بەڕێوەبەرایەتی خۆسەر بانگەوازێکی بەپەلە ئاڕاستەی کۆمەڵگەی نێودەوڵەتی دەکات

- 10/17/2019 3:12:00 PM 16248 جار خوێندراوەتەوە

خەندان-             

بەڕێوەبەرایەتی خۆسەری رۆژئاڤای کوردستان بانگەوازێکی بەپەلە ئاڕاستەی کۆمەڵگەی نێودەوڵەتی دەکات و داوای کردنەوەی رێڕەوێکی مرۆیی دەکات بۆ رزگارکردنی هاوڵاتیانی مەدەنی و بریندارەکانی سەرێ کانی، کە بەهۆی بۆردومانەکانی تورکیاوە گەمارۆ دراون.
بەهۆی بۆردومانەکانی سوپای تورکیا لە سەرێ کانی ژمارەکی زۆر لە هاوڵاتیانی سڤیل گەمارۆ دراون

 

بەڕێوەبەرایەتی خۆسەری رۆژئاڤای کوردستان ئەمڕۆ پێنجشەممە بانگەوازێکی بەپەلەی بڵاوکردەوە و رایگەیاندوە، "هێرشەکانی سوپای تورکیا بۆ سەر رۆژئاڤای کوردستان نۆیەمین رۆژی تەواوکرد، لە بۆردومانەکانی سوپای تورکیا لە سەرێ کانی ژمارەکی زۆر لە هاوڵاتیانی سڤیل گەمارۆ دراون".
لە هێرشەکاندا چەکی قەدەغەکراوی وەک فسفۆڕ، ناپاڵم و چەندەها چەکی قورسی زەمینی و ئاسمانی بەرامبەر هاوڵاتیانی سڤیل بەکارهێنراون

 

ئاماژەی بەوەشکردوە، لە هێرشەکاندا چەکی قەدەغەکراوی نێودەوڵەتی وەک فسفۆڕ و ناپاڵم و چەندەها چەکی قورسی زەمینی و ئاسمانی بەرامبەر هاوڵاتیانی سڤیل بەکارهێنراون.
بەهۆی بۆردومانەکانی سوپای تورکیاوە، ژمارەیەکی ئێجگار زۆر لە هاوڵاتیانی سڤیل شەهیدبون

 

هەر لەبەیاننامەکەدا ئاماژە بەوەشکراوە، بەهۆی بۆردومانەکانی سوپای تورکیاوە، ژمارەیەکی ئێجگار زۆر لە هاوڵاتیانی سڤیل شەهیدبون و بەدەیان هاوڵاتی دیکەش لە ژن و پیر و منداڵ برینداربون.

بەڕێوەبەرایەتی خۆسەری رۆژئاڤای کوردستان داوا لە کۆمەڵگای نێودەوڵەتی، رێکخراوەکانی مافی مرۆڤ، وڵاتانی عەرەبی و روسیا دەکات بەپەلە بەهانای هاوڵاتیانی سەرێ کانی بچن، رێڕەوێکی مرۆیی بۆ رزگارکردنی هاوڵاتیانی مەدەنی بکەنەوە و تورکیا لەو کۆمەڵکوژییە بوەستێنن کە لە رۆژئاڤا ئەنجامیدەدات.


Copyright © 2016 Xendan.org all rights reserved

designed and developed by AVESTA GROUP