خەندان زانیاری لەبارەی دواین شوێنی دەستبەسەركردنی هونەرمەند شیروان عەبدوڵا بڵاودەكاتەوە

- 10/25/2019 11:24:00 AM 123606 جار خوێندراوەتەوە

خەندان-

دوای ئەوەی لە دوێنێوە چارەنوسی هونەرمەندی میللی شاری سلێمانی شیروان عەبدوڵا نەدەزانرا، بەگوێرەی زانیارییەكانی خەندان كەمێك پێش ئێستا، شوێنی دەستبەسەركردنی ئەو هونەرمەندە لە توركیا زانرا.

بەگوێرەی بەدواداچونەكانی دەزگای میدیایی خەندان، بەیانی ئەمڕۆ نوێنەری دەزگای لوتكە بۆ كاروباری ئاوارەو پەنابەران، توانیویەتی زانیاری لەسەر شوێنی دەستبەسەركردنی هونەرمەندی میللی شیروان عەبدوڵا بزانێت.

هەر بەگوێرەی زانیارییەكان، لەئێستادا هونەرمەند شیروان عەبدوڵا، لەو فرۆكەخانەیەی ئیستەنبوڵە كە ساڵی پار رەجەب تەیب ئەردۆگان، سەرۆك كۆماری توركیا كردیەوە و شوێنی فرۆكەخانەی ئەتاتوركی گرتەوە.

لای خۆشیەوە مەریوان عەبدوڵا، برای شیروان عەبدوڵا هەواڵەكەی خەندان-ی پشتڕاستكردەوە و رایگەیاند،"كاتژمێر 10:45 دەقیقەی بەیانی ئەمڕۆ كاك یەشار، نوێنەری كاروباری ئاوارەو پەنابەران لە توركیا پەیوەندی پێوەكردم و پێی راگەیاندنم كە پەیوەندیان لەگەڵ ئەو كەسانە كردوە كە لەئێستادا شیروان عەبدوڵایان دەستبەسەركردوە".

وتیشی،"سوپاس بۆ خوا لەئێستادا سەرجەم كێشەكانی چارەسەركراوە و بڕیارە ئەمڕۆ ئازادبكرێت".

خەندان ئەوەشی زانیوە كە ئاری جەلال بەرپرسی دەزگای لوتكە بۆ كاروباری ئاوارەو پەنابەران، نوسراوێكی ئاراستەی فرۆكەخانەی سەبیحە كردوەو تیایدا داوای چارەنوسی هونەرمەند شیروان عەبدوڵای كردوە.

دوێنێ، هونەرمەندی میللی شیروان عەبدوڵا بە مەبەستی گەڕانەوە بۆ هەرێمی كوردستان لە ئەڵمانیاوە گەشتیكردوە بۆ شاری ئیستەنبوڵی توركیا و گەشتەكەشی بەترانزێت بوە، بەڵام دوای ئەوەی فڕۆكەكەیان لە فڕۆكەخانەی "سەبیحە گۆكچەن" دەنیشێتەوە، لەلایەن پۆلیسی فڕۆکەخانەوە دەستگیردەکرێت و چارەنوسی بە نادیاری تا بەیانی ئەمڕۆ مابوەوە.



Copyright © 2016 Xendan.org all rights reserved

designed and developed by AVESTA GROUP