هەڕەشەی لە خێزانەكەی كردوە گەر سكاڵا بكەن لە وڵات دەریاندەكات
پیاوێكی تورك منداڵێكی 13 ساڵی سوریی رفاندوە و چەندین رۆژ دەستدرێژی سێكسی كردوەتەسەر

- 10/18/2019 7:38:00 PM 21178 جار خوێندراوەتەوە

خەندان-

پیاوێكی تەمەن 35 ساڵی تورك، بە تۆمەتی ڕفاندن و ئەنجامدانی دەستدرێژی سێكسی بۆ سەر منداڵێكی تەمەن 13 ساڵی بە رەگەز سوری، لە ناوچەی ئارناڤیتكیۆی شاری ئیستانبوڵ دەستبەسەركرا.

ئاژانسە هەواڵیەكانی توركیا بڵاویانكردەوە، لە جەژنی قوربانی پێشودا، پیاوێكی تورك بە ناوی (ج.چ) لە توركیا كچێكی 13 ساڵی بە رەگەز سوری ڕفاندوە، كە ئەو كچە و خێزانەكەی پەنابەربون و لە خانوی (ج.چ)دا كرێچی بون.

باوكی كچەكە پێی راگەیاندوە "كچەكەی هێشتا منداڵە" و داواكاریەكەی رەتكردوەتەوە

بە گوێرەی ئەو زانیاریانەی خراونەتە بەردەست، ئەو خێزان سوریە كە پەنابەربون لە توركیا، لەكاتێكدا كرێچی ج.چ بون، ج.چ داوای لە باوكی كچە منداڵەكە كردوە هاوسەرگیری لەگەل كچەكەیدا بكات، بەڵام باوكی كچەكە پێی راگەیاندوە "كچەكەی هێشتا منداڵە" و داواكاریەكەی رەتكردوەتەوە.

بە زیانگەیاندن بە خێزانەكەی و دەركردنیان لە وڵات هەڕەشەی لە منداڵەكە كردوە

پارێزەری دۆسیەكەش بە ناوی ئیمامئۆغوڵڵەر- لەوبارەیەوە رایگەیاند "داواكاریەكەی رەتكراوەتەوە، لە جەژنی قورباندا و لەكاتێكدا بێجگە لە كچەكە هیچ كەسێك لە ماڵەوە نەبوە، تۆمەتبارەكە دوبارە چوەتەوە ماڵی كرێچیەكەی و بە زیانگەیاندن بە خێزانەكەی و دەركردنیان لە وڵات هەڕەشەی لە منداڵەكە كردوە".

تۆمەتبارەكە، پاش ئەو هەڕەشانە كچەكەی بەزۆر لە ماڵەوە بردوەتە دەرەوە و خستویەتیە ناو ئۆتۆتمبیلەكەی و بردویەتی بۆ ماڵی یەكێك لە كەسەكانی خۆی، دواتریش هەر لە ماڵی ئەو خزمەی یەكەمجار دەستدرێژی سێكسی كردوەتە سەر كچە منداڵەكە.

ماوەی 15 رۆژ بەندی كردوە و دەستدرێژی سێكسی كردوەتەسەری

بەپێی وتەكانی پارێزەرەكە، دوای ئەوەی لە ماڵی خزمەكەی دەستدرێژی كردوەتە سەر كچەكە، تۆمەتبار ئەو كچەی لە ئیستانبوڵەوە بەرەو سینۆپ رفاندوە و لەوێش بۆ ماوەی 15 رۆژ بەندی كردوە و دەستدرێژی سێكسی كردوەتەسەری".

ئەو تۆمەتبارە تەنها بەڕفاندن و دەستدرێژی كردنەسەر كچە سوریەكەوە نەوەستاوە، بەڵكو لە سنۆپ پەیوەندی تەلەفۆنی لەگەڵ خێزانە سوریەكەشدا ئەنجامداوە و بە دایك و باوكی وتوە "دەبێت بێدەنگ بن و گەر هەركەسێك لەوبارەیەوە درك بە هیچ بكات، لە وڵات دەریاندەكەنەدەرەوە چونكە ئەوان پشتیان هەیە و كەسوكاریان پۆلیسە، بۆیە دەتوانن ئەو كارە ئەنجامبدەن".

ئەوەش راگەیەندراوە، لە ئێستادا تۆمەتباری روداوەكە لە لایەن پۆلیسەوە دەستبەسەركراوە و بڕیاروایە كچە 13 ساڵانەكەش لە لایەن پزیشكەوە پشكنینی بۆ ئەنجامبدرێت و سەبارەت بە روداوەكە وتەی لێوەردەگیرێت".


نیشانەکردن :

#تورکیا

Copyright © 2016 Xendan.org all rights reserved

designed and developed by AVESTA GROUP