سەبارەت بە ئیدانەکردنی لەشکرکێشیەکانی سەر رۆژئاڤا..تورکیا وەڵامی ئیسرائیل دەداتەوە

- 10/11/2019 12:07:00 AM 6354 جار خوێندراوەتەوە

خەندان-

تورکیا بەرپەرچی لێدوان و ئیدانەکانی بنیامین ناتانیاهۆ، سەرۆکوەزیرانی ئیسرائیل دەداتەوە سەبارەت بە لەشکرکیشیەکانی بۆ سەر رۆژئاڤای كوردستان.

فەخرەدین ئالتون، بەڕێوەبەری نوسینگەی راگەیاندن و پەیوەندیەکانی ئەردۆغان وەڵامی توندی نایانیاهۆی دایەوە  و وتی" کۆمەڵیک وشەی بەتاڵی سیاسیەکی نەخوازراو کە چەندین ساڵی زیندانی بەهۆی بەرتیلخۆری و بێ متمانەی چاوەڕوانی دەکات".

ئەو وتانەی ئالتون دوای ئەوە هات، ئەمرۆ  بنیامین ناتانیاهۆ، سەرۆکوەزیرانی ئیسرائیل ئیدانەی توندی لەشکرکێشیەکانی تورکیای کرد بۆ سەر ناوچە کوردنشینەکانی سوریا و وتی" ئامادەین هاوکاری گەلی کوردی جوامێر بکەین".

ئالتون وتیشی"کوردەکانی سوریا، بە 300 هەزار پەنابەری کوردەوە لە ژێر پارێزگاری تورکیادان، ئێمە ئەو ناوچانە لە  تیرۆرستان پاک دەکەینەوە یارمەتی گەڕانەوەی سوریەکان دەدەین"، ئەم وتەیەش لەكاتێكدایە كە دەیان هاوڵاتی سڤیلی كورد لە رۆژئاوای كوردستان بەهۆی بۆردومانی فرۆكەكانی توركیاوە لەماوەی دو رۆژ رابردودا بونەتە قوربانی.

رۆژنامەی تایمز ئۆف ئیسرائیل بە هاوپێچی تویتی فەخرەدین ئالتون ئەم راپۆرتەی بڵاوکردوەتەوە، بەڵام ئەوەی جێگای سەرنجە رۆژنامەکە لە بابەتەکەیدا ناوچەکانی سوریای ژێر دەسەڵاتی هێزە کوردیەکانی بە کوردستانی سوریا ناوبردوە.


Copyright © 2016 Xendan.org all rights reserved

designed and developed by AVESTA GROUP