سوپای تورکیا بۆردومانی چەند گوندێکی کۆبانێ دەکات

- 10/10/2019 8:37:00 AM 2758 جار خوێندراوەتەوە

خەندان-

ئاژانسی هاوار نیوز بڵاویکردەوە، سوپای تورکیا بۆردومانی گوندی ئاشمە لە رۆژئاوای کۆبانێ دەکات کە گۆڕی سلێمان شای تێدایە.

ئاژانسەکە لە هەواڵێکی بەپەلەدا باسی لەوەشکردوە، سوپای تورکیا بۆردومانی چەند گوندێکی لە رۆئاوای کۆبانی کردوە و لەلایەن شەڕڤانانی هەسەدەوە وەڵامدراونەتەوە.

ئاماژە بەوەشکراوە، بۆردومانەکانی سوپای تورکیا سنوری نێوان گوندەکانی سفتەک، بوبان، زۆر مغار، زیارە و ئاشمەی گرتوەتەوە و بۆردومانەکەش بە شێوەی پچڕپچڕ بەردەوامە.

سەرچاوەیەکی ناوخۆی بە ئاژانسەکەی راگەیاندوە، گوندی ئاشمە لە رۆئاوای کۆبانێ کە گۆڕی سلێمان شای تێدایە روبەڕوی هێرشێکی چڕی بۆردومانەکانی سوپا بوەتەوە.

دوێنێ رەجەب تەیب، ئەردۆغان، سەرۆک کۆماری تورکیا دەستپێکردنی ئۆپەرسیۆنی سەربازی بۆ سەر رۆژئاوای کوردستان راگەیاند، ئەوەش سەرەڕای هۆشداریەکانی کۆمەڵگەی نێودەوڵەتی.

بڕیارە ئەمڕۆ ئەنجومەنی ئاسایشی نێودەوڵەتی لەبارەی ھێرشەكەی توركیا بۆ سەر رۆژئاوای كورستان كۆببێتەوە.

چاوەڕان دەكرێت ئەنجومەنەكە بڕیارێك لەبارەی هێرشەکەی سوپای تورکیاوە لە بەرژەوەندی كورد و دژی توركیا دەربكات.

یەکینەکانی پاراستنی گەل(یەپەگە) ئاماری کوژراو و بریندارەکانی شەوی رابردوی هێرشەکانی بڵاوکردەوە، بەگوێرەی ئامارەکەی یەپەگە تا ئێستا پێنج گەریلای یەپەگە و سێ هاوڵاتی دیکەی مەدەنی بەهۆی بۆردومانی فڕۆکە جەنگییەکانی تورکیا لە چەند ناوچەیەکی جیاوازی رۆژئاڤا گیانیان لەدەستداوە.


Copyright © 2016 Xendan.org all rights reserved

designed and developed by AVESTA GROUP