وێنە و وردەكاری نوێ
ئەدرەعی پلانەكانی ئێران بۆ هێرشكردنە سەر ئیسرائیل دەخاتەڕو

- 8/25/2019 6:16:00 PM 6870 جار خوێندراوەتەوە

خەندان-

وتەبێژی سوپای ئیسرائیل ئاشكرایكرد، فەیلەقی قودس سەر بە هێزەكانی سوپای پاسدارانی ئێران لە پلانیاندا هەیە هێرشبكەنە سەر ئیسرائیل و لەوبارەیەشەوە وێنە و وردەكاری بڵاوكردەوە.

فەیلەقی قودس هەوڵیداوە چەند ناوچەیەكی ئیسرائیل بە ئامانج بگرێت

 

ئەفیخای ئەدرەعی، وتەبێژی سوپای ئیسرائیل لە دوایین بڵاوكراوەیدا لە هەژماری فەرمی خۆی لە تۆڕی كۆمەڵایەتی فەیسبوك، بە دوو وێنە ئاماژەی بەوەكردوە "دوێنێ شەممە، فەیلەقی قودسی سەر بە سوپای پاسدارانی ئێران، بە سەرۆكایەتی قاسم سولەیمانی  هەوڵیداوە لەرێگەی ژمارەیەك فڕۆكەی بێفڕۆكەوان چەند ناوچەیەكی ئیسرائیل بە ئامانج بگرێت".

وتەبێژی سوپای ئیسرائیل ئاماژەی بەوەشكردوە "ئەو فرۆكە بێفڕۆكەوانانەی لە لایەن فەیلەقی قودسی ئێرانییەوە نێردراون، بە مەبەستی ئەنجامدانی كردەوەی خۆكوژی و تەقینەوە چونەتە ئەو ناوچەیە".

بەپێی نوسراوەكەی ئەدرەعی، "ئەو كەسانەی لە لایەن ئێرانەوە بۆ ئەنجامدانی ئەو كارە هەڵبژێردراون، ئەندامی گروپە چەكدارییە شیعەكان بون كە قاسم سولەیمانی نارودنیەتە سوریا و پڕچەكی كردون".

ئەو گروپە چەند رۆژ لەمەوبەر چونەتە سوریا

رونیشیكردوەتەوە، لەماوەی چەند هەفتەی رابردودا، كەلوپەلە سەربازیەكانی ئەو گروپە چەكداریە گەیشتوەتە فڕۆكەخانەی دیمەشق لە سوریا و لە گوندی عقربا جێگیربون  لە باشوری دیمەشق، كە پێگەیەكە تایبەت بە فەیلەقی قودس لەو ناوچەیە.

ئیسرائیل ئەو فڕۆكە بێفڕۆكەوانانەی بە ئامانجگرتوە

لە بەشێكی دیكەی نوسینەكانیدا ئەدرەعی دەڵێت "توانیوامانە ئەو فڕۆكە بێفڕۆكەوانانە بە ئامانجبگرین و هەوڵەكانیانمان بۆ ئەنجامدانی تەقینەوەكان پوچەڵكردوەتەوە لەرێگەی بەلارێدابردنی سیستەمی دیاریكردنی پێگە لەو فرۆكانەدا".

بۆیان دەركەوتوە گروپەكە لە چەند كاتژمێری داهاتودا هێرشی دیكە ئەنجامدەدەن

دەشڵێت، ئەو گروپەی لە گوندی عقربا جێگیربون، لە لایەن ئیسرائیلەوە بەئامانج گیراون، پاش ئەوەی بۆیان دەركەوتوە كە گروپەكە لە هەوڵی ئەوەدابون لە چەند كاتژمێری داهاتودا هێرشی دیكە ئەنجامبدەن.

ئەوە لەكاتێكدایە، لەماوی چەند رۆژی رابردودا، هێزەكانی سوپای ئیسرائیل چەند ناوچەیەكی وڵاتی سوریا، بە تایبەت دیمەشق-ی پایتەخت بە ئامانجدەگرن و لە رێگەی فڕۆكەی سەربازیەوە بۆردومانیان ئەنجامداوە.


نیشانەکردن :

#ئیسرائیل #ئێران #سوریا

Copyright © 2016 Xendan.org all rights reserved

designed and developed by AVESTA GROUP