بەپەلە

ڤیدیۆ.. لە پێنجوێن نزیکەی چوار هەزار دار دەبڕدرێنەوە و ئاگریان تێبەردەدرێت

- 9/11/2019 7:15:00 PM 3384 جار خوێندراوەتەوە

خەندان-

بەڕێوەبەرایەتی پۆلیسی دارستان و ژینگەی پارێزگای سلێمانی لە ڕاگەیەندراوێکدا ئاماژەیكرد بە دەستبەسەرداگرتنی زیاتر لە چوار هەزار دار کە ئاگریان تێبەردراوە.

هەوڵ و ماندوبونێکی زۆر توانیان ئاگرەکە بکوژێننەوە

پۆلیسى دارستانی سلێمانی لەراگەیەندراوەکەیدا دەڵێت" دوای گەیشتنی هەواڵێك کە گوایە لە سنوری گوندەکانی  بناوەسوتە و سەرنەوان سێ هاوڵاتی ژمارەیەکی زۆر داری سروشتیان بڕیوەتەوە و ئاگریان تێبەرداوە، دەستبەجێ مەفرەزەیەک لە بەشی پۆلیسی دارستانی پێنجوێن گەیشتونەتە شوێنی ڕوداوەکە و دوای هەوڵ و ماندوبونێکی زۆر توانیان ئاگرەکە بکوژێننەوە".

لە سنورى گاپیڵۆن هاوڵاتیەک دەستگیرکرا و سێ کورەى خەڵوز تێکدران

ئاماژە بەوەشكراوە، پۆلیسی دارستان توانیویەتی لە شوێنى روداوەکە دەستبگرن بەسەر ژمارەیەکی زۆر لە داری بڕدراوە کە  بە  چوار هەزار داری سروشتی مەزەندە دەکرێت، هەر لەو چوارچێوەیەدا لە دو چالاکى جیاوازدا لە سنورى گاپیڵۆن هاوڵاتیەک دەستگیرکرا و سێ کورەى خەڵوز تێکدران .

هاوكات بەڕێوەبەرایەتی پۆلیسی دارستان و ژینگەی پارێزگای سلێمانی نیگەرانى خۆیان بەرامبەر روداوەکە پیشان داوە و دەڵێن" بەداخەوە بڕینی داری سروشتی خەریکە لە حاڵەتەوە دەبێتە دیاردە و هەندێك لە هاوڵاتیان لە پێناو بەرژەوەندی تایبەتی خۆیان دەست دەخەنە سروشت و ژینگەوەو دەیشێوێنن".

 



Copyright © 2016 Xendan.org all rights reserved

designed and developed by AVESTA GROUP