تەندروستی: رێژەی توشبوانی هەرێم بە شێوەیەكی بەرچاو كەمە
لە بریتانیا هەڵمەتی بەپەلە راگەیەندرا بۆ بەرەنگاربونەوەی سورێژە

- 8/21/2019 3:19:00 PM 1551 جار خوێندراوەتەوە

خەندان-

سەرۆك وەزیرانی بریتانیا، سەبارەت بە بڵاوبونەوەی نەخۆشی سورێژە لەنێو منداڵانی وڵاتەكەیدا فەرمانێكی بەپەلەیدا و رایگەیاند، پێویستە منداڵان و گەنجان لە سورێژە بپارێزرێن.

بۆریس جۆنسن، سەرۆك وەزیرانی بریتانیا لە نوێترین بریاریدا داوایكرد هەوڵی جددی لە سەرتاسەری بریتانیا بدرێت بۆ بەرەنگاربونەونەوەی نەخۆشی سورێژە لە منداڵان و گەنجاندا.

لە بریتانیا ژمارەی توشبوان بە ڤایرۆسی سورێژە گەیشتوەتە 231 كەس

بەپێی زانیاریەكان، لە چارەكی یەكەمی ساڵی 2019 دا ژمارەی توشبوان بە ڤایرۆسی سورێژە گەیشتوەتە 231 كەس، زانیارییە پزیشكیەكانیش دەڵێن، بەرەنگاربونەوەی ئەو نەخۆشیە لە رێگەی دوجار وەرگرتنی ڤاكسینەوەیە.

ژمارەیەكی زۆر منداڵ هەیە تەنها یەكجار  ئەو ڤاكسینەی وەرگرتوە

بەوهۆیەوە، سەرۆك وەزیرانی بریتانیا رایگەیاند "پێویستە پزیشكان بەداوداچون بكەن بۆ ئەو منداڵانەی دوجار ڤاكسینی ڤایرۆسی سورێژەیان لێنەدراوە، لەكاتێكدا ژمارەیەكی زۆر منداڵ هەیە تەنها یەكجار  ئەو ڤاكسینەی وەرگرتوە و دۆزی دوەمیان پشتگوێخراوە.

دەبێت سەرجەم تۆڕە كۆمەڵایەتیەكان لە هەڵمەتەكەدا بەشداربن

هاوكات بەپێی فەرمانەكەی سەرۆك وەزیرانی بریتانیا، سەرجەم تۆڕە كۆمەڵایەتیەكان دەبێت رێكارە دروستەكانی وەرگرتنی ڤاكسین دژی سورێژە بڵاوبكەنەوە و هانبدرێن بۆ رونكردنەوەی ئەو كارانەی پرۆسەكە بە رێگەی هەڵەدا دەبات.

لەو چوارچێوەیەدا سەرجەم كۆمپانیا و ناوەندە پەیوەندیدارەكانیش بانگهێشتكراون، تا زیاتر تێبگەن لە چۆنیەتی بڵاوكردنەوە و هاندانی وەرگرتنی دەرزی ڤاكسین بە شێوەیەكی تەندروست و راست.

رێژەی ئەو منداڵانەی تەندروستن كەمترە لە ئامانجەكەیان

لە بریتانیا، تەنها لەسەدا 87ی منداڵان دوەمین دۆزی ڤاكسینەكانیان وەردەگرن، لەكاتێكدا بەپێی بەرپرسان و لایەنە پەیوەندیدارەكانی ئەو وڵاتە رێژەكە كەمترە لە ئامانجەكەیان كە پلانیان هەبوە سەرو لەسەدا 95ی منداڵان دوەمینجار ڤاكسین بۆ بەرەنگاربونەوەی سورێژە وەربگرن.

سەرجەم منداڵان لە تەمەنی یەك ساڵیدا ڤاكسینی بەرەنگاربونەوەی سورێژە وەردەگرن، بەپێی رێنماییە تەندروستیەكانیش پێویستە سەرجەم منداڵان پێش چونە قوتابخانە بۆ دوەمینجار ئەو ڤاكسینە وەربگرنەوە، بەڵام لێكۆڵینەوەكان دەڵێن، لە بریتانیا لە هەر حەوت منداڵێك یەك منداڵ بە تەواوی ڤاكسینی وەرنەگرتوە.

لە ساڵی 2019 تا ئێستا یەك حاڵەتی سورێژە لە سلێمانی تۆماركراوە

سەبارەت بە حاڵەتەكانی سورێژە لە شاری سلێمانی و هەرێمی كوردستان بە گشتی، یاد نەقشبەندی، وتەبێژی بەڕێوەبەرایەتی تەندروستی سلێمانی لە لێدوانێكیدا بۆ خەندان رایگەیاند "لەماوەی هەشت مانگی رابردودا و بە پێی ئامارەكانی ساڵی 2019، تا ئێستا لە شاری سلێمانی تەنها یەك حاڵەتی سورێژەمان هەبوە و لە هەرێمی كوردستانیش بە گشتی حاڵەتی بڵاوبونەوەی سورێژە نەبوە".

ئامارەكانی سورێژە لە سلێمانی هەرێم بە گشتی دڵخۆشكەرن

ئاماژەی بەوەشكرد، "ئامارەكانی تایبەت بە سورێژە لە شاری سلێمانی و هەرێم بە گشتی خۆشبەختانە ئامارێكی باشە و نیشانەی ئەوەیە پرۆسەی وەرگرتنی ڤاكسین دژ بەو نەخۆشیە بە شێوەیەكی سەركەوتو بەڕێوەچوە و سەرجەم لایەنە پەیوەندیدارەكان بەشداربون لەو پرۆسەیەدا، چونكە تاكە خۆپاراستن بۆ ئەو نەخۆشیە وەرگرتنی ڤاكسین".

ساڵی رابردوش تەنها 10 بۆ 11 حاڵەت هەبوە و سەرجەمیان چارەسەركراون

راشیگەیاند، لە ئێستادا حاڵەتی توشبون بە نەخۆشی سورێژە لە ناوچەكانی خواروی عێراق بونی هەیە و بڵاوبونەوەشی هەر هەیە، بەڵام لە شاری سلێمانی ساڵی رابردوش تەنها 10 بۆ 11 حاڵەتی توشبون بەو ڤایرۆسە هەبوە و دواتر چارەسەری پێویسیان بۆ ئەنجامدراوە.

لە كوردستان بەپێی ستانداردی جیهانی كارەكان ئەنجامدەدرێن

لەبارەی پرۆسەی دەرزیلێدان و پێدانی ڤاكسینی سورێژە بە منداڵان، وتەبێژی تەندروستی سلێمانی وتی "لە كوردستان بەپێی ستانداردی جیهانی و بە هەمان شێواز منداڵان ڤاكسینی سورێژە دو جار وەردەگرن و ڤاكسینی سەرجەم نەخۆشیە هاوشێوەكانیشیان پێدەدرێت، هەربۆیە لای ئێمە حاڵەتەكە بە تەواوی كۆنترۆڵ كراوە چونكە دەرزیلێدان و پێدانی ڤاكسین بە شێوەیەكی تەواو بەڕێوەدەچێت".

هەر لەوبارەیەوە دكتۆر یاد نەقشبەندی ئاماژەی بەوەكرد "پێویستە ئەو دەفتەرە تەندروستیەی دایك لەكاتی منداڵ بوندا بۆ خۆی و كۆرپەكەی وەریدەگرێت بە شێوەیەكی رێكوپێك پەیڕەوی لێبكرێت و لە كات و ساتی تەواوی خۆیاندا ڤاكسین و دەرمانەكانیان وەربگرن، چونكە سورێژە بە نمونە رێگریكردنی تەنها لە خۆپاراستندایە".

لە وەڵامی پرسیارێكدا سەبارەت بە چۆنیەتی رێگریكردن لە گوازرانەوەی ڤایرۆسی سورێژە لە خواروی عێراقەوە بۆ ناو هەریمی كوردستان، وتەبێژی تەندروستی سلێمانی رایگەیاند "لە هەمو شوێن و نشینگەكانی پەیوەستن بە هاتنە ناوەوەی خەڵكانێك كە دانیشتوی هەرێمنین و لە فرۆكەخانەكان و سەرجەم دەروازەكان، تیمی تەدروستی هەیە و ئەگەر حاڵەتێكی گوماناوی ببینرێت دەستبەجێ پشكنینیان بۆ دەكرێت و ئەگەر نەخۆشیەكەیان هەبێت چارەسەری پێویستیان بۆ ئەنجامدەدرێت".

راگەیاندنەكان دەسەڵاتی چوارەمن و رۆڵێكی بەرچاویان هەیە

هاوكات رۆڵی دەزگا میدیاییەكانی بە گرنگ باسكرد، لە هەوڵدان بۆ بڵاوكردنەوەی رێنماییە تەندروستیەكان و بڵاوكردنەوەی هۆشیاری سەبارەت بەو نەخۆشیانەی گوازراوەن كە دەتوانن خەڵك ئاگاداربكەنەوە و راشیگەیاند "راگەیاندن دەسەڵاتی چوارەم-ە و تۆڕە كۆمەڵایەتیەكان زیاتر دەچنە ناو خەلكەوە و دەكرێت بۆ ەو مەبەستە سودیان لێوەربگریرێت".

نیشانەكانی توشبون بە سورێژەی خستەڕو

دواتر لەبارەی نیشانەكانی توشبون بەو ڤایرۆسە دواو و وتی"نیشانەكانی سورێژە سەرەتا وەك ئەنفلۆنزایەكی سادە دەكات، دواتر لەوانەیە ناوچاوی سورببێتەوە یاخود خاڵەی بچوكی ورد لەناو دەمی دروستب ببێت، دوای ئەوە توشی تایەكی بەرز دەبێت و بە دەرمان باش نەبێت، لەو كاتەدا پێویستە سەردانی پزیشك بكات یاخود نزیكترین بنكەی تەندروستی كە لە هەموو پێگەیەكی شار و شارۆچكەكاندا هەیە".

باسی لە رێنماییەكان كرد بۆ خۆپارێزی لە ڤایرۆسی سورێژە

لە كۆتایی وتەكانیدا، وتەبێژی تەندروستی سلێمانی سەبارەت بە رێنماییەكان بۆ خۆپاراستن لە نەخۆشی سورێژە دوا و رایگەیاند "گرنگە هەركەسێك لە هەر شوێنێك حاڵەتەكانی توشبون بە نەخۆشیەكەی بینی، هەوڵبدات دەستبەجێ كەسی توشبو ئاگاداربكاتەوە تا سەردانی پزیشك بكات و هەوڵبدرێت بەركەوتن لەگەڵ كەسی توشبودا نەبێت".

لە هەمانكاتدا باسی لەوەكرد "پێویستە دایكان  باوكان پابەندبن بە دەفتەری تەندروستی منداڵەكانیان و بەشداریكردن و هاوكاربونیان لە هەلمەتەكانی كوتان، پێویستیشە لەكات و رێكەوتی تەواودا منداڵەكانیان لە هەلمەتی كوتاندا بەشداری پێبكەن و دوای نەخەن، چونكە دوای وادەی خۆی وەرگرتنی ڤاكسینەكە كاریگەری نامینێت".



Copyright © 2016 Xendan.org all rights reserved

designed and developed by AVESTA GROUP