بەپەلە

"تورکیا چەکی قەدەغەکراوی کیمیایی بەکارهێناوە"
وتەبێژی کەجەکە: تورکیا هەمو یاسا نێودەڵەتییەکانی لە رۆژئاڤا پێشێلکردوە

- 10/23/2019 12:31:00 PM 3448 جار خوێندراوەتەوە

خەندان-

وتەبێژی کۆمیتەی پەیوەندییەکانی کەجەکە رایگەیاند، تورکیا هەمو یاسا نێودەڵەتییەکانی لە رۆژئاڤای کوردستان پێشێلکردوە و چەکی قەدەغەکراوی کیمیایی دژ بەکارهێناوە، لەو ڕێگەیەوە دەیەوێت گەل کۆچبەر بکات و دیموگرافیای ناوچەکە بگۆڕێت.
 گەلی ئەرمەنیی لە شەڕی جیهانی یەکەم لە سەرێکانی، جزیرە و ڕەقا و دێرەزۆر کۆمەڵکوژ کران، ئێستاش تورکیا لە هەمان شوێن گەلی کورد کۆمەڵکوژ دەکات

 

زاگرۆس هیوا، وتەبێژی کۆمیتەی پەیوەندییەکانی دەروەی کۆما جڤاکێن کوردستان (کەجەکە) لە چاوپێکەوتنێکدا لەگەڵ ئاژانسی رۆژنیوز لەبارەی هێرشەکانی تورکیاوە بۆ سەر رۆژئاڤای کوردستان رایگەیاندوە، "سەرنجڕاکێشە، کە گەلی ئەرمەنیی لە شەڕی جیهانی یەکەم لە سەرێکانی، جزیرە، قەققە و دێرەزور کۆمەڵکوژ کران،  ئێستا کە شەڕی سێیەمی جیهانیی دەستیپێکردوە، تورکیا لە هەمان شوێن گەلی کورد کۆمەڵکوژ دەکات".
تورکیا هەمو یاسا نێودەڵەتییەکانی پێشێلکردوە، چەکی قەدەغەکراوی فسفۆر و کیمیایی دژی گەلی باکور و ڕۆژهەڵاتی سوریا بەکارهێناوە

 

ئاماژەی بەوەشکردوە، "تورکیا هەمو یاسا نێودەڵەتییەکانی پێشێلکردوە، چەکی قەدەغەکراوی فسفۆر و کیمیایی دژی گەلی باکور و ڕۆژهەڵاتی سوریا بەکارهێناوە، لەو ڕێگەیەوە دەیەوێت گەل کۆچبەر بکات و دیموگرافیای ناوچەکە بگۆڕێت، ویلایەتی حەلەب لە سوریا و ویلایەتی موسڵ لە عێراق بخاتە سەر جوگرافیای عوسمانیی نوێ، لەو چوارچێوەیەدا ئەو هێرشانە تەنیا لەسەر ڕۆژئاوای کوردستان نییە، بەڵکو هێرشە بۆ سەر تەواوی کوردستان".
دەوڵەتی تورک دەیەوێت دەسەڵاتی خۆی بۆ 100 ساڵی دیکە درێژ بکاتەوە، بۆیە ئێمەش وەک گەلی کورد دەبێت هەبونی خۆمان بپارێزین و بەرخۆدانی خۆمان بەهێز بکەین

 

زاگرۆس هیوا باسی لەوەشکردوە، "دەوڵەتی تورک دەیەوێت دەسەڵاتی خۆی بۆ 100 ساڵی دیکە درێژ بکاتەوە، بۆیە ئێمەش وەک گەلی کورد دەبێت هەبونی خۆمان بپارێزین و بەرخۆدانی خۆمان بەهێز بکەین، ئەگەر نەتوانین خۆڕاگریی بکەین، لە داهاتودا هەبون و ناسنامەی کورد نامێنیت و توشی کۆمەڵکوژیی و لەناوچون دەبینەوە".
ئەگەر خەونی ئەردۆگان لە ڕۆژئاوا سەرکەوتو بێت، گروپە توندڕەوەکانی سەر بە ئەردۆگان سبەینێ لە دهۆک، هەولێر، سلێمانی و سەرجەم پارچەکانی دیکە ڕادەکشێن و بونی کورد بە تەواوی لە سەر زەوی دەسڕنەوە

 

جەختیشکردەوە، "ئەگەر خەونی ئەردۆگان لە ڕۆژئاوا سەرکەوتو بێت، گروپە توندڕەوەکانی سەر بە ئەردۆگان سبەینێ لە دهۆک، هەولێر، سلێمانی و سەرجەم پارچەکانی دیکە ڕادەکشێن و بونی کورد بە تەواوی لە سەر زەوی دەسڕنەوە، بۆیە تاکە پشتیوان بۆ ڕۆژئاڤای کوردستان و گەلی کورد خۆیەتی".
هەر حزب و لایەنێک، کە خۆی بە پێشەنگ و پارێزەری گەلی کورد دەزانێت، پێویستە گوێ لە شەقام و سەرهەڵدانی گەل لە هەر چوار پارچەی کوردستان بگرێت

 

وتەبێژی کەجەکە لەبارەی یەکدەنگیی گەلی کورد لە بەرامبەر هێرشەکانی تورکیا رونیکردەوە، "گەل بە کردار یەکێتی نەتەوەیی پێکهێنایەوە، بۆیە هەر حزب و لایەنێک، کە خۆی بە پێشەنگ و پارێزەری گەلی کورد دەزانێت، پێویستە گوێ لە شەقام و سەرهەڵدانی گەل لە هەر چوار پارچەی کوردستان بگرێت، هەلومەرج گونجاوە بۆ ئەوەی کۆنفرانسێکی نەتەوەیی ببەسرێت و خەونی هەزاران ساڵەی گەلەکەمان بێتە دی".
بایکۆتی کاڵای تورکی هەنگاوێکی نافەرمانیی مەدەنییە، نیشانەی ئاستی هۆشیاریی کۆمەڵایەتیی و سیاسیی و کلتوریی گەلی باشوری کوردستانە

 

وتەبێژی کەجەکە لەبارەی بایکۆتی کاڵای تورکییەوە کە ئێستا لە هەرێمی کوردستان هەڵمەتێک لەوبارەیەوە دەستیپێکردوەو وتی، "هەنگاوێکی نافەرمانیی مەدەنییە، نیشانەی ئاستی هۆشیاریی کۆمەڵایەتیی و سیاسیی و کلتوریی گەلی باشوری کوردستانە".

رونیشیکردەوە، "ئەو هەنگاوە پێشینەی مێژویی هەیە و لە خەباتی رزگاریی گەلانی ئازادیخواز هەنگاوی لەو شێوەیە هەبوە، بۆ نمونە هیندستان لە سەردەمی غاندیدا بە بایکۆتکردنی کاڵای بریتانیا ئامانجەکانیان بەدی هات، ئەمڕۆش بە هەمان شێوە گەلی کورد لەو ڕێگەیەوە دەتوانێت چۆک بە تورکیا دابنێت".
ئەو چەک و کەرەستەی سەربازییەی، کە تورکیا هێرشی پێدەکاتە سەر ڕۆژئاڤای کوردستان، زۆربەی داهاتەکەی لە باشوری کوردستان بە دەست دێنێت

 

زاگرۆس هیوا وتیشی، "ئەو چەک و کەرەستەی سەربازییەی، کە تورکیا هێرشی پێدەکاتە سەر ڕۆژئاڤای کوردستان، زۆربەی داهاتەکەی لە باشوری کوردستان بە دەست دێنێت، بۆیە هەر کەسێک کاڵایەکی تورکیا بکڕێت، ئەوا دەبێتە تۆپ و فیشەکێک بە سەر منداڵ و پیر و گەلی کورد لە ڕۆژئاڤای کوردستان، هەنگاوی بایکۆت پیرۆزە و پێویستە فراوانتر بکرێت".


Copyright © 2016 Xendan.org all rights reserved

designed and developed by AVESTA GROUP