دواى ئازادکردنى، فەرهاد پیرباڵ پەیامێک بۆ رای گشتى بڵاو دەکاتەوە

- 9/20/2019 11:51:00 AM 22011 جار خوێندراوەتەوە

خەندان-

دواى ئەوەى رێكەوتی 18ی ئەیلولی 2019، فەرهاد پیرباڵ، نوسەر و مامۆستای زانكۆ بە کەفالەتى 10 ملیۆن دینار ئازادکرا، ناوبراو پەیامێکى بۆ رای گشتى بڵاوکردەوە.

رەفتاری نابەجێ دوبارە ناكەمەوە

لە پەیامەکەیدا فەرهاد پیرباڵ دەڵێت، "دەمەوێت داوای لێبوردن  لە نێچیرڤان بارزانی، سەرۆكی هەرێمی كوردستان و رەوان بارزانی بكەم"، رونیشیكردوەتەوە "بەڵێن دەدات لەمڕۆوە  بە هیچ شێوەیەک رەفتار و کردار و قسەی نابەجێ دوبارە نەكاتەوە بەرامبەر هیچ کەسێک".
 

دەقى پەیامەکەی فەرهاد پیرباڵ:

بۆ ڕای گشتی کوردستان
سڵاو و وەفاداری و خۆشەویستیم بۆ هەمو لایەک. سوپاسی هەمو ئەو کەس و خۆشەویستانەم دەکەم کە ڕۆڵیان هەبو لە ئازاد کردنی مندا بە کەفالەت ، بە دادوەرە بەڕێزەکانیشەوە کە بە شێوەیەکی قانونی مامەڵەیان لە گەڵ کەیسەکەم کرد، داوای لوتف و بەخشین لە هەمو ئەو ئەزیزانەش دەکەم کە بومە مایەی خەم و نیگەرانی بۆیان.
لێرە دەمەوێ داوای لێبوردن لە جەنابی برای خۆشەویست و پایەدارم کاک نێچیرڤان بارزانی بکەم هەروەها لە برای شیرینم کاک ڕەوان بارزانی چونکە لە ماوەی رابردوی بێ قانونی لەهەرێم کۆنتڕۆڵی خۆمم لە دەستدا و کۆمەڵێک قسە و رەفتاری نابەجێ و نا شایستەم دەربری بەرامبەر بە ماڵی پیرۆزی بارزانیەکان ، کە ئەمەش پێچەوانەی ئەخلاقی بەرزی منە دوێنێش و ئەمڕۆش و تا هەتایە ، بۆیە داوا دەکەم بە تایبەت خوشکە بەڕێزە بارزانییەکانیشم بە گەورەیی خۆیان بمبەخشن.
لەم دۆخە تازە و ناسکەی کوردستاندا هیوادارم هەرچی کێشە و گرفتێکم هەیەلە رێگای دادگا و قانونەوە یەکلاببنەوە و ئەو دەرگایانەی لێم داخرابون بکرێنەوە. ئەمەش بۆیە هەمو کەس بۆی ئاشکرا بو کە ئەم حکومەتە نوێیەی جەنابی مەسرور بارزانی حکومەتی دادپەروەری و بەرەوچەسپاندنی قانونە لە کوردستان،بۆیە بەڵێن دەدەم لەم ڕۆوە و قەسەم بە ڕۆژی19/9/2019 کە بە هیچ شێوەیەک رەفتار و کردار و قسەی نابەجێ دوبارە نەکەمەوە بەرامبەر هیچ کەسێک تەنانەت گەر تاوانباریش بێت چونکە قانون دەچەسپێت.



Copyright © 2016 Xendan.org all rights reserved

designed and developed by AVESTA GROUP