بەپەلە

لەیەک مانگدا دو گوندی کوردی چۆڵکراون
مەترسی لەسەر چۆڵكردنی گوندەكانی سنوری قەزای خانەقین هەیە

- 11/4/2019 10:41:00 PM 2710 جار خوێندراوەتەوە

خەندان- نیگار عومەر
 
بەهۆی جموجوڵەکانی داعشەوە بۆسەر گوندەکانی خانەقین و خراپی بارودۆخی ئەمنی ناوچەکە، چەند گوندێکی کورد نشینی چۆڵکران.

ئەمڕۆ دوشەممە 4ی تشرینی دوەم، دانیشتوانی هەریەكە لە گوندەكانی (شەفیق) و (جەمیل بەگ)، بەهۆی بەردەوامی هێرشی چەكدارانی نەناسراو بۆ سەر گوندەكەیان، گوندەكانیان چۆڵكرد، لە رابردوشدا هاوڵاتیانی چوار گوندی دیكەی سنورەكە بەتەواوی گوندەكانیان لە ترسی مەرگیان و بەهۆی نەبونی ئەمنیەتی ناوچەكانیانەوە، زێدی خۆیان جێهێشتوە. 

ئەم ڕوداوە وایکرد تەواوی دانیشتوانی گوندەکەمان چوڵی بکەن و لەترسی گیانی خۆمان ئاوارەی ناوچەکانی دیکە بوین هەر یەکەو بۆ شوێنێک ڕۆشتین هەمو شتێکمان لەدەستدا

 

ڕزگار فەرمان، دانیشتوی گوندی مەردان لەسنوری خانەقین، بۆ خەندان باسی چیرۆکی لەدەستدانی دو ئەندامی خیزانەکەی دەکات و دەڵێت "ڕۆژی جەژن بو براکەم پێی وتم بابڕۆین بۆ باخەکەمان بەڕێ کەوتین کەمێک من دوا کەوتم ئەوان لەپیش منەوە ڕۆشتن دوای چارەکێک کچی براکەم وتی مامە فریامان بکەوە تەقینەوە پێماندا تەقیوەتەوە، بەو هۆیەوە براکەم و براژنم گیانیان لەدەستدا، بەڵام منداڵەکانی سەلامەت بون، ئەم ڕوداوە بەهۆی ئەوەوە بو داعش بۆمبێکی لەنێو حەوشەکەماندا دانابو" 

ڕزگار دەڵێت "ئەم ڕوداوە وایکرد تەواوی دانیشتوانی گوندەکەمان چوڵی بکەن و لەترسی گیانی خۆمان ئاوارەی ناوچەکانی دیکە بوین هەر یەکەو بۆ شوێنێک ڕۆشتین هەمو شتێکمان لەدەستدا" 

بارودۆخی ئەمنی سنوری خانەقین باش نیە و پێویستە کاری لەسەر بکرێت و ڕەنگە داعش جارێکی دیکە هێرشێکی فروانتر بکات

 

لەلایەکی ترەوە خالید دارا، بەرپرسی کۆمیتەی یەكێتی لە خانەقین بە خەندان-ی ڕاگەیاند،"بارودۆخی ئەمنی سنوری خانەقین باش نیە و پێویستە کاری لەسەر بکرێت و ڕەنگە داعش جارێکی دیکە هێرشێکی فروانتر بکات، ئەم جموجۆڵانەی کە هەیە لە سنوری خانەقیندا ئاماژە بۆ ئەوە دەکەن".

ئاماژەی بەوەشکرد، "لە ماوەی کەمتر لەیەک مانگدا دو گوند لەسنوری خانەقین چوڵکراون بەردەوام دانیشتوانی گوندەكانی سنورەكە چۆڵی دەکەن، تا ئێستا نزیکەی 20 گوندی کوردی سنوری خانەقین بەهۆی مەترسی داعشەوە لە ماوەی دو ساڵی رابردودا چۆڵیانکردوە".

چۆڵکردنی گوندەکان تەنها گوندە کوردییەکانی نەگرتۆتەوە، بەڵکو هەندێک لەهاوڵاتیانی عەرەبیش گوندەکانیان چۆڵکردوە

 

بەپێی زانیاریەکانی خەندان، چۆڵکردنی گوندەکان تەنها گوندە کوردییەکانی نەگرتۆتەوە، بەڵکو هەندێک لەهاوڵاتیانی عەرەبیش گوندەکانیان چۆڵکردوە.

ناوچەی نەدا ناوچەیەکی عەرەب نشینە سەر بە ناحیەی مەندەلی و قەزای خانەقینە، نزیکەی 40 گوند لەخۆ دەگرێت

 

کەمال مستەفا، بەرپرسی کۆمیتەی یەكێتی لە مەندەلی، بەخەندان-ی ڕاگەیاند، " ناوچەی نەدا ناوچەیەکی عەرەب نشینە سەر بە ناحیەی مەندەلی و قەزای خانەقینە، نزیکەی 40 گوند لەخۆ دەگرێت و زۆرینەی دانیشتوانی ئەم ناوچەیە عەرەب نشینن، بەڵام لەترسی هێرشەکانی داعش ڕۆژانە دانیشتوانی گوندەکان پۆل پۆل چوڵی دەکەن".

لەساڵی 2017 ەوە بۆشایی ئەمنی نێوان هێزەکانی پیشمەرگە و سوپای عێراقی دروستبوە و ئەمەش وایکردوە هاوڵاتیان گوندەکانیان چۆڵبکەن

بەهۆی ئەو بۆشاییە ئەمنیەی کە لەنێوان سوپای عێراقی و هێزەکانی پیشمەرگە دروست بوە، وایکردوە جموجوڵەکانی داعش لەو سنورە زیاد بکات

 

دلێر شکور، فەرماندەی لیوای سێ لەسنوری خانەقین، بەخەندان-ی ڕاگەیاند،"بەهۆی ئەو بۆشاییە ئەمنیەی کە لەنێوان سوپای عێراقی و هێزەکانی پیشمەرگە دروست بوە، وایکردوە جموجوڵەکانی داعش لەو سنورە زیاد بکات و زیاتر گوندە کوردیەکان بکرێنە ئامانج و چوڵ بکرێن".

ئێمە وەک هێزەکانی پێشمەرگە چەند جارێک لەگەڵ حکومەتی عێراقیدا دانیشتوین بۆئەوەی بتوانین باشتر پارێزگاری لەو سنورە بکەین

 

وتیشی،"ئێمە وەک هێزەکانی پێشمەرگە چەند جارێک لەگەڵ حکومەتی عێراقیدا دانیشتوین بۆئەوەی بتوانین باشتر پارێزگاری لەو سنورە بکەین، بەڵام ئەوان ئامادەنەبون".

ئاماژەی بەوەشكرد"هێزەکانی پیشمەرگە هەر وەک چۆن لە ڕابردودا ئەو ناوچانەیان پاراستوە ئیستاش دەتوانن بیانپارێزن".

لەدوای ڕوداوەکانی ساڵی 2017 ەوە  نزیکە 250 گوندنشین لە سنوری خانەقین گوندەکانیان بەجێهێشتوە ڕویان لەناوچەکانی دیکەی کوردستان کردوە.

 


Copyright © 2016 Xendan.org all rights reserved

designed and developed by AVESTA GROUP