ڕۆژێک پێشتر پارەی داوەتە رێکخراوەکە
خەندان مەترسیەکی تورکیا بۆ ئەگەری پێدانی بەرتیل بە رێکخراوی (OPCW) ئاشکرا دەکات

- 10/21/2019 10:53:00 PM 23281 جار خوێندراوەتەوە

خەندان-ئاکام محەمەد

لەدو رۆژی رابردودا، راگەیاندنەکانی جیهان و تۆڕە کۆمەڵایەتیەکان پڕ بون لە وێنەی ناخهەژێنی چەند کوردێکی رۆژئاڤا کە بەهۆی بۆردەمانەکانی تورکیاوە بە شێوەیەکی زۆر سامناک زامدار بوبون، لە بابەتێکی بنکۆلکاری خەنداندا گومانی پێدانی بەرتیل بە رێکخراوی قەدەغەکردنی چەکی کیمیایی(OPCW) بۆ پەردەپۆشکردنی روداوەکە خراوەتەڕو.
کەڕم، کوێرم و نابیستم-یان هەڵبژاردوە و قڵاوقەپیان کردوە

 

تا ئێستا بە فەرمی هیچ وڵاتێک ئیدانەی ئەو هیرشانەی نەکردوە، لەبەرامبەردا "کەڕم، کوێرم و نابیستم"یان هەڵبژاردوە و قڵاوقەپیان کردوە.
Image result for three wise monkeys gif

بێدەنگبونی وڵاتانی جیهان لەکاتێکدایە، چەندین دەزگای چاودێری مافەکانی مرۆڤی خۆجێی سوریا دڵنیایاندا لەوەی تورکیا چەکی کیمیایی قەدەغەکراوی بەکارهێناوە، ئەوە سەرەڕای ئەوەی رێکخراوی لێبوردنی نێودەوڵەتی باسی لەوە کرد کە ئەگەرێکی لەو جۆرە تاوانی جەنگ دەداتە پاڵ تورکیا.
کاتی پیری، ئەندامی پەرلەمانی ئەوروپا لایخۆیەوە داوا دەکات بەرپرسیاریەتی بەکارهێنای چەکی فسفۆری بدرێتە ئەستۆی تورکیا و لەبەرامەر تاوانی جەنگدا بەرپرسیار بکرێت.

بەوتەی پیری، بەکارهێنانی ئەو چەکە نەک هەر تاوانێکی دڕندانەیە بەڵکو پێشێلکردنی یاسا نێودەوڵەتیەکانیشە.

بەشە تەمومژاویەکە

 

تەنها رۆژێک بەر لە روداوەکە(رێکەوتی 17/10)، رێکخراوی قەدەغەکردنی چەکی کیمیایی(OPCW) رایگەیاندوە، کە پارەیان لە حکومەتی تورکیا وەرگرتوە بۆ باشکردن و بەرەوپیشبردنی تاقیگەکانیان، ئەمەش گومانی زیاتر لە بەکارهێنانی چەکی کیمیای لەلایەن تورکیا و پەردەپۆشکردنی لەلایەن(OPCW) تۆختر دەکاتەوە.
تورکیا هاوکاربوە بە پێدانی 30 هەزار یۆرۆ بە رێکخراوی تایبەتی قەدەغەکردنی چەکی کیمایی

 

لە راپۆرتەکەی 17 ی مانگی رێکخراوەکەدا هاتوە؛ حکومەتی تورکیا هاوکاربوە بە پێدانی 30 هەزار یۆرۆ بە رێکخراوی تایبەتی قەدەغەکردنی چەکی کیمایی.

بەگوێرەی راپۆرتەکە گوایە" ئەو پارەیە بۆ باشکردنی ئامێری تاقیگەکانی رێکخراوەکە خەرج دەکرێت".

"هاوکاریەکە لە مەراسێمێکدا بەفەرمیکرا لە بارەگای سەرەکی رێکخراومان بە ئامادەبونی هەر یەکە لە بەرێزان فرناندۆ ئاریاس، بەرێوەبەری گشتی  رێکخرا و بەریز شەعبان دشلی، نێردەی هەمیشەی تورکیا لە رێکخراومان" لە  راپۆرتەکەدا وا نوسراوە.

رێکخراوەکە بەهیچ شێوەیەک ئاماژەی بە جۆری ئامێرەکان و هۆکاری "موحتاجبونی" خۆیان نەداوە لە یارمەتی تورکیا، هاوکات تا ئێستاش رونکردنەوەیان لەوە نەداوە کە بۆچی رۆژێک بەر لەو روداوە ئەو رێککەوتنە مشتومڕاویەیان ئەنجامداوە.
Turkey Contributes € 30,000 to Future OPCW Centre for Chemistry and Technology
رێککەوتنێکی مادی لەو جۆرە لە نێوان تورکیا و رێکخراوەکە، پرسیاری جدی لەسەر رێکخراوەکە و حکومەتی تورکیا دروست دەکات و گومانەکانی بەکارهێنانی چەکی کیمیایی لەلایەن تورکیا قوڵتر دەکاتەوە، لە ئەگەری  پشتراست بونەوەی پێدانی بەرتیلدا نەک تەنها رێکخراوی (OPCW) دەکاتە شەریکە بەش، بەڵکو ئاماژەی گوماناویش لەبەرامبەر قلاوقپبونی کۆمەڵگەی نێودەوڵەتی و وڵاتانی جیهان لە هەمبەر تاوانێکی دڕندەی لەو جۆرە دروست دەکات.

دوای تۆختربونەوەی گومانەکان لەسەر تورکیا نەتەوە یەکگرتوەکان، بڕیاریدا بۆ پێکهێنانی لیژنەیەکی تایبەت بۆ لێکۆڵینەوە لە بەلگەکانی بەکار‌ینانی چەکی کیمیایی قەدەغەکراو لەلایەن تورکیا.

هاوکاری دەیان هەزار دۆلاری تورکیا بۆ رێکخراوێکی دەرەکی لە کاتێکدایە، بەهۆی قوڵبونەوەی ناکۆکیە سیاسیەکانی جیهان لەگەڵ تورکیادا، لە ئێستادا ئەو وڵاتە بەدەست هەڵئاوسانی ئابوری و بێکاری و دابەزینی بەردەوامی بەهای دراوەکەیەوە دەناڵێنێت.

 




Copyright © 2016 Xendan.org all rights reserved

designed and developed by AVESTA GROUP