پەرلەمانتارێک وردەکاری گیانلەدەستدانی ئامانج بابانی، هاوژین و منداڵەکەیان بڵاودەکاتەوە

- 10/22/2019 3:31:00 PM 94525 جار خوێندراوەتەوە

خەندان-

ئەندامێکی پەرلەمانی کوردستان سەبارەت بە گیانلەدەستدانی ئامانج بابانی و هاوژین و منداڵەکەیان راپۆرتێکی بەدواداچونی ئاڕاستەی سەرۆکایەتی پەرلەمان کردوە و رایگەیاندوە، سەرەتای ناکۆکی ئەو دو هاوسەرە لەسەر "تاپۆکردنی ئەو ماڵە بوە کە ئامانج و لانە بەهاوبەشی کڕیویانە، بەڵام ئامانج خانوەکەی کردوە بەناوی خۆیەوە، بەوەش لانە ماڵەوەی جێهێشتوە و داوای جیابونەوەی کردوە".

شەوی 16ی ئەم مانگە، هەردو رۆژنامەنوسی دیاری کوردستان ئامانج بابانی و لانە محەمەد و مناڵە ساواكەیان لە روداوێکدا لە ناو ئۆتۆمبێلەکەی خۆیاندا بەهۆی بەرکەوتنی گوللەوە گیانیان لەدەستدا، دواتریش پۆلیسی رایگەیاند، "روداوەکە خۆکوژی بوە".

سۆران عومەر، ئەندامی پەرلەمانی کوردستان لە یاداشتێکدا کە رۆژی یەکشەممە ئاڕاستەی پەرلەمانی کردوە، تیایدا دەقی بەدواداچونێکی بۆ روداوی گیانلەدەستدانی هەر دو رۆژنامەنوس ئامانج بابانی و لانەی هاوژین و منداڵەکەیانی هاوپێچ کردوە.
ئامانج پێیوتوە ئەگەر لانە لێی جیابێتەوە خۆی و ئەوانیش دەکوژێ، بەڵام بڕوایان نەکردوە کاری وا ئەنجام بدات

 

لە بەشێکی یاداشتەکەدا هاتوە، پورێکی لانە کە لە دەرەوەی وڵات دەژی و بۆ پرسەکەی گەڕاوەتەوە ئاماژەی بەوەکردوە، "ئامانج پێیوتوە ئەگەر لانە لێی جیابێتەوە خۆی و ئەوانیش دەکوژێ، بەڵام بڕوایان نەکردوە کاری وا ئەنجام بدات".

ئەو پەرلەمانتارە لەگەڵ یاداشتەکەیدا ژمارەیەک وێنەی دوای گیانلەدەستدانی ئامانج و هاوژین و منداڵەکەی بڵاوکردەوەتەوە، کە شوێنی گوللە بەسەریانەوە دیارە.
روداوەکە بە کردەوەی خۆکوژی ئامانج و کوشتنی هاوژین و منداڵەکەی لێکدەدرێتەوە

 

ئەوەشی خستوەتەڕو، بە گوێرەی ئاماژە سەرەتاییەکانی لێکۆڵینەوەی پۆلیس "روداوەکە بە کردەوەی خۆکوژی ئامانج و کوشتنی هاوژین و منداڵەکەی لێکدەدرێتەوە"، بۆ ئەو مەبەستەش داوای لیژنەیەکی لێکۆڵینەوەی بێلایەنانەیان کردوە.

پۆلیسی سلێمانی رۆژێک دوای روداوەکە لە کۆنگرەیەکی رۆژنامەوانیدا، عەمید ئاسۆ شێخ تەها، بەڕێوەبەری پۆلیسی سلێمانی رایگەیاند، "بەڵگەکانی پزیشکی دادوەری دەریدەخات روداوەکە خۆکوژی بوە و ئامانج بابانی تەنها یەک گوللە بەسەرییەوە بوە کە لە دوری دو بۆ سێ سانتیم تەقێندراوە".
ئەو چەکەی کردەوەکەی پێ ئەنجامدراوە، دەمانچەیەکە رێگەپێدراو نییە لە بازاڕەکاندا و نرخی لەنێوان 100 بۆ 150 دۆلاردایە

 

ئاماژەی بەوەشکردبو، "ئەو چەکەی کردەوەکەی پێ ئەنجامدراوە، دەمانچەیەکە رێگەپێدراو نییە لە بازاڕەکاندا و نرخی لەنێوان 100 بۆ 150 دۆلاردایە". 

پەرلەمانتارەکەی کوردستان باسی لەوەشکردوە، داواکارە هەڵگرتنی چەک قەدەغە بکرێت چونکە مەترسییەکی گەورەیە هۆکاری ئاسانکردنی تاوانە.

لای خۆشیەوە سەیران عەبدولرەحمان ساڵح، بریكاری تایبەتی رۆژنامەنوس لانە محەمەد لە لێدوانێكی تایبەتدا سەبارەت بە ناكۆكیی ئەو دو رۆژنامەنوسە بە خەندان-ی راگەیاند، "لانە هەمو جارێك وتویەتی ئێمە ناگونجێین پێكەوە، نەگونجانەكەشیان پەیوەندی بە خیانەتی زەوجیەوە، یان كێشەی دارایی نەبو، دواین دانیشتنیان لەگەڵ توێژەری كۆمەڵایەتی بو كە دواتر توێژەرەكە راپۆرتی خۆی بەرزركردەوە و تیایدا نوسیبوی كە باشترین شت جیابونەوەیە".

پارێزه‌ره‌كه‌ی لانه‌ محه‌مه‌د وتیشی، "دوای شەش مانگ جارێكی دیكە لەسەر داوای لانە  لە 10/6/2019 داوای جیابونەوەمان بۆ بەرزكردەوە، لەوماوەیەدا تا كاتی روداوەكە سێ جار دانیشتنی دادگایان هەبو، بەڵام هیچ جارێك ئامانج بابانی بەشداریی دانیشتنەكانی نەكرد".

باسی لەوەشکردبو، "بەڵگەكان دەیسەلمێنن كە روداوەکە خۆكوژی بوە و ئەو كێشانەی لەماوەی رابردودا هەبون پشتڕاستی دەكەنەوە كە خۆكوژی بوە".


Copyright © 2016 Xendan.org all rights reserved

designed and developed by AVESTA GROUP