ئەمریکا: گڵۆپی سەوزمان بۆ هێرشەکەی تورکیا هەڵنەکردوە

- 10/10/2019 8:16:00 AM 5550 جار خوێندراوەتەوە

خەندان-

مایک پۆمپیۆ، وەزیری دەرەوەی ویلایەتە یەکگرتوەکانی ئەمریکا رایگەیاند، گڵۆپی سەوزیان بۆ هێرشەکەی تورکیا هەڵنەکردوە، بەڵام "مەترسییە ئەمنییەکانی تورکیا لە جێگەی خۆیدایە".

مایک پۆمپیۆ، وەزیری دەرەوەی ویلایەتە یەکگرتوەکانی ئەمریکا بە کەناڵی BBC راگەیاندوە، ئەوان گڵۆپی سەوزیان بۆ تورکیا بە ئامانجی هێرشکردنە سەر سوریا هەڵنەکردوە، بەڵام ئەنقەرە "هەندێک مەترسی ئەمنی هەیە و لە جێگەی خۆیدایە".

باسی لەوەشکردوە، دۆناڵد ترەمپ، سەرۆکی ئەمریکا بڕیاردایەوە بە کشانەوەی سەربازە ئەمریکییەکان لە ناوچەکە.

سەبارەت بە ئەگەری سەر هەڵدانی داعش بەهۆی هێرشەکانی تورکیا، وەزیری دەرەوەی ئەمریکا وتی، بە دووری دەزانن جارێکی دیکە داعش سەر هەڵبداتەوە.

دوێنێ رەجەب تەیب، ئەردۆغان، سەرۆک کۆماری تورکیا دەستپێکردنی ئۆپەرسیۆنی سەربازی بۆ سەر رۆژئاوای کوردستان راگەیاند، ئەوەش سەرەڕای هۆشداریەکانی کۆمەڵگەی نێودەوڵەتی.

بڕیارە ئەمڕۆ ئەنجومەنی ئاسایشی نێودەوڵەتی لەبارەی ھێرشەكەی توركیا بۆ سەر رۆژئاوای كورستان كۆببێتەوە.

چاوەڕان دەكرێت ئەنجومەنەكە بڕیارێك لەبارەی هێرشەکەی سوپای تورکیاوە لە بەرژەوەندی كورد و دژی توركیا دەربكات.

یەکینەکانی پاراستنی گەل(یەپەگە) ئاماری کوژراو و بریندارەکانی شەوی رابردوی هێرشەکانی بڵاوکردەوە، بەگوێرەی ئامارەکەی یەپەگە تا ئێستا پێنج گەریلای یەپەگە و سێ هاوڵاتی دیکەی مەدەنی بەهۆی بۆردومانی فڕۆکە جەنگییەکانی تورکیا لە چەند ناوچەیەکی جیاوازی رۆژئاڤا گیانیان لەدەستداوە.
 


Copyright © 2016 Xendan.org all rights reserved

designed and developed by AVESTA GROUP