نیویۆرک تایمز: تورکیا هێرشدەکاتە سەر هاوپەیمانەکانی ئەمریکا

- 10/10/2019 12:01:00 PM 3788 جار خوێندراوەتەوە

خەندان -    

رۆژنامەی نیویۆرک تایمز لە مانشێتی سەرەکی ئەمڕۆیدا ئاماژەی بە هێرشەکانی سوپای تورکیا بۆ سەر رۆژئاوای کوردستان کردوە و نوسیویەتی، تورکیا لەشکرکێشی بۆ سەر کوردەکانی رۆژئاڤا ئەنجامداوە، کە هاوپەیمانێکی گرنگی ویلایەتە یەکگرتوەکانی ئەمریکابون لە شەڕی داعشدا.

رۆژنامەی نیویۆرک تایمز مانشێتی سەرەکی ئەمڕۆی تەرخانکردوە بە لەشکرکێشییەکانی سوپای تورکیا بۆ سەر هێزەکانی سوریای دیموکرات (هەسەدە) لە رۆژئاوای کوردستان و نوسیویەتی، لەکاتێکدا کە فڕۆکە شەڕکەرەکانی تورکیا بۆردومانی ناوچەکانی باکوری سوریایان دەکرد، گرژیی و ئاڵۆزی و نێگەرانییەکی زۆر لە واشنتۆن دروست بوە.

ئاماژەی بەوەشکردوە، هەرچەندە دۆناڵد ترەمپ، سەرۆکی ویلایەتە یەکگرتوەکانی ئەمریکا کۆمەڵێک بریاری دژ بەیەکی بڵاوکردەوە، بەڵام ئەم هەڵوێستەی لەلایەن کۆنگرێس و هاوپەیمانە کۆماریەکانیشییەوە روبەڕوی رەخنەی زۆربوەوە.

لە راپۆرتەکەدا هاتوە، دۆناڵد ترەمپ هەرچەندە لە دوای پەیوەندیە تەلەفۆنیەکەیدا لەگەڵ رەجەب تەیب ئەردۆغان، سەرۆک کۆماری تورکیا رەزامەندی دەربڕی دەربارەی کشانەوەی هێزەکانی ئەمریکا لەباکوری سوریا، بەڵام دیسانەوە سوپای ئەمریکا و وەزارەتی دەرەوە دژایەتییەکی زۆری ئەو بڕیارەیانکرد.

دوێنێ چوارشەممە لە دوای چەند کاتژمێرێکی کەم لە دەستپێکردنی بۆردومانەکانی تورکیا بۆ سەر رۆژئاوای کوردستان، وەزارەتی دەرەوەی ئەمریکا ئیدانەی ئەو کارەی کرد و بە "بیرۆکەیەکی خراپ" ناویبرد.


Copyright © 2016 Xendan.org all rights reserved

designed and developed by AVESTA GROUP