برازیل؛ هێرشكرایە سەر باڵیۆزخانەی عێراق و تاڵانكرا

- 9/29/2019 9:17:00 PM 17182 جار خوێندراوەتەوە

خەندان-

 

لە برازیل هێرشكرایە سەر باڵەخانەی باڵیۆزخانەی عێراق، دواتریش گەنجینەكەی رفێندرا و بە سەرجەم پارەكە و زانیاریەكانی ناویەوە دزرا.

لە لایەن چەند چەكدارێكەوە هێرشكراوەتە سەر باڵیۆزخانەكە

وەزارەتی دەرەوەی عێراق، لە راگەیەندراوێكیدا كە رێكەوتی 27ی ئەم مانگەی بەسەرەوەیە بڵاویكردەوە "هەینی رابردو 27ی ئەیلول، لە لایەن چەند چەكدارێكەوە هێرشكراوەتە سەر باڵیۆزخانەی عێراق لە برازیل و دواتریش باڵیۆزخانەكەیان تاڵان كردوە".

گەنجینەی تایبەت بە ژمێریاری باڵیۆزخانەكەیان بە تەواوی ئەو پارە و زانیاریانەی تێیدا بوە دزیوە

بە گوێرەی راگەیەندراوەكە، چەكدارەكان پاسەوانی باڵەخانەكەیان دەستبەسەركردوە و دواتر دەرگای سەرەكی و دەرگای سێ نوسینگەی ناو باڵەخانەكەیان شكاندوە، پاشان گەنجینەی تایبەت بە ژمێریاری باڵیۆزخانەكەیان بە تەواوی ئەو پارە و زانیاریانەی تێیدا بوە دزیوە.

ئاماژە بەوەشكراوە، دەستبەجێ پۆلیسی برازیل لە روداوەكە ئاگاداركراوەتەوە و گەیشتونەتە شوێنی مەبەست، لەو كاتەوە تا ئێستا لێكۆڵینەوەكان بەردەوامن، هاوكات لە لایەن پۆلیسەوە پەڕاوێكی تایبەت بۆ روداوەكە كراوەتەوە.



Copyright © 2016 Xendan.org all rights reserved

designed and developed by AVESTA GROUP