بەپەلە

کۆماریەکان: کشانەوەکە پێچەوانەی بەرژەوەندییەکانی ئەمریکایە
رۆیتەرز: کوردەکانی هاوپەیمانی پێشوی ئەمریکا داوای هەنگاوی بەپەلە دەکەن

- 10/15/2019 9:34:00 AM 13735 جار خوێندراوەتەوە

خەندان-

ئاژانسی هەواڵی رۆیتەرز لە راپۆرتێکدا ئاماژەی بە دوا گۆڕانکارییەکانی سوریا دەکات و کورد بە هاوپەیمانی پێشوی ئەمریکا وەسف دەکات، کە واشنتۆن لە بەرامبەر هێرشەکانی تورکیا و گروپەکانی ئۆپۆزسیۆن دەستبەرداریان بوە، دەشڵێت، بەرادەستکردنی ئەو ناوچانەش بە رژێمی سوریا، ئەسەد گەورەترین سەرکەوتنی بە دەستهێناوە و توانی بە هاوکاری روسیا دەسەڵاتی خۆی بەسەر تەواوی سوریدا بسەپێنێت.

لە راپۆرتەکەدا ئاژانسی هەواڵی رۆیتەرز هاتوە، لە چەند رۆژی رابردودا ترەمپ داوای وەستاندنی هێرشەکانی لە ئەردۆغان کردوە، بەڵام کشانەوەی هێزەکانی ئەمریکا لە سوریا خۆی ئاماژەیە بۆ هەڵکردنی گڵۆپی سەوز لە لایەن ئیدارەی ترەمپەوە بۆ هێرشەکان.

سزاکان بەس نین

مایک پێنس، جێگری سەرۆکی ئەمریکا بە رۆژنامە نوسانی راگەیاندوە، "بە ئاسانی هێرشە داگیرکارییەکانی تورکیا بۆ سەر سوریا بەسەرماندا تێناپەڕێت، ئێمە داوای وەستانی توندوتیژییەکان دەکەین بۆ ئەوەی گفتوگۆکان دەستپێبکەنەوە".

دوێنێش ترەمپ لە بەرامبەر هێرشەکانی سوپای تورکیادا بە بەهای 100 ملیار دۆلار باجی بەسەر ستیلی هەناردەکراوی ئەو وڵاتەدا سەپاند و حکومەتی ئەمریکاش باجی بەسەر وەزیرانی دەرەوە، بەرگری و ناوخۆی تورکیادا سەپاندوە، بەڵام دیموکراتەکانی ئەمریکا رەخنە لە بڕیارەکان دەگرن و دەڵێن "ئەو سزایانە بەس نین".

کورد هاوپەیمانی پێشوی ئەمریکا

بە گوێرەی راپۆرتەکەی رۆیتەرز، کوردانی سوریا کە بە "هاوپەیمانی پێشوی ئەمریکا" ناوی هێناون، جارێکی دیکە داوای بەپەلە وەستاندنی هێرشەکانی تورکیایان لە واشنتۆن کردووە و کشانەوەی ئەمریکایان بە "خیانەت" بەرامبەریان وەسفکردوە.

یەکشەممەی رابردو 13ی ئەم مانگە، میدیای فەرمی حکومەتی سوریا بڵاویکردەوە، هێزەکانی حکومەتی سوریا چونەتە ناوشاری منج و باکوری حەلەب و ناوچەی تل تەمر، هەروەها رێگای سەرەکی نێوان رۆژئاوا و رۆژهەڵاتی سوریایان کۆنتڕۆڵکردوە، کە 30  کیلۆمەتر لە سنور دورە.

هاوکات هێزەکانی تورکیاش بەدرێژایی سەدان کیلۆمەر لەسەر سنور جێگیرکراون، بڵاوبونەوەی هێزەکانی ئەسەدیش لەو ناوچانە بە سەرکەوتنێکی گەورە بۆ دیمەشق و مۆسکۆی هاوپەیمانی دادەنرێت کە زۆرینەی خاکەکەیان کۆنتڕۆڵکردووە. 

بڕیارەکەی ترەمپ مایەی نیگەرانییە

سەرۆکی زۆرینەی کۆمارییەکانی کۆنگرێسیش کە بە پشتیوانێکی بەهێزی ترەمپ دادەنرێت نیگەرانی خۆی لە بڕیارەکانی ترەمپ لە سوریا دەربڕی و ئاماژەی بەوەشکردوە، کشانەوەی لەو شێوەیە روبەرێکی فراوانی ئەو وڵاتە دەداتە ئێران و روسیا، ئەوەش "کارەساتە بۆ بەرژوەندییە ستراتیژییەکانی ئەمریکا".

لە راپۆرتەکەدا هاتوە، هێزە کوردییەکان توانیان بە پشتیوانی ئەمریکا لە سەردەمی ئۆباما و دواتریش ترەمپدا توانیان داعش تێکبشکێنن، بەڵام بەدران چیا کورد کە بەرپرسێکی کوردە دەڵێت، دوای ئەوەی ئەمریکا  و هاوپەیمانی دژی داعش دەستبەرداریان بون بەرامبەر هێرشە داگیرکارییەکانی تورکیا، دەبوایە بەدوای بەدیلێکی دیکەدا بگەڕێن و لەگەڵ ئەنقەرە و مۆسکۆ گفتوگۆ بکەن، ئەوەش لە بەرامبەر "رونەدانی کۆمەڵکوژی بەرامبەر گەلەکەمان".

بەرەیەکی نوێ

ئەمڕۆش رەجەب تەیب ئەردۆغان، سەرۆک کۆماری تورکیاش لە ئازەرەبایجانەوە رایگەیاند، ئەوان تا بە دەستهێنانی ئامانجی ئۆپراسیۆنەکانیان بەردەوام دەبن، ئەو هەنگاوەش بەرپرسانی ئەنقەرە روبەڕوی سزای نێودەوڵەتی دەکاتەوە، لەوبارەیەوە مارک ئیسپەر، وەزیری بەگری ئەمریکا ئاماژەی بەوەکردوە، هەفتەی داهاتو هاوپەیمانی باکوری ئەتڵەسی (ناتۆ) لە کۆسمبۆرگ کۆدەبێتەوە و تاوتوێی سزادانی "تاکەکەسی و بە کۆمەڵی" بەرپرسانی تورکیا دەکەن.

هەردو سەرۆکی کۆماری و دیموکراتەکانیش لە کۆنگرێسی ئەمریکا ئەوەیان خستوەتەڕو، پلانی ئەوەیان هەیە سزای تایبەت بەسەر تورکیادا بسەپێن و دەڵێن، بازرگانی لەگەڵ تورکیا بەشێکی بچوکی بازرگانیە بەراورد بە ئەوروپا.


Copyright © 2016 Xendan.org all rights reserved

designed and developed by AVESTA GROUP