خەندان لەزاری بەڕێوەبەری پۆلیسەوە زانیاری لەسەر چارەنوسی كچەكەی هەولێر بڵاودەكاتەوە

- 9/28/2019 5:55:00 PM 172161 جار خوێندراوەتەوە

خەندان -

بەڕێوەبەری پۆلیسی هەولێر زانیاری لەسەر ئەو كچە تەمەن 14 ساڵە ئاشكرادەكات كە كەسوكارەكەی رایانگەیاندبو لە نەخۆشخانەیەك رفێنراوە و دەڵێت،"ئەو كچە نەڕفێنراوە و بەوتەی خۆی لە شاری كەركوكە".

ئەو كچە پەیوەندی پێوە كردوین و پێی راگەیاندوین كە ئەو نەڕفێنراوە و خۆی ماڵەوەی بەجێهێشتوە

 

عەمید عەبدولخالق تەلعەت، بەڕێوەبەری پۆلیسی هەولێر لە لێدوانێكی تایبەتدا بۆ خەندان رایگەیاند،"ئەو كچە پەیوەندی پێوە كردوین و پێی راگەیاندوین كە ئەو نەڕفێنراوە و خۆی ماڵەوەی بەجێهێشتوە".

كچەكە دەنگەكەی لای ئێمە تۆماركراوە، لە وتەكانیدا دەڵێت، پەیوەندی خۆشەویستیم لەگەڵ كوڕێك هەیە

 

سەبارەت بە هۆكاری بەجێهێشتنی ماڵەوە، بەڕێوەبەری پۆلیسی هەولێر وتی،"كچەكە دەنگەكەی لای ئێمە تۆماركراوە، لە وتەكانیدا دەڵێت، پەیوەندی خۆشەویستیم لەگەڵ كوڕێك هەیە، بەڵام ماڵەوە منیان نەداوە بەو كوڕە، بۆیە ماڵەوەم جێهێشتوە".

ئەو كچە پێی راگەیاندوین، ئەگەر ماڵەوە من بدەن بە خۆشەویستەكەم، ئامادەم بگەڕێمەوە

 

عەمید عەبدولخالق تەلعەت وتیشی،"ئەو كچە پێی راگەیاندوین، ئەگەر ماڵەوە من بدەن بە خۆشەویستەكەم، ئامادەم بگەڕێمەوە".

ئێمە قسەمان لەگەڵ كەسوكارەكەی كردوە، پێیان وتوین، با بگەڕێتەوە، ئەو كاتە بڕیار لەسەر داواكارییەكەی دەدەین

 

سەبارەت بە وەڵامی خێزانەكەی بۆ داواكاری كچەكەیان بەڕێوەبەری پۆلیسی هەولێر وتی،"ئێمە قسەمان لەگەڵ كەسوكارەكەی كردوە، پێیان وتوین، با بگەڕێتەوە، ئەو كاتە بڕیار لەسەر داواكارییەكەی دەدەین".

بە وتەی كچەكە ئێستا لە كەركوكە و ئێمە هەوڵ دەدەین بەزوترین كات بیگەڕێنینەوە و چارەسەر بۆ كێشەكەی بدۆزینەوە

 

دەربارەی ئەوەی ئایا ئەو كچە لەئێستادا چوەتە دەرەوەی عێراق و ژیانی پارێزراوە، وتی،"بە وتەی كچەكە ئێستا لە كەركوكە و ئێمە هەوڵ دەدەین بەزوترین كات بیگەڕێنینەوە و چارەسەر بۆ كێشەكەی بدۆزینەوە".

ئەو خێزانە دوژمنایەتیان نییە

 

هەرچەندە خێزانەكە پێشتر رایانگەیاندبو كە دوژمنایەتیان هەیە، بەڵام بەڕێوەبەری پۆلیسی هەولێر وتی،"ئەو خێزانە دوژمنایەتیان نییە".

رۆژی 19/9/2019 كچێكی 14 ساڵ بەناوی (د. ك. م)، لەگەڵ دایكە سكپڕەكەی چونە نەخۆشخانەی ئافرەتان و لەدایكبون لە هەولێر، دوای ئەوەی دەچێتە نێو نەخۆشخانەكە، لە ژورەوە ون دەبێ‌. وەك كەسوكارەكەی ئاماژەیانپێكردوە كە (د) لەگەڵ دایكی و منداڵێكی 10 ساڵان دەچنە نەخۆشخانەكە، بەڵام لە كاتژمێر 12:58ی نیوەڕۆ لەنێو نەخۆشخانەكە دیارناماوە.
 
دوای دو رۆژ و لە رۆژی 21/9/2019 (د) پەیوەندی بە براكەیەوە كردوە و داوای باوكی كردوە، بەڵام دواتر مۆبایلەكەی داخستوە، بە وتەی كەسوكارەكەی چاودێری رەقەمەكەیان كردوە و پەیوەندیەكەی لەناو شاری هەولێرەوە كراوە بەڵام ناو بەناو شوێنەكەی گۆڕاوە.

(س. م)، مامی كچەكە بۆ روداو رایگەیاندوە،"چوار مانگ لەمەوبەر چەند كەسێك كە ئێمە نەماندەناسین و چەكدار و پاسەوانی بەرپرسێكن، هاتنە ماڵمان و گوتیان براكەت لە توركیایە و 10 هەزار دۆلارمان قەرزدارە. داوای بەڵگەمان لێكردن، هیچ بەڵگەیەكیان نەبو، گوتمان سوێند بخۆن، سوێندیشیان نەخوارد و رۆیشتن، زانیمان دەیانەوێت سەرانەمان لێوەربگرن. پێمانوایە دونیا لەلایەن ئەو كەسانەوە رفێنراوە كە پێشتر هاتنە سەرمان. ئەوان چوار مانگ لەمەوبەر ئۆتۆمبێلی برازاكەمیان دزی و تەقەشیان لێكرد. بەڵام لە بازگەی شاوێس دەست بەسەر ئۆتۆمبێلەكەدا گیرا و رادەستی ئێمەیان كردەوە. دو مانگ لەمەوبەر چوونەتە سەر ماڵی براكەم و (د) بەتەنیا لە ماڵەوە بوە، هەڕەشەی دەستدرێژی و كوشتنیان لێكردوە، بۆیە سكاڵامان تۆمار كرد. دادوەر فەرمانی دەستگیركردنی بۆ سێ كەس دەركرد، بەڵام تاوەكو ئێستا دەستگیرنەكراون".
 



Copyright © 2016 Xendan.org all rights reserved

designed and developed by AVESTA GROUP