وێنە..وەك ئاماژەیەك بۆگۆڕی ئەو منداڵانەی قوربانی جەنگن
نەتەوە یەكگرتوەكان سێ هەزار و 758جانتا بەسەر منداڵاندا دابەشدەكات

- 9/9/2019 12:12:00 PM 1334 جار خوێندراوەتەوە

خەندان-

وەك ئاماژەیەك بۆ گۆڕی ئەو منداڵانەی لە ساڵی رابردودا بەهۆی ململانێ و پێكدادانەكانەوە كوژراون و بونەتە قوربانی، نەتەوە یەكگرتوەكان لە عێراق هێندەی ژمارەی منداڵانی كوژراو جانتا بەسەر ئەو منداڵانەدا دابەشدەكات كە لەمساڵدا دەست بە خوێندن دەكەنەوە.

لە هەژماری فەرمی خۆی لە تۆڕی كۆمەڵایەتی فەیسبوك، نێردەی رێكخراوی نەتەوە یەكگرتوەكان لە عێراق (یونامی) بڵاویكردوەتەوە، سێ هەزار و 758 جانتا و پێدوایستی قوتابخانەی بەسەر ئەو منداڵانەدا دابەشكدەكات، كە لەمساڵی خوێندندا دەستدەكەن بە پرۆسەی خوێندن و دابەشكردنی جاتاكان تا سبەینێ سێشەممە بەردەوامدەبێت.

ئاماژە بەوەشكراوە "ژمارەی ئەو جانتایانە ئاماژەیە بۆ ژمارەی ئەو منداڵە بێتاوانانەی لە ساڵی 2018دا بەهۆی ململانێكانی ناوچەكە لە عێراق كوژراون، لە هەمانكاتدا جانتاكان بە ریز و لەشێوەی گۆڕستانێكدا دانراون، تا مەرگی بێهۆكار و كوژرانی ئەو منداڵانە بە بێتاوانی بخاتەڕو".


لە راگەیەندراوەكەی یونامیدا، باس لەوەكراوە، جێگیركردنی ئەو جانتایانە بەو شێوەیە و لەمكاتەدا، پەیامێكە بۆ سەركردەكانی جیهان لەكاتێكدا لە زۆرینەی ناوچەكانی جیهان منداڵان دەچنەوە بۆ قوتابخانە و دەستدەكەنەوە بە پرۆسەی خوێندن.

هاوكات باس لەوەشكراوە، پاش دو هەفتەی دیكە، رێكخراوی نەتەوە یەكگرتوەكان كە هەمیشە هێمای هیوا و دەرفەتدان بوە بە منداڵان، یادی 30 ساڵەی دانوستانەكانی تایبەت بە مافەكانی منداڵان دەكاتەوە، بۆیە ئەم چالاكیە پێویستە وەبیرهێنانەوەیەكبێت بۆ سەركردەكانی جیهان.



Copyright © 2016 Xendan.org all rights reserved

designed and developed by AVESTA GROUP