تەقینەوەیەك لە ئامەد ژمارەیەك كوژراو و برینداری لێكەوتەوە

- 9/12/2019 8:18:00 PM 2512 جار خوێندراوەتەوە

خەندان-

لە پێگەیەكی نێوان دو ناوچەی سەر بە پارێزگای ئامەد لە باكوری كوردستان، تەقینەوەیەك رویدا و لە ئەنجامدا لانیكەم حەوت كەس كوژراون و ژمارەیەكی دیكەش برینداربون.

لانیكەم حەوت كەس كوژراون و 13 كەسی دیكەش برینداربون

راگەیاندنەكانی باكوری كوردستان بڵاویانكردەوە، ئێوارەی ئەمڕۆ پێنجشەممە لە شوێنێكی نێوان ناوچەكانی  كوڵپ-موش سەر بە پارێزگای ئامەد لە باكور، تەقینەوەیەك رویداوە و لە ئەنجامدا لانیكەم حەوت كەس كوژراون و 13 كەسی دیكەش برینداربون، كە سەرجەمیان خەڵكی ئەو ناوچەیەن.

بۆمبێكی دەستییان تەقاندوەتەوە

والی ئامەد-یش لە راگەیەندراوێكدا ئاماژەی بەوەكردوە "كاتژمێر شەش بە كاتی ناوخۆیی ئامەد، لەمیانی تێپەڕینی ئۆتۆمبێلێكدا كە چەند گوندنشینێكی تێدابوە و بە مەبەستی كۆكردنەوەی دار بەڕێكەوتون، لە لایەن گروپە چەكدارەكانی دژ بە حكومەتی توركیاوە بۆمبێكی دەستییان تەقاندوەتەوە و لە ئەنجامدا ژمارەیەك كوژراو و بریندار هەیە كە سەرجەمیان خەڵكی ئەو ناوچەیەن و گوندنشینن".

راشیگەیاندوە، لە ئێستادا سەرجەم بریندارەكانی ئەو روداوە گەیەندراونەتە نەخۆشخانەكانی ئامەد، بە مەبەستی وەرگرتنی چارەسەری پێویست، هاوكات هێزەكانی بەرگری و پاراستن چونەتە ناوچەكە و لێكۆڵینەوە دەستیپێكردوە تا ئەنجامدەری كردەوەكە بدۆزرێتەوە.

بە گوێرەی زانیاریەكان، لە ئێستادا لە شوێنی رودانی تەقینەوەكە، ژمارەیەكی زۆر هێزی بەرگری و پاراستن و چەكدار هەیە و بەردەوامن لە لێكۆلینەوە لەو روداوە و لە رێگەی ئۆتۆمبێلی فریاكەوتنەوە سەرجەم كوژراو و بریندارەكان گەیەندراونەتە نەخۆشخانە.



Copyright © 2016 Xendan.org all rights reserved

designed and developed by AVESTA GROUP