رەفعەت عەبدوڵا: جێهێشتنی رۆژئاڤا لە لایەن ئەمریکاوە سپاردنی ناوچەکە بو بە ئاڵۆزی و کێشەى گەورە

- 10/13/2019 10:20:00 PM 799 جار خوێندراوەتەوە

خەندان-

رەفعەت عەبدوڵا، ئەندامى مەکتەبى سیاسى یەکێتى نیشتیمانى کوردستان لەبارەى دۆخى رۆژئاڤاى كوردستان رایگەیاند،"جێهێشتنی رۆژئاڤا لەلایەن هێزەکانی ئەمریکاوە سپاردنی ناوچەکە بو بە ئاڵۆزی و کێشەى گەورە".

رەفعەت عەبدوڵا، ئەندامى مەکتەبى سیاسى یەکێتى نیشتیمانى کوردستان، لە پەیامێکیدا کە دەربارەى دۆخى رۆژئاڤاى کوردستان بڵاویکردوەتەوە رایگەیاند،"پێموایە ئەم جێهێشتنە لە بواری کرداریدا هەڵکردنی گڵۆپی سەوزبو بۆ تورکیا تا دەست بە داگیرکاری رۆژئاڤای کوردستان بکات".

راشیگەیاندوە،"ئەم جەنگە جەنگێکی نابەرامبەرە و شەڕێکی سەپێنراوە بە سەر خاک و ئاوی کوردستاندا، هەرچەندە جێگای دڵخۆشیمانە لە سەرئاستی نێودەوڵەتی ئەم داگیرکاریەیی تورکیا رەتکراوەتەوە بەڵام پێمان وایە دەبێت ئەم دەنگە نارەزایانەی کۆمەڵگای نێودەوڵەتی ،بۆ بڕیارێک بگۆڕێت کە سنور بۆ ئەم کاولکاری و داگیرکاریە دابنێت".

وتوشیەتى،"هەمو دونیا دەبێت لەو پەیامە تێبگات کە کێشەی کورد کێشەیەکی رەوایەو بۆ چارەسەرکردنیشی پێویستە رێگای رەوا بگیرێتە بەر".

راشیگەیاند،"ئەم داگیرکاریەی تورکیا خزمەت بەگیانی برایەتی نەتەوەی تورک و کوردناکات و برینەکانی مێژو هەڵئەداتەوە، کە سەرئەنجام سەقامگیری لە ناوچەکەدا ناهێڵێت".

لە کۆتایى پەیامەکەشیدا وتى،"سەرکەوتوبێت خەباتی رەوای رۆژئاڤا،بۆ بەدیهاتنی ژیانێکی شکۆمەندانە لەسەر زێد و خاکی باوباپیرانمان".


Copyright © 2016 Xendan.org all rights reserved

designed and developed by AVESTA GROUP