هەسەدە داوا لە ئەمریکا دەکات فشاربخاتە سەر تورکیا پابەندی ئاگربەست بێت

- 10/19/2019 11:06:00 AM 3739 جار خوێندراوەتەوە

خەندان-

هێزەکانی سوریای دیموکرات (هەسەدە) داوا لە ویلایەتە یەکگرتوەکانی ئەمریکا دەکات فشاربخاتە سەر تورکیا پابەندی ئاگربەست بێت.

هێزەکانی سوریای دیموکرات (هەسەدە) لە راگەیەندراوێکدا رایگەیاندوە، ئەوان پابەندن بەو ئاگربەستەی کە ویلایەتە یەکگرتوەکانی ئەمریکا و تورکیا پێی گەیشتون، داواش لە واشنتۆن دەکات فشار بکاتەسەر تورکیا پابەندی ئاگربەستەکە بن و ئەو وڵاتە ناچاربات، رێگە بە کردنەوەی رێڕەوێکی مرۆیی بۆ بەهاناوەچونی بریندارەکان و لێقەوماوان بدات.
تورکیا بەردەوامە لە شکاندنی ئەو ئاگربەستەی کە لەگەڵ ئەمریکا لەبارەی رۆژئاڤای کوردستانەوە واژۆیان کردوە

 

ئاماژەی بەوەشکردوە، تورکیا بەردەوامە لە شکاندنی ئەو ئاگربەستەی کە 17ی ئەم مانگە لەگەڵ ئەمریکا لەبارەی رۆژئاڤای کوردستانەوە واژۆیان کردوە، تا ئێستا هێرشەکانیان بۆ سەر شەڕڤانان بەردەوامە، تەنانەت رێگە بەوەشنادات رێڕەوێکی مڕۆیی بۆ رزگارکردنی هاوڵاتیانی مەدەنی و بریندارەکان بکرێتەوە کە لە سەرێ کانی گەمارۆ دراون، لەکاتێکدا زیاتر لە 30 کاتژمێر بەسەر راگەیاندنی گرێبەستەکەدا تێپەڕبوە.
17ی ئەم مانگە، شاندی ئەمریکا و تورکیا دوای کۆبونەوەیەکی چوار کاتژمێری لە ئەنقەرەی پایتەختی تورکیا لەبارەی ناوچەی ئارامەوە  گەیشتنە رێککەوتن

 

17ی ئەم مانگە، شاندی ئەمریکا و تورکیا دوای کۆبونەوەیەکی چوار کاتژمێری لە ئەنقەرەی پایتەختی تورکیا لەبارەی ناوچەی ئارامەوە  گەیشتنە رێککەوتن، لە بەرامبەردا تورکیا هێرشەکانی بۆ سەر رۆژئاڤای کوردستان رادەگرێت و هێزەکانی هەسەدەش لەو ناوچانە بە درێژایی 32 کیلۆمەتر دەکشێنەوە.

دوای تەوابونی کۆبونەوە، مایک پێنس، جێگیری سەرۆکی ویلایەتە یەکگرتوەکانی ئەمریکا رایگەیاند، گەیشتونەتە رێککەوتنێک و تورکیا ئۆپەرسیۆنەکەی بۆ سەر باکوری سوریا رادەگرێت.

هەسەدە رونیکردەوە، "سەرەڕای ئەوەی ئەمریکا پابەندی ئەو بەڵێنانەیە کە بە دەوڵەتی تورکیای داوە بۆ وەستاندنی لەشکرکێشییەکەی لەرۆژئاڤای کوردستان، بەڵام لەلایەنی تورکیاوە هیچ بەرەوپێشچونێکی بەرچاو نەبینراوە لە پابەندبونی بە بەڵێنەکانیەوە".


Copyright © 2016 Xendan.org all rights reserved

designed and developed by AVESTA GROUP