بەپەلە

ڤیدیۆ..لە نمایشێكی سێرك-دا ورچێك هێرشدەكاتە سەر راهێنەرەكەی

- 10/29/2019 9:28:00 PM 14015 جار خوێندراوەتەوە

خەندان-

راهێنەرێكی سێرك، لەكاتی ئەنجامدانی نمایشێكی ئاساییدا لە روسیا، روبەڕوی پەلاماری ئەو ورچە دەبێتەوە كە خۆی راهینان و مەشقی پێكردوە، بەوهۆیەوە ئامادەبوانی نمایشەكە بە ترسەوە هۆڵی نمایشەكە بەجێدەهێڵن.

دیمەنی روداوەكە لە رێگەی گرتەڤیدیۆییەكەوە بڵاوكراوەتەوە، تێیدا دەردەكەوێت، پاش ئەنجامدانی نمایشێك لەلایەن ورچەكەوە و لەكاتێكدا راهێنەرەكە ئاماژە بۆ ورچەكە دەكات تا ئاراستەی خۆی بگۆڕێت، لەناكاو ئەو ئاژەڵە گەورەیە هێرشدەكاتە سەر راهێنەرەكەی و دەیخات بە زەویدا.

گرتە ڤیدیۆییەكە لەلایەن دایكێكی تەمەن 27 ساڵەوە تۆماركراوە، كە هاوشێوەی چەندین دایك و باوكی دیكە منداڵەكەی بردوە بۆ تەماشاكردنی نمایشەكانی سێرك، بەڵام پاش ئەوەی ورچەكە هێرشدەكاتە سەر راهێنەرەكە، سەرجەم ئامادەبوان بە ترسەوە بەرەو دەرەوەی هۆڵەكە هەنگاودەنێن.

لەكاتێكدا ورچەكە هێرشدەكاتە سەر راهێنەركە، راهێنەرێكی دیكە بە "لەقە" چەندجارێك هەولدەدات هاوڕێكەی رزگاربكات، بەڵام ورچەكە دەستبەردار نابێت، بەگوێرەی زانیاریەكانیش دواتر ورچەكە لەرێگەی ئامێرێكەوە كارەبای لێدراوە تا راهێنەرەكە لە چنگی رزگاربكرێت.

بە گوێرەی وتەی ئامادەبوان، ئەو ورچە هێندە گەورەبوە، نەیانتوانیوە كۆنترۆڵی بكەن، وەك لە دیمەنەكانیشدا دەردەكەوێت، هیچ پارێزبەندیەك لەنێوان پێگەی نمایشەكان و ئامادەبواندا نیە، لەكاتێكدا رێژەیەك منداڵیشی تێدایە.

راگەیاندنەكان دەڵێن، بەهۆی هێرشی ئەو ورچەوە راهێنەرەكە برینداربوە. بەڵام سەبارەت بە ئاستی مەترسیداری برینەكە هیچ نەخراوەتەڕو.


Copyright © 2016 Xendan.org all rights reserved

designed and developed by AVESTA GROUP