هەواڵی ئەمڕۆ

بەپەلە

بەڕێوەبەری پۆلیسی سلێمانی: بە بەڵگەوە روداوەکە خۆکوژی بوە
پۆلیس وردەکاری گیانلەدەستدانی ئامانج بابانی و هاوژین و منداڵەکەی بڵاوکردەوە

- 10/17/2019 12:07:00 PM 28456 جار خوێندراوەتەوە

خەندان-

بەڕێوەبەری پۆلیسی سلێمانی رایگەیاند، بەپێی راپۆرتی پزیشکی روداوەکەی شەوی رابردوی شاری سلێمانی کە تیایدا ئامانج بابانی و هاوژین و منداڵەکەی گیانیانلەدەستدا "خۆکوژییە".

شەوی رابرو هەردو رۆژنامەنوسی دیاری کوردستان ئامانج بابانی و لانە محەمەد و مناڵە ساواكەیان لە روداوێکدا لە ناو ئۆتۆمبێلەکەی خۆیاندا بەهۆی بەرکەوتنی گوللەوە گیانیان لەدەستدا، شەوی رابردوش خەندان وەک یەکەمین دامەزراوەی میدیایی بڵاویکردەوە کە "روداوەکە خۆکوژییە".
ئامانج بابانی تەنها یەک فیشەک بەسەرییەوە بوە کە لە دوری دو بۆ سێ سانتیم تەقێندراوە

 

عەمید ئاسۆ شێخ تەها، بەڕێوەبەری پۆلیسی سلێمانی ئەمڕۆ لە کۆنگرەیەکی رۆژنامەوانیدا رایگەیاند، "بەڵگەکانی پزیشکی دادوەری دەریدەخات روداوەکە خۆکوژی بوە و ئامانج بابانی تەنها یەک فیشەک بەسەرییەوە بوە کە لە دوری دو بۆ سێ سانتیم تەقێندراوە".
منداڵەکەیان سێ گوللەی بەرکەوتوە، لانە محەممەدی هاوژینی دو گوللە و خۆیشی یەک گوللەی بەرکەوتوە

 

ئاماژەی بەوەشکرد، "منداڵەکەیان سێ گوللەی بەرکەوتوە، لانە محەممەدی هاوژینی دو گوللە و خۆیشی یەک گوللەی بەرکەوتوە". 
تەقە لە ئۆتۆمبێلەکەی نەکراوە، تەقەکان لەنێو ئۆتۆمبێلەکەدا کراون و قەوانەکانی تێدا ماون

 

بەڕێوەبەری پۆلیسی پارێزگای سلێمانی وتیشی، "تەقە لە ئۆتۆمبێلەکەی نەکراوە، تەقەکان لەنێو ئۆتۆمبێلەکەدا کراون و قەوانەکانی تێدا ماون".
ئەو چەکەی کردەوەکەی پێ ئەنجامدراوە، دەمانچەیەکە رێگەپێدراو نییە لە بازاڕەکاندا و نرخی لەنێوان 100 بۆ 150 دۆلاردایە

 

بەڕێوەبەری پۆلیسی سلێمانی دەشڵێت، "ئەو چەکەی کردەوەکەی پێ ئەنجامدراوە، دەمانچەیەکە رێگەپێدراو نییە لە بازاڕەکاندا و نرخی لەنێوان 100 بۆ 150 دۆلاردایە". 
ئامانج بابانی و لانە محەمەدی هاوژینی کێشەی خێزانییان هەبوە، لانە محەمەد سکاڵای هەبوە و پێشتر دوجار چونەتە دادگا

 

عەمیید ئاسۆ شێخ تەها وتیشی، "ئامانج بابانی و لانە محەمەدی هاوژینی کێشەی خێزانییان هەبوە، لانە محەمەد سکاڵای هەبوە و پێشتر دوجار چونەتە دادگا، بڕیاریش بووە، 20ی ئەم مانگە دانیشتنی دادگایان لەبارەی دۆسیەکەیانەوە هەبێت".
 
لەبارەی تۆمارکردنی سکاڵا لەسەر دۆسیەکە، بەڕێوەبەری پۆلیسی سلێمانی وتی، "تاوەکو ئێستا هیچ کەس سکاڵای تۆمارنەکردوە، لێکۆڵینەوەکانیش لە روداوەکە بەردەوامن".


Copyright © 2016 Xendan.org all rights reserved

designed and developed by AVESTA GROUP