16 هەزار كیلۆمەتر لە 20 كاتژمێردا
ماوەدرێژترین گەشتی جیهان بە سەركەوتویی ئەنجامدرا

- 10/20/2019 10:40:00 PM 14919 جار خوێندراوەتەوە

خەندان-

ماوەدرێژترین گەشتی فڕۆكەی گەشتیاری كە نزیكەی 20 كاتژمێری خایاند و گەشتەكەش بێ وەستان ئەنجامدرا، بەرەبەیانی ئەمڕۆ یەكشەممە كۆتایی هات.

فڕۆكەیەكی كۆمپانیای كانتاس-ی ئوسترالی ماوەدرێژترین گەشتی جیهانی ئەنجامدا، كە ئێوارەی هەینی رابردو 18-ی تشرینی یەكەم لە فڕۆكەخانەی كێنێدی لە شاری نیویۆرك كاتژمێر 21:27 خولەك بە كاتی ناوخۆ دەستیكرد بە گەشتەكەی، كاتژمێر 07:42 خولەكی بەیانی ئەمرۆ یەكشەممە ئەو فڕۆكەیە گشەتە شاری سیدنی لە ئوسترالیا.

فڕۆكە ئوسترالیە، لە جۆی بوینگ 787 دریمڵاینەر-ە و پاش ئەوەی كاتژمێر و نیوێك لە كاتی دیاریكراوی خۆی بۆ  دەستپێكردنی گەشتەكەی دواكەوتوە، پاشان دەستیكردوە بە گەشتەكەی، كە بە ماوەدرێژتین گەشتی لەوجۆرە هەژماردەكرێت.

ئەو فڕۆكە ئوسترالیە 16 هەزار و 200كیلۆمەتری لەماوەی 19 كاتژمێر و 16 خولەكدا تێپەڕاندوە

ژمارەی سەرنشینانی ناو فڕۆكە گەشتیاریەكە نزیكەی 50 كەس بوە، لەماوەی گەشتەكەشدا ئەو فڕۆكە ئوسترالیە 16 هەزار و 200كیلۆمەتری لەماوەی 19 كاتژمێر و 16 خولەكدا تێپەڕاندوە.

 بە مەبەستی ئەنجامدانی گەشتەكە بە شێوەیەكی سەركەوتو، تا فڕۆكەكە بتوانێت بێ وەستان بەردەوامبێت لە گەشتەكەی و ژمارەی پێوانەیی بشكێنێت، كۆمپانیای كانتاس رێژەی سوتەمەنی فڕۆكەكەی زیادكردوە و ژمارەی سەرنشینان و كەلوپەلی كەمكردوەتەوە.

ئالان جۆیس، بەڕێوەبەری جێبەجێكاری كۆمپانیاكە كە یەكێك بو لە بەشداربوانی گەشتەكە لەوبارەیەوە وتی "ئەمە كاتێكی مێژوییە، بۆ كۆمپانیاكەمان و بۆ فڕۆكەوانی جیهانیش بە هەمانشێوە".

كۆمپانیای كانتاس لە ئێستاد پلانی هەیە گەشتێكی ماوەدرێژترلە شاری لەندەن-ەوە بەرەو شاری سیدنی ئەنجامبدات بێ وەستان، كە پێدەچێت تا كۆتایی ئەمساڵی 2019 ئەو گەشتانە بخرێنە بواری جێبەجێكردنەوە.



Copyright © 2016 Xendan.org all rights reserved

designed and developed by AVESTA GROUP