"چەکی کۆمەڵکوژ بەکاردەهێنن و دەشیانەوێت دەستورمان بۆ بنوسنەوە"
فەیلەقی ماجد، ئەو هێزەی چیچەک کۆبانێیان بەدیلگرتوە کێن و سەرکردەکەیان کێیە

- 10/27/2019 10:37:00 AM 13261 جار خوێندراوەتەوە

خەندان- هەڤاڵ محەمەد

هێزەکانی فەیلەقی ماجد کە ساڵی 2011 لەلایەن تۆفیق شەهابەدین لە پارێزگای حەلەب دامەزرێنراوە، لە هێرشەکانی ئەم دوایەی سوپای تورکیادا بۆ سەر باکوری سوریا، بەشی پێشەوەی روبەڕوبونەوەکاندا دەبینرێن و لە دواین ڤیدیۆیاندا کچە شەڕڤانێکی یەپەژەیان کەوتوەتە دەست و "بێڕێزی" پێدەکەن، ئەو هێزە کێن و ئەرکیان لە سوریادا چیە؟.
ئەو هێزە لەسەرەتای دامەزراندنییەوە بە بەردەوامی هێرشیانکردوەتە سەر بنکە و بارەگاکانی یەپەگە

 

بە گوێرەی میدیاکانی رۆژئاوای کوردستان، ئەو هێزە لەسەرەتای دامەزراندنییەوە بە بەردەوامی هێرشیانکردوەتە سەر بنکە و بارەگاکانی یەپەگە لە گەڕەگی شێخ مەقسود لە شاری حەلەب، تەواوی چەک و پێداویستییەکانیشی لەلایەن تورکیاوە بۆ دابنیکراوە.
کاتێک یەپەگە ساڵی 2016 چەند گەڕەکێکی بەشی رۆژهەڵاتی حەلەبی لە ژێر دەسەڵاتی گروپی فەیلەقی ماجد دەرهێنا ئەو گروپە چەکی کیمیایی قەدەغەکراویان بەکارهێنا

 

کاتێک یەپەگە ساڵی 2016 چەند گەڕەکێکی بەشی رۆژهەڵاتی حەلەبی لە ژێر دەسەڵاتی گروپی فەیلەقی ماجد دەرهێنا کە پێشوتر ناویان گروپی "نورەدین الزنکی"بوە، ئەو "گروپە چەکی کیمیایی قەدەغەکراویان دژی هێزە کوردییەکان بەکارهێناوە" وەکو یەپەگە باسی کردوە. 
لە کاتی داگیرکردنی عەفریندا گروپی فەیلەقی ماجد هەمو جیاوزییەکانی لەگەڵ بەرەی نوسرە وەلاناو بەیەکەوە و بە پشتیوانی تورکیا هێرشیانکردە سەر عەفرین


ئاژانسی هاوارنیوزیش سەبارەت بەو گروپە چەکدارییەی ئۆپۆزسیۆنی سوریا کە بە درێژایی شۆڕشی سوریا زۆترین روبەڕوبونەوەیان لەگەڵ هێزە کوردییەکاندا هەبوە نەک رژێمی ئەسەد باسی لەوەکردوە، سەرەتای ساڵی 2018 لە کاتی داگیرکردنی عەفریندا گروپی فەیلەقی ماجد هەمو جیاوزییەکانی لەگەڵ بەرەی نوسرە (باڵی سوریای قاعیدە)دا وەلاناوە و ناوچەکانی حەلەب و ئیدلبیان بۆ سوپای سوریا چۆڵکرد و  بەیەکەوە و بە پشتیوانی تورکیا هێرشیانکردە سەر عەفرین.
ئەو گروپە لە ناو شۆڕشی سوریادا وەکو گروپێکی جیهادی، بەکرێگیراوی تورکیا و تیرۆرست ناوی دەرکردوە

 

بە گوێرەی هاوارنیوز بەشێک لە کارەکانی ئەو گروپە وەکو "سوکایەتیکردن بە منداڵێکی خاوەن پێداویستی تایبەت، بەکارهێنانی چەکی کیمیایی و سوکایەتی بە دیلکراوەکان" ناوی ئەو گروپەی لە ناو شۆڕشی سوریادا وەکو گروپێکی "جیهادی، بەکرێگیراوی تورکیا و تیرۆرست" دەرکردوە، بۆیە مانگی ئازاری ئەم ساڵ تورکیا داوای لەو گروپە کرد خۆی هەڵوەشێنێتەوە و بێتە ناو سوپای نیشتیمانی سوریا (کۆکراوەی هەمو هێزە ئۆپۆزسیۆنەکانی سوریایە و تەنها تورکیا پشتیوانیان دەکات).

سەرکردەی ئەو رێکخراوە کێیە؟

سەرکردەی ئێستای فەیلەقی مەجید ناوی یاسر عەبدولرەحیم-ە و بەشێکە لە فەیلقی شامی سەر بە ئۆپۆزسیۆنی چەکداری سوریا، لە بارەی کەسایەتی سەرکردەی ئەو گروپە هاوارنیوز دەڵێت، یاسر عەبدولرەحیم تۆمەتبارە بە بەکارهێنانی چەکی کیمیایی لە گەڕەکی شێخ مەقسود و لیستێکی گەورەی پێشێلکاری جەنگی هەیەو بە کەسێکی دیاری ئیخوانی سوریا دادەنرێت، لەلایەن تورکیاشەوە وەکو وتەبێژی ئۆپۆزسیۆنی سوریا لە کۆنگرەی ئەستانەی تایبەت بە دەستوری نوێی سوریا دیاریکراوە.

کەسێک کە سوکایەتی و بێڕێزی بە منداڵ و دیلەکان دەکات و تۆمەتبارە بە بەکارهێنانی چەکی کیمیایی، دەیەوێت دەستوری نوێی سوریامان بۆ بنوسێتەوە

 

ئەو ماڵپەرە باسی لەوەشکردوە، "کەسێک کە سوکایەتی و بێڕێزی بە منداڵ و دیلەکان دەکات و تۆمەتبارە بە بەکارهێنانی چەکی کیمیایی، دەیەوێت دەستوری نوێی سوریامان بۆ بنوسێتەوە".

لە دواین دەرکەوتنیشیدا یاسر عەبدولەرەحیم لەگەڵ ژمارەیەک لە چەکدارەکانیدا وێنەیەکی سێلفی خۆی لەگەڵ شەرڤانێکی بەدیلگیراوی هەسەدە "چیچەک کۆبانی"دا بڵاوکردوەتەوە کە لەکاتی شەڕوپێکدادانەکانی هەسەدە و هێزەکانی نزیک لە تورکیا لە کۆبانی کەوتوەتە دەست ئەو گروپە.

لەوبارەیەوە میدیاکانی رۆژئاوای کوردستان ئەوەیان خستوەتەڕو، لە سەرەتای هێرشەکانی گروپە ئۆپۆزسیۆنەکاندا بە پشتیوانی تورکیا بۆ سەر باکوری سوریا ژمارەیەک تاوانی جەنگیان ئەنجامداوە، وەکو شێواندنی جەستە و گولەبارانکردنی هەفرین خەڵف، ئەمینداری گشتی پارتی سوریای ئایندە و شەرڤان ئامارا  و ژمارەی خەڵکی مەدەنی دیکە کە لە یاسای جەنگدا جێگایان نابێتەوە.


Copyright © 2016 Xendan.org all rights reserved

designed and developed by AVESTA GROUP