تاوەرەكانی پەیوەندی سەر باڵەخانەکان لادەبرێن

- 9/13/2019 6:42:00 PM 16437 جار خوێندراوەتەوە

خەندان-

وەزارەتى ئاوەدانکردنەوە و نیشتەجێکردنى عێراق بریارى لابردنى سەرجەم ئەو تاوەرانەی پەیوەندی دەدات، کە لەسەر باڵەخانەکان دانراون.

تاوەرەكانی تایبەت بە پەیوەندیەكانی ئینتەرنێت و تەلەفۆن لادەبرێن

 

لە نوسراوێکدا كە رێكەوتی 11ی ئەیلولی 2019ی لەسەرە و وێنەیەکى دەست خەندان کەوتوە، وەزارەتى ئاوەدانکردنەوە و نیشتەجێکردنى عێراق ، بڕیاریداوە بە لابردنى ئەو تاوەرانەی بە مەبەستی خزمەتگوزاری پەیوەندیەكانی مۆبایل و ئینتەرنێت لەسەر بینا و باڵەخانەکان دانرون.

دەبێت لە ماوەی كەمتر لە سێ رۆژدا بڕیارەكە جێبەجێ بكرێت

لە نوسراوەکەدا هاتوە، دەبێت کۆمپانیاکانى پەیوەندیکردن لەماوەى کەمتر لە سێ رۆژ دواى ئاگادارکردنەوەیان سەرجەم ئەو تاوەری پەیوەندیانە لاببەن، كە لە سەر باڵەخانەكان یاخود خانو و شوێنەكانی نیشتەجێبون دایانناون. 

گواستنەوە و گەیاندنی هەرێم لە ئەنجومەنی وەزیرانەوە فەرمان وەردەگرن

دەربارەى جێبەجێکردنى بریارەکە لە هەرێمى کوردستان، ئومێد محەممەد وتەبێژى وەزارەتى گواستنەوە و گەیاندنى هەرێمى کوردستان بۆ خەندان وتى"ئێمە وەزارەتێکى سەر بە ئەنجومەنى وەزیرانى هەرێمین، هەر بریارێک لەوێوە بۆمان دەربکرێت جیبەجێى دەکەین".

بڕیارەكە جێبەجێ ناكەین

ئومێد محەممەد وتیشى "هەتا ئێستا هیچ جۆرە بڕیارێکى فەرمیمان دەربارەى ئەو بڕیارەى حکومەتى عێراق، لە ئەنجومەنى وەزیرانى هەرێمەوە بۆنەهاتوە، بۆیە جێبەجێى ناکەین".



Copyright © 2016 Xendan.org all rights reserved

designed and developed by AVESTA GROUP