ئەو منداڵەی بەهۆی پەرتەوازەبونی خێزانەكەی شەوان لەشەقامەكان دەكاتەوە

- 9/23/2019 10:45:00 PM 29170 جار خوێندراوەتەوە

خەندان-بڕیار جەلال

(أ،پ . ع)، ئەو مێرمنداڵەی كە بەهۆی پەرتەوازەبونی خێزانەكەی لە ئێستادا لەسەر شەقامەكانی رانیە شەو و رۆژ بەڕێدەكات، خەندان لەم بەدواداچونەدا تەواوی وردەكاری ژیانی ئیدریس و براكانی دەخاتەرو، وەزیری كارو كاروباری كۆمەڵایەتیش رایدەگەیەنێت،"بەزوترین كات كێشەكەی بۆ چارەسەردەكەین".

دایكی سوتاوە و گیانی لەدەستداوە، باوكیشی بەهۆی كێشەیەكی كۆنەوە كە 20 ساڵ بەسەریدا تێپەڕیبو، لە رۆژی 29/8/2019، دەستگیركرا

 

ئەو منداڵە كە لەئێستادا تەمەنی نزیكەی 13 ساڵە، لە ماوەی رابردودا، دایكی سوتاوە و گیانی لەدەستداوە، باوكیشی بەهۆی كێشەیەكی كۆنەوە كە 20 ساڵ بەسەریدا تێپەڕیبو، لە رۆژی 29/8/2019، دەستگیركرا.

لە راگەیەندراوێكدا پۆلیسی ڕاپه‌ڕین رایگەیاند،"( پ . ع ) له‌دایكبوی ساڵی 1973 پیشه‌ی كاسبە، دانیشتوی قه‌ڵادزێیە، له‌ ساڵی 1999 فه‌رمانی ده‌ستگیركردنی بۆ ده‌رچوه‌، ئه‌و تۆمه‌تباره‌ له‌ ساڵی 1999 ئۆتۆمبێلێكی پێ بوه‌ و پاش گه‌ڕانه‌وه‌ی له‌ بناری قه‌ندیل له‌ نزیك ناحیه‌ی ژاراوه‌ به‌ هۆكارێكی نادیار ئۆتۆمبێله‌كه‌ی وه‌رگه‌ڕاوه‌ و به‌و هۆیه‌شه‌وه‌ ئافره‌تێك گیانی له‌ده‌ستداوه‌ كە سه‌رنشین بوه‌ له‌گه‌ڵیدا، پاشان كه‌سوكاری ئافره‌ته‌كه‌ له‌ هه‌مان ساڵ سكاڵای یاساییان له‌سه‌ر شۆفێره‌كه‌ تۆماركردوە و پاش ئه‌وه‌ی له‌دادگا فه‌رمانی ده‌ستگیركردنی بۆ ده‌رده‌چێ بۆ شوێنێكی نادیار ڕاده‌كات، به‌ڵام دره‌نگانێكی شه‌وی 29/8/2019 له‌ قه‌ڵادزێ لە گه‌ڕه‌كی ڕاپه‌ڕین ده‌ستگیركرا".

لەئێستادا زردایكەكەی چۆتەوە ئێران و كەسوكارەكەشی ئامادەنەبون لەخۆی بگرن

 

(أ) هەرچەندە زڕ دایكی هەبوە، بەڵام بەگوێرەی بەدواداچونەكانی خەندان لەئێستادا زردایكەكەی چۆتەوە ئێران و كەسوكارەكەشی ئامادەنەبون لەخۆی بگرن، بۆیە دو هاوڵاتی شاری رانیە، لەپێناو چارەسەركردنی كێشەكەی، پەیوەندی دەكەن بە خانەی بێسەرپەرشتانی هەولێرو هەوڵ دەدەن (أ) لەگەڵ دوبراكەی لەو دەزگایەی حكومەتی هەرێمی كوردستان سەرپەرشتی بكرێت و چیتر بێ كەسو كارو بێلانە شەوان لە شەقامەكان نەمێنێتەوە.

ماوەی هەفتەیەك دەبێت شەوان لە شەقامەكان دەمێنێتەوە

 

محەمەدی حەلاق، یەكێكە لەو گەنجانەی شاری رانیە، كە سەر كەیسی (أ) قسەی بۆ خەندان كردو رایگەیاند،"(أ) منداڵێكی بێ دایكە و باوكیشی ماوەیەكە خراوەتە زیندانەوە بەهۆی روداوێكی كۆنەوە، ماوەی هەفتەیەك دەبێت شەوان لە شەقامەكان دەمێنێتەوە و ئێمەش لە پێناو چارەسەركردنی كێشەكەی قسەمان لەگەڵ چەند لایەنێكدا كردوە".

لەرابردودا ئازارێكی زۆر دراوە، بۆیە لەئێستادا كە تەمەنی نزیكەی 13 ساڵ دەبێت، تەنانەت ناتوانێت بەباشی قسەش بكات

 

راشیگەیاند،"(أ) منداڵێكی بێدەسەڵات و ئارامە، هیچ نەخۆشییەكی دەرونی نییەو تەنها لەروی جەستەییەوە دەستێكی كێشەی هەیە، لەرابردودا ئازارێكی زۆر دراوە، بۆیە لەئێستادا كە تەمەنی نزیكەی 13 ساڵ دەبێت، تەنانەت ناتوانێت بەباشی قسەش بكات".

بۆ وەرگرتنی ئەم منداڵە زیاتر لە 15 واژۆیان بە من كرد

 

شاكار لێوژەیی، ئەو گەنجەیە كە دوێنێ (أ)ی بردۆتە، خانەی بێسەرپەرشتانی هەولێر، لەو بارەیەوە بە خەندان-ی راگەیاند،"بەداخەوە وەك پێویست بەدەم كەیسی ئەم منداڵەوە نەهاتون، بۆ وەرگرتنی ئەم منداڵە زیاتر لە 15 واژۆیان بە من كرد، من داواملێكردن كە لای خۆیان سەرپەرشتی بكەن، بەڵام پێیان وتم كە ئیدریس خەڵكی رانیەیەو دەببێت ببرێتە سلێمانی و ناتوانن ئەوان لەخۆی بگرن"

شاكار لێوژەیی كە ماوەیەكە بە سەفەر لە بریتانیاوە هاتوەتەوە هەرێمی كوردستان وتیشی،"من دوێنێ لە بەیانییەوە تاكو ئێوارە لەگەڵ (أ) لەخانەی بێسەرپەرشتان بوم، دوای كۆمەڵێك واژۆ گەڕامەوە بۆ رانیە، بەڵام دواتر بینیم (أ) گەڕاوەتەوە بۆ رانیەو لەو خانەیە نەماوە".

ئاماژەی بەوەشكرد، بەداخەوە خانەی بێسەرپەرشتانی هەولێر دەیانگوت ئێمە ئەو منداڵە لەخۆ ناگرین، تەنانەت پەرلەمانتار (زانا مەلا خالید) قسەی لەگەڵ كردن، بەڵام ئەوان هەر سوربون لەسەر ئەوەی وەری ناگرن، (أ) لەوێ دەگریا بۆ براكانی و حەزی دەكرد لەوێ بمێنێتەوە، ئێمەش بۆیە گەڕاینەوە، چونكە هەتا ئێوارە جوابیان نەداینەوە، تەنانەت بە دەركردن دەریانكردین".

لەبەر ئەوەی رانیە سەر بە سلێمانیە، دەتوانێت بچێتە سلێمانی

 

سەبارەت بە كەیسی (أ)، خەندان پەیوەندیكرد بە شێخ زەیتۆ تۆفیق، بەڕێوەبەری چاودێری كۆمەڵایەتی هەولێر، كە خانەی سەرپەرشتانیش بەشێكە لەو بەڕێوەبەرایەتیە، ناوبراو لەو بارەیەوە بە خەندان-ی راگەیاند،"ئەو منداڵە دوێنێ ئێوارە لای ئێمە بوە و گریاوە و وتویەتی دەچمەوە رانیەو دواتر هەڵاتوە، پێشتر 8 ساڵ لای باوكی بوە، ئێستا باوكی گیراوە، خانەی بێسەرپەرشتانی هەولێرو سلێمانی دەرگای لەسەر پشتە بۆ وەرگرتنی ئەم منداڵە، بەڵام لەبەر ئەوەی رانیە سەر بە سلێمانیە، دەتوانێت بچێتە سلێمانی.

ئەو كەسانەی دوێنێ (أ)یان هێنا بۆ لای ئێمە چاوەڕێیان نەكرد رێكارە یاساییەكانی وەرگرتنی (أ) تەواو بێت و راستەوخۆ گەڕابونەوە رانیە

 

زەیتۆ تۆفیق وتیشی،"دو برای (أ) بە ناوەكانی (هـ ، هـ) لەئێستادا لە خانەی بێسەرپەرشتانی هەولێر، بەداخەوە ئەو كەسانەی دوێنێ (أ)یان هێنا بۆ لای ئێمە چاوەڕێیان نەكرد رێكارە یاساییەكانی وەرگرتنی (أ) تەواو بێت و راستەوخۆ گەڕابونەوە رانیە، دوای ئەوە (أ) خانەكەی بەجێهێشتبو گەڕاوەتەوە بۆ رانیە، ئێمەش هێزە ئەمنییەكانمان لە هەڵاتنی ئاگاداركردوەتەوە".

هەولێر وەریانگرتوە، بەڵام ئیدارەی نەكردوە و رۆشتوە

 

لەبارەی كەیسی (أ)، لەئێستادا كوێستان محەمەد، وەزیری كارو كاروباری كۆمەڵایەتی هاتۆتە سەر خەت، لە لێدوانێكیدا بە خەندان-ی راگەیاند،"ئەم منداڵە 16 ساڵە و دوای ئەوەی لە هەولێر وەریانگرتوە، بەڵام ئیدارەی نەكردوە و رۆشتوە، كێشەكە ئەوەیە پێناچێت لە خانەكە بمێنێتەوە چونكە تەمەنی تێپەڕیوە".

سێ شتمان خستوەتەوە بەردەستیان، یان دەبێت لە هەولێر بمێنێتەوە و نەڕوات

 

راشیگەیاند،"كاك زەیتۆم راسپاردوە قسە لەگەڵ كەسوكارەكەی بكات، سێ شتمان خستوەتەوە بەردەستیان، یان دەبێت لە هەولێر بمێنێتەوە و نەڕوات، چونكە ئێمە ناتوانین لەوێ بیبەستینەوە و كەلەپچەی بكەین، بەپێی یاساش منداڵی 16 ساڵ و 17 ساڵ بۆی هەیە پاشنیوەڕوان بچێتە دەرەوە".

ئەگەر لە هەولێرو سلێمانی نامێنێتەوە، با كەسوكارەكەی لەخۆی بگرن و سەرپەرشتی بكەن و ئێمە مانگانە موچەیەكی بۆ دەبڕینەوە بۆ بەخێوكردنی

 

وتیشی،"لەسلێمانیش شوێنمان هەیە كە بیبەنە نەوجەوانانی سلێمانی، بژاردەی سێهەمیشمان ئەوەیە، ئەگەر لە هەولێرو سلێمانی نامێنێتەوە، با كەسوكارەكەی لەخۆی بگرن و سەرپەرشتی بكەن و ئێمە مانگانە موچەیەكی بۆ دەبڕینەوە بۆ بەخێوكردنی".

هەر بە گوێرەی زانیارییەكانی خەندان، ئەمشەو هێزەكانی ئاسایش و پۆلیسی راپەڕین، لە رێگەی مەفرەزەكانیانەوە سەرقاڵی دۆزینەوەی (أ)ن و بڕیارە بیبەنە لای خۆیان تا ئەو كاتەی كێشەكەی بەتەواوی چارەسەر دەكرێت.



Copyright © 2016 Xendan.org all rights reserved

designed and developed by AVESTA GROUP