"نامەوێت بمرم"
بە وێنە و ڤیدیۆ..هاواری سەرەمەرگی ئەو دایكەی سێ رۆژە توركیا و جیهانی هەژاندوە

- 8/25/2019 8:32:00 PM 28493 جار خوێندراوەتەوە

خەندان-

لە لایەن هاوسەری پێشویەوە، بە چەقۆ و لەبەردەم هاوری كچە دە ساڵانەكەیدا  بە چەقۆ خەڵتانی خوێن كرا، ئێستا توركیا و جیهان بە هاواری سەرەمەرگی ئەمینە بوڵوت داوای راگرتنی توندوتیژی دەكەن.
لەبەردەم كچە دە ساڵانەكەیدا بە چەقۆ هێرشی كرایە سەر 

18ی ئەم مانگە، لە شەقامی مێندێرێس ژنێكی 38 ساڵ بە ناوی ئەمینە بوڵوت لە لایەن هاوسەری پێشویەوە و لەبەردەم كچە دە ساڵانەكەیدا بە چەقۆ هێرشی كرایە سەر و سەرەنجام ئەمینە لەگەڵ هاواركردنی بە رەتكردنەوەی مردن گیانیلەدەستدا.

فێدایی باران، پاش ئەوەی لە فرۆشگەیەكدا بە چەقۆ ئەمینە بوڵوت بە سەختی برینداردەكات بە تاكسییەك هەڵدێت، ئەو كەسانەی لەو جێگەیەشدا ئامادەبون گرتە ڤیدیۆی روداوە دڵتەزێنەكەیان تۆماركردوە و لە ڤیدیۆكەشدا هاواری هەریەك لە ئەمینە و كچە دە ساڵانەكەی دەبیسترێت.
بە مەبەستی گفتوگۆكردن سەبارەت بە مافی گرتنەئەستۆی مانەوەی منداڵەكان یەكدییان بینیوە

بەپێی ئاژانسە هەواڵیەكانی توركیا، ئەمینە ماوەی چوار ساڵە لە فێدایی باران جیابوەتەوە و رۆژی روداوەكە بە مەبەستی گفتوگۆكردن سەبارەت بە مافی گرتنەئەستۆی مانەوەی منداڵەكان لە فرۆشگەیەكدا یەكدییان بینیوە، لەوكاتەشدا كچە دە ساڵانەكەیان لەگەڵیاندابوە.
قوربانیم كردوە

فێدایی لەناكاو بە چەقۆیەك كە لەگەڵ خۆیدا هەڵیگرتبو، لەبەرچاوی كچە دە ساڵانەكەیاندا هێرشیكردە سەر ئەمینە و بە سەختی برینداری كرد، دواتریش دەستبەجێ بە تاكسییەك هەڵهات و لە وەڵامی ئەنجامدانی ئەو كارەشدا وتی "قوربانیم كردوە"، ئەوەی لەپاش هێرشەكە مایەوە ناڵە و هاواری ئەمینە و كچەكەی بو.
دایكە تكایە مەمرە

لە گرتە ڤیدیۆییەكەدا دەردەكەوێت، ئەمینە بە ترس و ئازارەوە لەناو خوێندا هاواردەكات، كچە دە ساڵانەكەشی بە هەمان ترس و گریانەوە لە دایكی دەپاڕێتەوە و دەڵێت "دایكە تكایە مەمرە"، ئەو هاوارەی ئەمینە ماوەی سێ رۆژە توركیا و جیهانی هەژاندوە.
هاشتاگی (نامەوێت بمرم) بەرەنگاربونەوەیە

ئێستا هاواری كۆتایی ئەمینە بوەتە بڵاوترین هاشتاگ لە تۆڕە كۆمەڵایەتیەكان و لە رێگەی هاشتاگی "نامەوێت بمرم" سەرجەم مرۆڤدۆستان و مافپەروەران و رێكخراو و لایەنە پەیوەندیدارەكانی تایبەت بە بەرەنگاربونەوەی توندوتیژی دژی ژنان لەگەڵ خەڵكی ناوچەكە و جیهان داوادەكەن چیتر هەنگاوی جددی بنرێت بۆ روبەڕوبونەوەی هەنگاوە توندئاژۆكان و تاوانباران بە توندترین شێوە سزابدرێن.
 
ئەمینە بوڵوت بەهۆی سەختی برینەكەیەوە گیانیلەدەستدا و دواتریش تاوانباری سەرەكی روداوەكە لە لایەن پۆلیسەوە دەستگیركرا، لەكاتێكدا وەڵامی پرسیارەكانی پۆلیسی داوەتەوە، باران رایگەیاندوە "ئەو كارەی بە چەقۆیەك ئەنجامداوە كە هەمیشە هەڵیگرتوە".

وەزیری داد و هونەرمەندان و یاریزانانی تۆپی پێ رژانە سەر شەقامەكان

پاش بڵاوبونەوەی گرتە ڤیدیۆییەكە لە 23ی ئەم مانگەدا، ژمارەیەكی زۆر خەڵك رژانە سەر شەقامەكانی ئەنقەرەی پایتەختی توركیا و عەبدولحەمید گیول، وەزیری دادی ئەو وڵاتە و ژماریەكی زۆر لە ئەكتەر و هونەرمەندان و یاریزانانی تۆپی پێ لەنێو خۆپیشاندەراندا ئیدانەی ئەو كردەوەیەیان كرد.

بەپێی دوایین ئاماری فەرمی، لە شەش مانگی یەكەمی ئەمساڵدا لە توركیا، 214 ژن بە دەستی پیاوان كوژراون، ساڵی رابردو 440 ژن  و ساڵی 2017ش 409ی دیكە بە هەمانشێوە و لەسەر دەستی پیاوان كوژراون.

ئەوە یەكەمین كردەوەی دڵتەزێن نیە كە لە توركیا بەرامبەر رەگەزی مێ ئەنجامبدرێت و جیهان بهەژێنێت، ئۆزگەجان ئاسڵان، كە كچە كوردێكی شاری مەرسین بو لە باكوری كوردستان، لە رێكەوتی 11ی شوباتی ساڵی 2015 لە رێگەی گەڕانەوی بۆ ماڵەوە لە هەوڵێكی دەستدرێژی سێكسیدا كوژرا و ئێستا گۆڕەكەی لە هەمان گۆڕستاندایە كە بێرگێن-ی لێیە، ئەو هونەرمەندەی لە لایەن هاوسەری پێشویەوە ساڵی 1989 كوژرا، لەكاتێكدا هیچ كام لە تۆمەتباران یاسا بە سزای كۆتایی نەگەیاندن.


نیشانەکردن :

#تورکیا #ژن

Copyright © 2016 Xendan.org all rights reserved

designed and developed by AVESTA GROUP