لە هەولێر "دوژمنی گەل" نمایش دەكرێت

- 9/5/2019 12:41:00 PM 720 جار خوێندراوەتەوە

خەندان-

شاكارێكی شانۆیی نوسەری جیهانی هینریك ئیبسن ١٨٢٨ - ١٩٠٦، كە بە باوكی شانۆی ریالیزمی دادەنرێت، لە شاری هەولێر كاری دەرهێنانی بۆ كراوە و نمایش دەكرێت، ئەویش شانۆگەریی (دوژمنی گەل)ە.

لەو شانۆگەرییەدا كە ژمارەیەكی فراوانی بەشدارانی لەخۆ گرتوە، دەستەیەك لە شانۆكارە گەنجەكانی شاری هەولێر رۆڵەكان بەرجەستە دەكەن و كارە هونەرییەكان رادەپەڕێنن.
شانۆگەریی دوژمنی گەل كە لەساڵی ١٨٨٢دا بڵاوبوەتەوە 

 

ئەرسەلان دەروێش، دەرهێنەری كورد سەبارەت بەم نمایشە رایگەیاند، شانۆگەریی "دوژمنی گەل" كە لەساڵی ١٨٨٢دا بڵاوبوەتەوە لە رێگای بابەتی پیسبونی ئاوی شارێكی باكوری رۆژهەڵاتی نەرویژەوە، پرسی نغرۆبونی ویژدانی خەڵك لە نێو زەلكاوی بەدمۆڕاڵی و پشت لە راستیكردن و ملدان بۆ ستەم وچەواشەكاریی دەسەڵاتداران دەخاتەڕو.
ئیبسن لەم شاكارەیدا بوێرانە پەردە لەسەر دیاردەی گەندەڵی هەڵدەماڵێ و بانگەشە بۆ زەرورەتی بەرپەرچدانەوەی دەكات


دەرهێنەری کورد ئەرسەلان دەروێش و نوسەری مەزنی نەروێژی هینریك ئیبسن

ئاماژەی بەوەشکرد، ئیبسن لەم شاكارەیدا بوێرانە پەردە لەسەر دیاردەی گەندەڵی هەڵدەماڵێ و بانگەشە بۆ زەرورەتی بەرپەرچدانەوەی دەكات ئەگەر بە شێوەیەكی تاكەكەسیش بێت" تا ئەو ئاقارە دەڕوات كە بڵێت، "بەهێزترین مرۆڤ لە جیهاندا، ئەو كەسەیە كە بەتەنها دەجەنگێت".

ئەرسەلان دەروێش دەشڵێت، "لە میانەی بایەخدان بە كەلتوری شانۆی جیهانی، نەخاسمە ئەو تێكستانەی كە بەركەوتنی لەگەڵ واقیعی ژیانی كۆمەڵایەتی و ئابوری و رامیاریی كۆمەڵگاكەماندا هەیە، پێمان پەسەند بو وەك تیپی شانۆی سالار، ئەم كارە كە چەندین جار پێشترلە كوردستاندا نمایش كراوە، لە شاری هەولێری پایتەختدا بە پشتیوانی بەڕێوەبەرایەتیی هونەری شانۆی سەر بە بەڕێوەبەرایەتیی گشتی رۆشنبیری هەولێر لە  وەزارەتی رۆشنبیریی و لاوان پێشكەش بكەین". 

شانۆگەریی دوژمنی گەل یەكێك لە بەناوبانگترین دەقەكانی نوسەری مەزنی نەروێژی هینریك ئیبسنە

 

شانۆگەریی "دوژمنی گەل" یەكێك لە بەناوبانگترین دەقەكانی نوسەری مەزنی نەروێژی هینریك ئیبسن-ە، كە لەم كارەدا دەستەیەك لە شانۆكارە گەنجە ئەكادیمییەكان بەشداری دەكەن و كارە هونەرییەكانی ڕادەپەڕێنن.

رۆڵە سەرەكییەكان لەلایەن هونەرمەندان بەهمەن حاجی، مەولان حەمەدەمین، وەیلان سدیق، یوسف یوسفی، محەمەد تاهیر، یاسین عومەر، سیما مستەفا، زیاد كەریم بەرجەستە دەكرێت، هەروەها كۆمەڵێك ئەكتەری دیکە بەشدارن لەوانە زەهرە نەجات، هۆزان كاروان، نەورۆز عەلی كەمال، بنیاد فەرحان، دیمەن تاهیر، هاوكار خدر، محەمەد حەمە، شەنیارمحەمەد ، عەلی كەمال، گەرمیان گلی ، باوان كەیفی ، یارا ئەرسەلان ، رەهێڵ هەورامان.


Copyright © 2016 Xendan.org all rights reserved

designed and developed by AVESTA GROUP