ژمارەیەک کەسایەتی سیاسی فرەنسا داوای هەڵوەشاندنەوەی یاری نێوان فرەنسا-تورکیا دەکەن

- 10/14/2019 4:53:00 PM 5342 جار خوێندراوەتەوە

خەندان-

بەهۆی بەردەوامی لەشکرکێشیەکانی تورکیا بۆ سەر رۆژئاڤا، ژمارەیەک کەسایەتی سیاسی فرەنسا داوادەکەن یاری تۆپی پێی نێوان هەڵبژاردەی وڵاتەکەیان بەرامبەر تورکیا کە بڕیارە ئەمشەو ئەنجامبدرێت، هەڵبوەشێنرێتەوە.

ئەو داواکاریەی کەسایەتە فرەنسیەکان، دوای ئەوە هات کە لە چەند رۆژی رابردودا لەسەروبەندی بەردەوامبونی لەشکرکێشیەکانی تورکیا بۆ سەر رۆژئاڤا، یاریزانانی هەڵبژاردەی تورکیا لە یاریەکەیان بەرامبەر بە هەڵبژاردەی ئەلبانیا و دوای تۆمارکردنی گۆڵی بردنەوە لە کۆتا خولەکەکان، سڵاوی سەربازیان کرد.

لەدوای کۆتایهاتنی یاریەکەش، هەڵبژاردەی نیشتیمانی تورکیا لە پێگەی فەرمی خۆی لە تویتەر وێنەیەکی بڵاوکردەوە تیایدا دەردەکەوت کە سەرجەم ستافی هەڵبژاردەکە و یاریزانان بە هەمان شێوە وێنەیەکیان چرکاندوە و لەسەر وێنەکە نوسرابو" سەرکەوتنەکەمان پێشکەش بە سەربازە بوێر و شەهیدەکانمان".

جین لۆک میلۆمچۆن، سەرۆکی پارتی چەپی فرەنسا لە بابەتێکیدا نوسیویوتی" ئەگەر تیمی میلی تورکیا هەمان شت بەرامبەر ئێمەش ئەنجام بدەنەوە، دەبێت چاوەڕوانی ئەوەش بکەن کە وەک سەربازی لەشکری دوژمن لەناو یاریگادا رەفتاریان لەگەڵدا بکەین، ئێمە یاریان لەگەڵدا ناکەین، رۆحی وەرزشیان نیە".

لایخۆشیانەوە، هەڵبژاردەی تۆپی پێی ئەڵمانیا دەنگی خۆی خستە پاڵ دەنگە ناڕازییەكان دژ بە داگیركارییەكەی توركیا كە بۆ سەر كوردانی رۆژئاوای كوردستان ئەنجامی داوە.

بڕیارە ئەمشەو لەچوارچێوەی یاریەکانی پاڵاوتنی یۆرۆی 2020، هەردو هەڵبژاردەی فرەنسا-تورکیا بە یەک بگەن، هەردو تیم یەکی 18خاڵیان کۆکردوەتەوە و بە هاوبەشی پێشەنگی کۆمەڵەی هەشتەمیان گرتوە.


Copyright © 2016 Xendan.org all rights reserved

designed and developed by AVESTA GROUP