هەواڵی ئەمڕۆ

بەپەلە

نەتەوە یەکگرتوەکان: هەنگاوەکانی ناتانیاهۆ پرۆسەی ئاشتی لەناوچەکە تێکدەدات

- 9/11/2019 1:14:00 PM 1453 جار خوێندراوەتەوە


خەندان-
رێکخراوی نەتەوە یەکگرتوەکان هۆشداری دایە بنیامین ناتانیاهۆی سەرۆک وەزیرانی ئیسرائیل ئەو هەنگاوانەی کە بەنیازە پاش هەڵبژاردنەوەی بیاننێت لەلایەن یاسا نێودەوڵەتییەکانەوە پشتگیری ناکرێت و ئاسایشی ناوچەکەش تێکدەدات.
ئەو هەنگاوانەی کە بەنیازە پاش هەڵبژاردنەوەی بیاننێت لەلایەن یاسا نێودەوڵەتییەکانەوە پشتگیری ناکرێت و ئاسایشی ناوچەکەش تێکدەدات

بەپێی هەواڵێکی تایمز ئۆف ئیسرائیل، ئەمڕۆ چوارشەممە رێکخراوی نەتەوە یەکگرتوەکان هۆشداری دایە بنیامین ناتانیاهۆی سەرۆک وەزیرانی ئیسرائیل ئەو هەنگاوانەی کە بەنیازە پاش هەڵبژاردنەوەی بیاننێت لەلایەن یاسا نێودەوڵەتییەکانەوە پشتگیری ناکرێت و ئاسایشی ناوچەکەش تێکدەدات.

دوێنێ سێشە بنیامین ناتانیاهۆی سەرۆک وەزیرانی ئیسرائیل لەکۆنگرەیەکی رۆژنامەوانیدا رایگەیاند، ئەگەر لەهەڵبژاردنە چاوەڕوانکراوەکەی وڵاتەکەیدا هەڵبژێردرێتەوە، دۆڵی ئوردن و باکوری دەریای مردو داگیردەکات و لەناوچەکانی بانکی رۆژئاواش دەمێنێتەوە و ئەو ناوچەیە چۆڵناکات.
پلانەکەی ناتانیاهۆ کارەساتێکی گەورە دەبێت بۆ پرۆسەی ئاشتی دولایەنی ئەمریکا لەنێوان ئیسرائیل و فەلەستین

لەوبارەیەوە ستیفن دوجیریک، وتەبێژی رێکخراوی نەتەوە یەکگرتوەکان رایگەیاند، پلانەکەی ناتانیاهۆ کارەساتێکی گەورە دەبێت بۆ پرۆسەی ئاشتی دولایەنی ئەمریکا لەنێوان ئیسرائیل و فەلەستین.

راشیگەیاند، هەر بڕیارێکی ئیسرائیل بۆ سەپاندنی یاسا وبڕیاری ئیداری لەناوچەکانی بانکی رۆژئاوا بەبێ پشتیوانی نێودەوڵەتی دەبێت.

پلانەکەی ناتانیاهۆ هەرزو لەلایەن ئۆپۆزسیۆنی ئیسرائیلەوە رەتکرایەوە و بەهەوڵێک بۆ دورخستنەوەی سەرنجی رای گشتی لەسەر گەندەڵییەکانی لەقەڵەمدرا.

سەرکردەکانی وڵاتانی عەرەبیش هەنگاوەکەی ناتانیاهۆیان بەهەوڵێک بۆ تێکدانی ئاشتی ناوچەکە لەقەڵەمدا و رایانگەیاند بەتەواوەتی دژی ئەو هەنگاوانە دەوەستنەوە.

ئیدارەی کۆشکی سپیش رایگەیاند، ئەو لێدوانانە هیچ گۆڕانکارییەک لەسیاسەتی ئەمریکا دەربارەی پلانی ئاشتی ناوچەکە دروستناکات.


Copyright © 2016 Xendan.org all rights reserved

designed and developed by AVESTA GROUP