ئاوارەكان نایانەوێت بگەڕێنەوە زێدی خۆیان
خەندان چیرۆکی ئاوارەکانی سنوری گەرمیان دەگڕێتەوە

- 8/27/2019 4:05:00 PM 2612 جار خوێندراوەتەوە

خەندان- نیگار عومەر 

ئاوارەكانی نێو کەمپەکانی سنوری ئیدارەی گەرمیان وێڕای ئەوەی لە باردودۆخێکی نالەباردا ژیان بەڕێدەکەن، بەڵام داوای مانەوە دەکەن و دەڵێن، نایانەوێیت بگەڕێنەوە بۆ ناوچەکانیان، ئەوان دەڵێن "ژیان لێرە ئاسانترە".
خزمەتگوزاریەکان کەمەو هاوکاریەکانی رێکخراوەکان کەمبوەتەوە

 

ئاوارەكانی نێو کەمپەکانی تازەدێی و قۆرەتو، کە دەکەونە سنوری گەرمیانەوە، باس لە کەمی خزمەتگوزارییەکانی نێو کەمپەکانیان دەکەن و دەڵێن، خزمەتگوزاریەکان کەمەو هاوکاریەکانی رێکخراوەکان کەمبوەتەوە، لە ئێستاشدا روبەڕوی مەترسییەکی دیکە ‌بونەتەوە، ئەویش داخستنی قوتابخانەکانە.

لەتیف ساڵح، دانیشتوی نێو کەمپی قۆرەتوی سەر بەناحییەی قۆرەتوە، ئەو بە خەندان-ی وت، "خزمەتگوزاریی لە کەمپەکان تا دێت کەمتر دەبێتەوە هاوکارییەکانیش زۆر کەمیان کردوە، ئێستاش هەوڵ دەدرێت قوتابخانە لە منداڵەکانمان دابخرێت".
ئێستاش لە قۆرەتو ژیانمان لە ناو چادر و خێمەدا بەسەر دەبەین، شەوان حەشەرات و مێرو بێزارمان دەکەن


وتیشی، پێشتر دانیشتوی پارێزگای دیالە بوە، "ئێستاش لە قۆرەتو ژیانمان لە ناو چادر و خێمەدا بەسەر دەبەین، شەوان حەشەرات و مێرو بێزارمان دەکەن، هەرچەند پێشتر لەلایەن ڕێکخراوەکانەوە هاوکاری دەکراین بەڵام ئێستادا ئەویش زۆرکەم بوە، هەندێك لە پێداویستییەکان هەر نەماوە، هەموو ئەمانەش وای دەبینین فشار بێت بۆ سەر ئێمە بۆ گەڕانەوەمان".
ئێمە نامانەوێت بگەڕێینەوە شوێنی نیشەجێبونی پێشومان، چونکە لێرە هەرچەندە خراپیش بێت گوزەرانمان، بەڵام سەلامەتیین و پارێزراوین

 

لەتیف ساڵح ئاماژەی بەوەشکرد، "ئێمە نامانەوێت بگەڕێینەوە شوێنی نیشەجێبونی پێشومان، چونکە لێرە هەرچەندە خراپیش بێت گوزەرانمان، بەڵام سەلامەتیین و پارێزراوین، هەرچەندە خزمەتگوزارییەکان کەمبێت جێگەی سەلامەت و ئاسایش لەپێش هەموشتێکەوەیە".

ژنێکی دیکە کە ناوی ئینعام محەمەد-ە و  ژنە دانیشتوی کەمپی تازەدێیە چیرۆکی خۆی بۆ خەندان دەگێڕێتەوە و باسی قورسی ژیانیان دەکات و دەڵێت، "کێشەی سەرەکی ئێمە ترسە لە گەڕانەوەمان بۆ شوێنی پیشومان، کە لە ئێستادا دەنگۆیەك هەیە و دەوترێت لەکۆتایی ئەم ساڵدا کەمپەکان دادەخرێت، ئێمە نازانین ڕو لەکوێ بکەین، چونکە ناوچەکانی پیشووترمان ئارام نیە".
نازانم بیرلە نەمانی قوتابخانەی منداڵەکانمان بکەینەوە یان بیر لە شوێنی خۆمان بکەینەوە

 

"نازانم بیرلە نەمانی قوتابخانەی منداڵەکانمان بکەینەوە یان بیر لە شوێنی خۆمان بکەینەوە، ئەم هەمو کێشە و گیروگرفتانە ڕوی لەئێمە کردوە، لەبارێکی دەرونی زور ناڕەحەتدا دەژین، ئەگەر کەمپ نەبێت من بچمە کوێ؟! لەکاتێکدا هاوسەرەكەشم لە زیندانە"، ئینعام محەمەد وایوت.

لەبارەی کەمبونەوەی خزمەتگوزاریەکانی ئاوارەکانی سنوری گەرمیان، بێستون ژاڵەیی، بەڕێوبەری نوسینگەی هاوبەشی هەماهەنگی قەیرانەکان لە ئیدارەی گەرمیان بەخەندان-ی وت، "ئێمە هەوڵی خۆمانمان داوە بەهاوکاری رێکخراوەکان، تا بتوانین خزمەتگوزارییەکان بگەیەنین بە ئاوارەكانی نێو كەمپەكان".
لە رێگەی حکومەتی عێراقەوە فشار دەخرێتە سەر ئاوارەکان تاوەکو وایان لێ بکرێت بگەڕێنەوە ناوچەکانی خۆیان

 

ئاماژە بۆ ئەوەشدەکات، لە رێگەی حکومەتی عێراقەوە فشار دەخرێتە سەر ئاوارەکان تاوەکو وایان لێ بکرێت بگەڕێنەوە ناوچەکانی خۆیان. 

ئاوارەبونی ناوچەکانی باشور و خواری عێراق بۆ هەرێمی کوردستان دوای ساڵی 2014 دروستبو، ئەوەش دوای ئەوەی چەکدارانی داعش روبەڕێکی فراوانی خاکی عێراقیان لە موسڵ ئەنبار و چەند ناوچەیەکی دیکەیان کۆنتڕۆڵ کرد.
دوای کۆتاییهاتنی داعش لە کۆتایی 2017 دا بەشێکی زۆر لە ئاوارەکان گەڕانەوە ناوچەکانی خۆیان، بەڵام بەهۆی نەبونی ئاسایش و نەبونی خزمەتگوزاری ئەو ناوچانە جارێکی دیکە پەنایان بۆ ئەو خێمانە بردەوە

 

هەرچەندە دوای کۆتاییهاتنی داعش لە کۆتایی 2017 دا بەشێکی زۆر لە ئاوارەکان گەڕانەوە ناوچەکانی خۆیان، بەڵام بەهۆی نەبونی ئاسایش و نەبونی خزمەتگوزاری ئەو ناوچانە جارێکی دیکە پەنایان بۆ ئەو خێمانە بردەوە کە حکومەتی عێراق و هەرێمی کوردستان بەهاوکاری رێکخراوە خێرخوازیەکان دروستیان کردوە.

لەبارەی دەنگۆی داخستنی کەمپەکانی سنوری ئیدارەی گەرمیان و ناچارکردنی ئاوارەکان بۆ ئەوەی بگەڕێنەوە زێدی خۆیان بێستون وتی، "بەڵی. شتێکی وا هەیە و بە رێکخراەکانمان وتوە نابێت حکومەتی عێراق لە ڕێگەی داخستنی قوتابخانەی ناو کەمپەکانەوە وا لەئاوارەکان بکات بگەڕێنەوە، هەوڵ دەدەین لەسەر داواکاری خۆیان لێرە بمێننەوە".
لە ئێستاشدا زیاتر لە 600 خێزان لەناو هەردو کەمپی تازەدێ و قۆرەتون

 

بەپێی ئامارەکانی حکومەتی هەرێمی کوردستان دوای هێرشەکانی داعش و کۆنتڕۆڵکردنی روبەرێکی فراوانی عێراق زیاتر لە ملیۆنێک و 400 هەزار ئاوارە لە هەرێمی کوردستان بون، لە ئێستاشدا زیاتر لە 600 خێزان لەناو هەردو کەمپی تازەدێ و قۆرەتون.


Copyright © 2016 Xendan.org all rights reserved

designed and developed by AVESTA GROUP