هەواڵی ئەمڕۆ

بەپەلە

حەشدی شەعبی سەبارەت بە بۆردومانی فڕۆكە بێفڕۆكەوانەكە راگەیەندراوێكی بڵاوكردەوە

- 8/25/2019 10:27:00 PM 11790 جار خوێندراوەتەوە

خەندان-

حەشدی شەعبی، سەبارەت بە بۆردومانكردنی دو بنكەی سەربازی لەلایەن دو فڕۆكەی بێفڕۆكەوانەوە راگەیەندراوێكی بڵاوكردەوە و تێیدا ئاماژەی بەوەكردوە، ئیسرائیل ئەنجامدەری هێرشەكە بوە.

ئیسرائیل لە چوارچێوەی زنجیرە هێرشەكەیدا ئەنجامیداوە

بەشی كار و چالاكیەكانی حەشدی شەعبی سەبارەت بە هێرشی دو فرۆكەی بێفڕۆكەوان بۆ سەر دو بنكەی سەربازیان لە ئەنبار ئەمڕۆ یەكشەممە بڵاویكردەوە "لە چوارچێوەی زنجیرە هێرشەكانی ئیسرائیل بۆ سەر خاكی عێراق، دوبارە لەرێگەی فڕۆكەی بێفڕۆكەوانەوە هێرشیانكردە سەر حەشدی شەعبی  لە پارێزگای ئەنبار و بوە هۆی كوژرانی جەنگاوەرێكمان و برینداربونی یەكێكی دیكە".

بە یاریدەی ئەمریكا كارەكە ئەنجامدراوە

لە رایگەیەندراوەكەدا ئاماژە بەوەشكراوە "هێرشی فڕۆكە بێفڕۆكەوانەكانی ئیسرائیل بە هاوكاری هێزە ئاسمانیەكانی ویلایەتە یەكگرتوەكانی ئەمریكا بوە لە ناوچەكە و باڵۆنێكی گەورەی چاودێری ئەو هێزانەش لە نزیك ناوچەی رودانی هێرشەكە هەبوە".

بێدەنگ نابین لە ئاست ئەو هێرشە

لە بەشێكی دیكەی راگەیەندراوەكەدا حەشدی شەعبی پەیمانیداوە بە بێدەنگ نەبونی لە ئاست ئەو هێرشە و دەڵێت "پەیمان دەدەین بە گەلی عێراق، ئەو هێرشە كاریگەری لەسەر خواست و هەوڵی حەشدی شەعبی دروستناكات لەپێناو بەجێهێنانی ئەركی نیشتیمانی و روبەڕوبونەوەی تێرۆر و بەرگریكردن و روبەڕوبونەوەی دوژمنان و ئەو لایەنانەی پشتیوانییان لێدەكەن".

ئەو راگەیەندراوەی حەشدی شەعبی لە وەڵامی هێرشی دو فڕۆكەی بێفڕۆكەواندایە، كە ئێوارەی ئەمڕۆ یەكشەممە دو بنكەی سەربازیان لە ئەنبار كردە ئامانج و بەهۆیەوە زیانی گیانی ماددیان بەو هێزە چەكدارە گەیاند.



Copyright © 2016 Xendan.org all rights reserved

designed and developed by AVESTA GROUP