بۆ تاوتوێی ئاگربڕەکە ترەمپ و ئەردۆگان پەیوەندیەکی تەلەفۆنیان ئەنجامدا

- 10/18/2019 8:08:00 PM 5434 جار خوێندراوەتەوە

خەندان-

دۆناڵد ترەمپ، سەرۆکی ویلایەتە یەکگرتوەکانی ئەمریکا پەیوەندیەکی تەلەفۆنی لەگەڵ هاوتا تورکەکەی ئەنجامدا و تاوتوێ ئاگربڕکەی رۆژئاڤا و دۆخی سوریایان کرد.

ترەمپ لە تویتێکیدا سەبارەت بە ناوەرۆکی پەیوەندیە تەلەفۆنیەکە وتی"ئەردۆگان پێ وتم تەنها ئاگرێکی کەم بەهۆی گولـلەهاوەن و قەناسە تورکیەکانەوە کەوتوەتەوە و کوژێنراونەتەوە". 

" ئەردۆگان خوازیاری ئاگربڕە و راوەستانی ئۆپەراسێۆنەکانە و کوردەکانیش خوازیاری چارەسەرێکی بنەبڕن..زۆر بەداخەوە کە پیشتر ئەوە روینەدا" ترەمپ وای نوسیوە.

ئەوە لەکاتێکدایە، رەجەب تەیب ئەردۆگان سەرۆک کۆماری تورکیا لە لێدوانێکی رۆژنامەوانیی دا رایگەیاند، لەئێستاوە قۆناغی 120 کاتژمێرەکە کاری پێ دەکرێت.

ئەردۆگان لەبارەی رێککەوتنی تورکیا و ئەمریکا لەسەر دۆخی سوریا رایگه‌یاند، لە ماوەی 120 کاتژمێر یەپەگە لە ناوچەی ئارام دەکشێنەوە.

وتیشی "بەڵێنی ئەوەمان وەرگرت کە ئەم قۆناغە بە سەرۆکایەتی تورکیا و پێکەوە ئەنجامبدەین، بەردەوام لە پەیوەندییدا دەبین، کۆبوونەوەکانی نێوان شاندەکانمان درێژەی دەبێت".

ئاماژەی بەوەشدا، هەر لەبارەی رێککەوتن و ئاگربەست، لەگەڵ سەرۆکی رووسیاش کۆدەبمەوە، رەتیشیکردەوە کە هێزەکانی باکووری سوریا جێبهێڵن و رایگەیاند، "بەگوێرەی رێککەوتنەکە هێزەکانمان ناکشێنەوە".

ئەوەش لە کاتێکدایە، ئەمڕۆ مستەفا بالی، بەرپرسی ناوەندی راگەیاندنی هەسەدە رایگەیاند، تورکیا لە دوێنێ شەوەوە ئاگربەستی شکاندوە و هێرشەکانی بەردەوام کردوە.

ئه‌مڕۆ مستەفالی بالی، بەرپرسی ناوەندی راگەیاندی هێزەکانی سوریای دیموکرات (هەسەدە) لە هەژماری خۆی لە تۆڕی کۆمەڵایەتی تویتەر رایگەیاند، سەرەڕای رێککەوتن بۆ وەستانی جەنگ، بۆردومانی زەمینی و ئاسمانی دەکرێتە سەر شەڕڤانەکان، شوێنی نیشتەجێبونی هاوڵاتیان و نەخۆشخانەی سەرێ کانی.


Copyright © 2016 Xendan.org all rights reserved

designed and developed by AVESTA GROUP