ناوەڕۆکی پەیوەندیە تەلەفۆنیەکەی لەگەڵ ترەمپ ئاشکرادەکات
مەزڵوم عەبدی: بەرپرسانی ئەمریکا وتیان ناتوانین شەڕی تورکیا بکەین

- 10/17/2019 1:02:00 PM 20061 جار خوێندراوەتەوە

خەندان-

فەرماندە گشتی هێزەکانی سوریای دیموکرات (هەسەدە) رایگەیاند، تورکیا ماوەی زیاتر لە ساڵێکە ئامادەکاری بۆ هێرشەکانی سەر رۆژئاڤا دەکات و لە دەستپێکی هێرشەکەشدا بەرپرسانی ئەمریکا پێیان وتون ناتوانن شەڕی وڵاتێکی ئەندامی ناتۆ بکەن، دەشڵێت دۆناڵد ترەمپ پێی وتوە، "هەوڵدەدەم هێرشەکان رابگیرێن و سزای زیاتر تورکیاش دەدەم".
دوای تێکشاندی داعش تورکیا هەڕەشەی ئەنجامدانی هێرشیکرد، بۆ رونەدانی ئەوەش بە نێوەنگیری ئەمریکا لەسەر ناوچەی ئارام رێککەوتین

 

مەزڵوم عەبدی، فەرماندە گشتی هێزەکانی سوریای دیموکرات (هەسەدە) لە دیدارێکی رۆژنامەوانیدا لەگەڵ کەناڵی روناهی باسی لەوەشکرد، "دوای تێکشاندی داعش تورکیا هەڕەشەی هێرشکردنەسە سەرمان کرد، بۆ رونەدانی ئەوەش بە نێوەنگیری ئەمریکا لەسەر ناوچەی ئارام رێککەوتین و هێزەکانمان لەسەر سنور کشاندەوە، بەڵام کاتێک تورکیا هێرشیکرد بەرپرسانی ئەمریکا وتیان ناتوانین شەڕی وڵاتێکی ئەندامی ناتۆ بکەین، ئەمریکا بەڵێنەکانی جێبەجێنەکرد".
250 شەڕڤان شەهیدبون کە زۆرینەیان بە بۆردومان فڕۆکە شەهیدبون

 

باسی لەوەشکرد، "سەرەڕای ئەوە هێرشەکان سوپای تورکیا لە رێگەی زەمینی و ئاسمانییەوە بەردەوامە، بەڵام لە ئێستادا لە گرێ سپی، سەرێ کانی، رێگای نێوەدەوڵەتی رەقە-حەسەکە و دوێنێش لە منبج سەرجەم هێرشەکانی سوپای تورکیا و هاوپەیمانی تێکشکێنراون و چەندین تەرمیان هەبوە، لە شەڕڤانانیش 250 شەهیدمان هەبوە کە زۆرینەیان بە بۆردومان فڕۆکە شەهید بون".
ئێمە پێشوتریش رامانگەیاندوە ئەگەر هێرشبکرێتە سەر گەلەکەمان شەڕی دژی داعش بۆ ئێمە دەبێتە کاری دوەم یان سێیەم و ئەرکی یەکەمی ئێمە پاراستنی گەلی خۆمان دەبێت

 

سەبارەت کاریگەری هێرشی تورکیا بۆ لەسەر شەڕی دژی داعش مەزڵوم عەبدی وتی، "ئێمە پێشوتریش رامانگەیاندوە ئەگەر هێرشبکرێتە سەر گەلەکەمان شەڕی دژی داعش بۆ ئێمە دەبێتە کاری دوەم یان سێیەم و ئەرکی یەکەمی ئێمە پاراستنی گەلی خۆمان دەبێت، باس لەوەش دەکرێت دوای هێرشەکان چەکدارانی داعش چیان لێ بەسەر دێ، من دەڵێم ئێمە بڕیار لەسەر چەکدارنی داعش و خێزانەکانی دەدەین و کە چۆن بیانپارێزین و چۆن هەڵسوکەوت بکەین چونکە ئەوە ئەرکی هەسەدەیە".
من داوام کرد لە کاتێکدا ئێوە هێزەکانتان لە سوریا دەکشێننەوە، با ئەمریکا هێزی خۆی بۆ راگرتنی هێرشەکان بەکار بهێنێت

 

سەبارەت بە ناوەڕۆکی پەیوندییە تەلەفۆنیەکەی لەگەڵ ترەمپدا مەزوڵوم عەبدی ئاماژەی بەوەکرد، "ئیدارەی دۆناڵد ترمپ ویستیان لەسەر ئەوەی هەسەدە چی بکات و چۆن هێرشەکانی سوپای تورکیا رابگیرێن لەگەڵ ئێمەدا قسە بکەن، لەو پەیوەندەیەدا جێگری سەرۆک و راوێژاکارانی ترەمپیش ئامادەبون، من داوام کرد لە کاتێکدا ئێوە هێزەکانتان لە سوریا دەکشێننەوە، با ئەمریکا هێزی خۆی بۆ راگرتنی هێرشەکان بەکار بهێنێت و هەوڵ بدات ئارامی بۆ سوریا بگەڕێتەوە، چونکە لە ئێستادا مەترسی داگیرکردن لەسەر کۆبانی و ناوچەکانی دیکەش هەیە".
لەگەڵ ئەردۆغان قسە دەکەم و هەوڵ دەدەین هێرشەکان رابگرین، هەروەها سزای زیاتر بەسەر تورکیادا دەسەپێنین

 

لە وەڵامیشدا ترەمپ وتی، "لەگەڵ ئەردۆغان قسە دەکەم و هەوڵ دەدەین هێرشەکان رابگرین، هەروەها سزای زیاتر بەسەر تورکیادا دەسەپێنین".
رێککەوتنی ئێمە لەگەڵ رژێم هەنگاوێکی پێویست بو بۆ پاراستنی گەلەکەمان و رێگیری لە هێرشەکانی تورکیا

 

سەبارەت بە رێککەوتن لەگەڵ رژێمی سوریا و روسیا عەبدی ئەوەی خستوەتەڕو، "رێککەوتنی ئێمە لەگەڵ رژێم هەنگاوێکی پێویست بو بۆ پاراستنی گەلەکەمان و رێگیری لە هێرشەکانی تورکیا، بەڵام رێککەوتنەکە سیاسیی نیە و تەنها سەربازییە کە بریتیە لە هاوکاری هەسەدە و سوپای سوریا بۆ پاراسنی سنورەکان".
داوکاریمان لە هێزە کوردییەکان ئەوەیە هەڵوێستی رونیان بەرامبەر هێرشە داگیرکارییەکان تورکیا هەبێت

 

سەبارەت بە کاردانەوەکان و هەڵویستی لایەنە کوردییەکانیش، فەرماندە گشتی هەسەدە رونیکردەوە، "داوکاریمان لە هێزە کوردییەکان ئەوەیە هەڵوێستی رونیان بەرامبەر هێرشە داگیرکارییەکان تورکیا هەبێت و ئەو لایانە کوردیانەی لەناو ئۆپۆزسیۆنی سوریادان هەڵوێستی داژایەتیکردنی هێرشەکان بەرامبەر گەلەکەیان بە رونی دەرببڕن و بێ دەنگ نەمێنن".


Copyright © 2016 Xendan.org all rights reserved

designed and developed by AVESTA GROUP