەشکرد قایمقامیش شارەکەی جێهیشتوە، هەروەها پێشتر کارەکانی هاوڵاتیان لەلایەن ئەنجومەنەوە رای دەکرا و بەکۆی دەنگ و بە لیژنەی تایبەت بڕیار لەسەر کاروباری شار دەدرا، بەڵام لە ئێستادا یەک کەس  بڕیارەکان دەدات.

هاوڵاتیانی خورماتوش نیگەرانن لەو دۆخەی قەزاکەی تێکەوتوەو باس لەوە دەکەن کێشەی بۆ دروستکردوون.

محەمەد جەمال هاوڵاتیەکەی دانیشتونی خورماتو بە خەندان- ی راگەیاند، بۆ مامەڵەیەک سەردانی قایمقامێتم کردوە کارەکەم بۆ جێبەجێ نەکراوە، ئەگەرچی قایمقامی بە وەکالەت دانراوە.

بەبڕوای چاودێرانی دۆخی خورماتوش ئەم باردۆخە کاریگەری لەسەر زۆربەی سێکتەرەکان لە شارەکە کردوە.

ئومێد تەیب چاودێری سیاسی بەخەندان- ی ڕاگەیاند،"  لە بەغدا خەڵک بۆ هەڵوەشاندەوەی حکومەت خۆپیشاندان دەکەن بەڵام لە خورماتو حکومەتی خۆجێی بۆ خۆی هەڵوەشاوەتەوە".

ئاماژەی بەوەشکرد ئەم رەوشە ئیداریەی کە لەخورماتودا دروست بوە نیشانەی ئەوەیە کە لە دوای ساڵی2017 گۆڕینی زۆریک لەبەڕێوبەرەکانی نەیانتوانی ئیدارەی شار بەڕێوەبەرن ئەمەش کیشەی زۆری بۆ هاوڵاتیانی ئەم شارە دروست کردوە" .

بەپێی زانیاریەکان لە ئێستادا قایمقامی خورماتو بەهۆی دەرکردنی فەرمانی دەستگیرکردنیەوە هەڵاتوە و ئەنجومەنی قەزاش هەڵوەشاوەتەوە،هەروەها سەرۆکی شارەوانی کۆچی دوایکردو و کەس لە شوێنی دانەنراوە، ماوەی دوو مانگیشە بەڕێوەبەری نەخۆشخانەی خورماتو دەستی لەکارکێشاوەتەوە ئەمە جگە لەوەی بەڕێوەبەری کارەبای خورماتوش دەڵێت بە خواستی خۆی لە پۆستەکەی دانراوە و رازی نیە.


Copyright © 2016 Xendan.org all rights reserved

designed and developed by AVESTA GROUP