پلەیستەیشن-5 لە كۆتایی ساڵی 2020دا بڵاودەكرێتەوە

- 10/8/2019 8:45:00 PM 4286 جار خوێندراوەتەوە

خەندان-

كۆمپانیای سۆنی بۆ یاریە ئەلیكترۆنیەكان لە نوێترین بڵاوكراوەیدا مزگێنی دایە هەوادارانی یاری ئەلیكترۆنی پلەیستەیشن و رایگەیاند، وەشانی پێنج-ی ئەو بەرهەمە لە كۆتایی ساڵی 2020دا بڵاودەكرێتەوە.

پێگەی تایبەتی پلەیستەیشن لە هەژماری تایبەتی خۆی لە تۆڕی كۆمەڵایەتی تویتەر رایگەیاند، لە پشوی كریسمز-ی ساڵی داهاتو (2020)دا، كە دەكاتە 25ی كانونی یەكەم، وەشانی پێنجەمی پلەیستەیشن بە ناوی پلەیستەیشتن-5 دەخرێتە بازاڕەوە.

لەوبارەیەوە جیم رایان، بەرپرسی گشتی و بەڕێوەبەری جێبەجێكاری كۆمپانیای سۆنی، بەشی یاریە ئەلیكترۆنیەكان ئاماژەی بەوەكردوە "بە شانازیەوە دەڵێم نەوەی پێنجەمی بەهەرمەكەمان پێی دەوترێت پلەیستەیشن-پێنج و لە پشوی سەری ساڵی 2020دا بڵاویدەكەینەوە".

وتیشی، ئەو نوێكاریانەی لە نەوەی داهاتوی پلەیستەیشندا كراوە، گۆڕانكاری زۆر مەزن نین، بەڵام ویستمان ئەو بەرهەمە بە شێوەیەكی نوێ بخەینە بەردەست هەوادارانی بەرهەمەكەمان و لەبارەی وەشانە نوێیەكەیەوە چەند زانیاریەك دەخەینەڕو.

راشیگەیاندوە "یەكێك لە ئامانجەكانمان ئەوەیە سیستەمی هەستەوەر بخەینە دەسكی پلەیستەیشنەكەوە، تا لەكاتی یاریكردندا لەگەڵ هەستی بینینی یاریەكە بەكارهێنەر هەست بە زەبر و جوڵەكانیش بكات لەرێگەی لەرینەوەی دەسكەكانەوە".

سەبارەت بە چۆنیەتی جێگیركردنی ئەو سیستەمە، رایان دەڵێت "هەوڵدەدەین لەرێگەی جێگیركردنی تەكنەلۆجیای رەمبڵ-ەوە، بە شێوەیەكی ئاستبەرز سیستەمی جوڵە و لەرەلەر دابنێین، بە شێوەیەك (پێكداكێشانی ئۆتۆمبێلێك و دیوارێك زۆر جیاوازتربێت لە كەوتنێك لە مەیدانی یاری تۆپی پێدا".

بە گوێرەی جیم رایان، تەنانەت لەرەلەری رۆشتن بەسەر گژ وگیا، جیاوازترە لە رۆشتن بەسەر قوڕ یاخود خۆڵدا، ئەو تایبەتمەندیەش ناوی تریگەر-ی لێنراوە و خراونەتە ناو هەریەك لە دوگمەكانی L1 و L2.

نیشانەکردن :

#زانستیی

Copyright © 2016 Xendan.org all rights reserved

designed and developed by AVESTA GROUP