بەپەلە

فلتەری جاڵجاڵۆكە-ی سناپچات منداڵان دەتۆقێنێت
ڤیدیۆ..ژمارەیەك بەكارهێنەری سناپچات روبەڕوی رەخنە دەبنەوە

- 11/5/2019 10:13:00 PM 4186 جار خوێندراوەتەوە

خەندان-

لە ماوەی رابردودا، فتەرێك لە سناپچات بڵاكرایەوە، تێیدا رەگەزی نێر و مێی دەگۆڕی، ئەو فلتەرە بوە هۆی ئەوەی كوڕێك لە رێگەی ئەپڵیكەیشنێك بۆ بەستنی ژوان لەگەڵ رەگەزی بەرامبەر، هەزار و 600 جار بەرامبەرەكەی فریوبدات.

ئێستاش، تۆڕی كۆمەڵایەتی سناپچات فلتەرێكی بۆ وێنەكانی بڵاوكردەوتەوە كە تێیدا جاڵجاڵۆكەیەك دەردەكەوێت و لەكاتێكدا روخسارێك لە چاوی كامێرای مۆبایلەكەوە دیاردەبێت، وادەردەكەوێت جاڵجاڵۆكەیەكی گەورە بەسەر روخساریدا دەسوڕێتەوە.

هەندێك لە كەسانی پێگەیشتو، نەك ئەو كارە بە پێكەنیناوی نابینن، بەڵكو بێزی لێدەكەنەوە و نەرێنی تەماشای دەكەن، گەر ئەو هەستە بەراورد بكرێت بە هەستی منداڵێك كاتێك ئەو دیمەنە لەسەر روخساری خۆی دەبینێت و بیركردنەوەی زۆر لە مرۆڤێكی پێگەیشتو جیاوازترە بە بینینی وێناكان وەك راستی، دەزانین كە تاقیكردنەوەی كارێكی لەوجۆرە بۆ منداڵان چەندە نەرێنیە بۆ سەر دەرونیان.

لە چەند گرتە ڤیدیۆییەكدا، سەرەڕای ئەوەی بەكارهێنەران كەسانی پێگەیشتون و نزیكترین كەسی منداڵەكانن، چەند دایك و باوكێك یاخود كەسی نزیكی ئەو منداڵانە بە مەبەستی چركاندنی سێڵفی روی كامێراكانیان دەكەنە منداڵەكان و فلتەرە نوێیەكەی سناپچات بەكاردەهێنن.

وەك دەردەكەوێت، لەكاتی بینینی جاڵجاڵۆكەكە لە لایەن منداڵەكانەوە، دەستبەجێ هەستدەكەن ئەو وێنایەی لەبەرچاویانە راستەقینەیە و توشی ترس و تۆقین دەبنەوە، سەرەڕای ئەو كاردانەوە نەرێنیە دەرونیانەی منداڵەكانیش، بەكارهێنەرەكان بە پێكەنین و قاقا-وە لە كاردانەوەی منداڵەكانیان دەڕوانن و لە تۆڕە كۆمەڵایەتیەكانیش بە تەنزەوە بڵاویانكردوەتەوە.

ئەو كارە، بوەتە جێگەی رەخنە لە لایەن ژمارەیەكی زۆر لە بەكارهێنەرانی تۆڕە كۆمەڵایەتیەكان و چالاكوانانی مافەكانی منداڵانیش لەسەر ئەو كارە هاتنە دەنگ، ئەو فلتەر-ەی سناپاچاتیش بە "توندڕەوی بەرامبەر منداڵان" ناوزەدكرا، لایەنە پزیشكیەكانیش دەڵێن "دەكرێت ئەو كارە دەستبەجێ منداڵەكە توشی شۆك و تۆقینێكی دەرونی بكات".



Copyright © 2016 Xendan.org all rights reserved

designed and developed by AVESTA GROUP