ئەردۆگان: کۆمپانیای لافارج چیمەنتۆی داوە بە کوردەکان بۆ دروستکردنی بازگەی سەربازی

- 11/1/2019 4:36:00 PM 51618 جار خوێندراوەتەوە

خەندان-

رەجەب تەیب ئەردۆگان، سەرۆککۆماری تورکیا  فەرەنسا بەوە تۆمەتبار دەکات، کە کۆمپانیای لافارجی ئەو وڵاتە چیمەنتۆی داوە بە کوردانی رۆژئاڤا تا بازگەی سەربازی پێ بونیاد بنێن لە نزیک روباری فورات.

لەسەروبەندی لەشکرکێشیەکانی تورکیا بۆ سەر رۆژئاڤا، هێزەکانی سوریای دیموکرات زنجیرەیەک بازگەی سەربازیان لە ناوچەکانی نزیک روباری فورات دروستکرد، ئەردۆگان فەرەنسا بەوە تۆمەتبار دەکات کە چیمەنتۆی ئەو پرۆژانە لەلایەن کۆمپانیاکانی ئەو وڵاتەوە دابینکراوە.

" ئەو هەمو چیمەنتۆیانەیان لەکوێوە دەستکەوتوە تا تونێل و بازگەی سەربازیی پێدروست بکەن، بێگومان کۆمپانیای لافارجی فەرەنسی پێیداون، فەرەنسا تۆ گەورەترین  باج دەدەیت بەدەستی ئێمە" ئەردۆگان وای وت.

رێکەوتی 10ی مانگی رابردو، سوپای تورکیا لەشکرکێشیەکانی بۆ سەر رۆژئاڤا دەستپێکردو، هەر لەسەرتاوە حکومەتی فرەنسا دەستپێشخەربو لە ئیدانەکردن و سزادانی تورکیا، ئەنقەرەش پاریس بەوە تۆمەتبار دەکات کە بەردەوام هاریکاری کوردەکان دەکات کە ئەوان "بە تێرۆرست و گێرەشێوێن" ناویان دەبەن.


Copyright © 2016 Xendan.org all rights reserved

designed and developed by AVESTA GROUP