خەندان خشتەی نوێی دابەشكردنی موچە بڵاودەكاتەوە

- 10/1/2019 9:37:00 PM 174155 جار خوێندراوەتەوە

خەندان-

سەرچاوەیەک لە وەزارەتی دارایی و ئابوری حكومەتی هەرێم رایگەیاند، لەسەرەتای هەفتەی داهاتو دابەشكردنی موچەی مانگی تەموزی 2019 دەستپێدەكات و دابەشكردنەكەش تا رۆژی پێنجشەممە بەردەوام دەبێت.

سەرچاوەیەک لە وەزارەتی دارایی و ئابوری حکومەتی هەرێم بە خەندان-ی رایگەیاند، بڕیارە یەكشەممەی داهاتو، 6ی تشرینی یەکەم، دابەشكردنی موچەی مانگی تەموزی 2019 دەستپبكات و دیوانی وەزارەتی پێشمەرگە لیواکان موچە وەردەگرن.

وتیشی،"ڕۆژی دووشەممە ڕێکەوتی 7ی تشرینی یەکەم موچەی یەکەكانی 70 و80ی هێزەكانی پێشمەرگە دابەشدەکرێت و رۆژی سێشەممە وەزارەتی پەروەردە موچە وەردەگرێت".

هەر بە گوێرەی سەرچاوەیەكە بڕیارە رۆژانی چوارشەممە و پێنجشەممە 9 و 10 ی تشرینی یەكەم موچەی وەزارەتی دارایی و ئابوری و وەزارەتی تەندروستی دابەشبکرێت.

وەزارەتی دارایی و ئابوری لەمساڵدا نۆ موچەی فەرمانبەرانی دابەشکردوە، سێ موچەیان هی مانگەکانی 10، 11 و 12ی ساڵی رابردو بو، کە بەهۆی "قەیرانی دارایی"یەوە نەدرابو، هەروەها شەش موچەی ئەمساڵیش دابەشکراوە.

وەزارەتی دارایی و ئابوری هەرێمی کوردستان بۆ دابەشکردنی موچە پشتبە دو سەرچاوەی دارایی دەبەستێت، یەکەمیان، فرۆشتنی نەوتی هەرێمی کوردستانە بەشێوەی سەربەخۆ، دوەمیان ناردنی پشکی هەرێمی کوردستانە لە بەغداوە کە مانگانە 522 ملیار دینارە.


Copyright © 2016 Xendan.org all rights reserved

designed and developed by AVESTA GROUP