10 رۆژ لە ژوری تاکەکەسیدا بوە
هاوڵاتییەک 57 رۆژە لە دهۆک دەستگیرکراوە و کەسوکاریشی داوای ئازادکردنی دەکەن

- 8/21/2019 1:58:00 PM 16568 جار خوێندراوەتەوە

خەندان- هەڤاڵ محەمەد

ماوەی 57 رۆژە هاوڵاتییەکی تەمەن 30 ساڵ لەلایەن هێزە ئەمنییەکانی دهۆکەوە بەپێی ماددەی 2ی خراپ بەکارهێنانی ئامێرەکانی پەیوەندیکردن دەستگیرکراوە و تا ئێستاش لە زینداندایە، بەپێی وتەی کەسوکاریشی ماوەی 10 رۆژ لە زیندانی تاکەکەسیدا بوە، پۆلیسیش دەڵێت، "هێشتا لێکۆڵینەوەکان لەگەڵیدا بەردەوامن".
هارون رەشید ئەمین سلێڤانەیی، لە دایکبونی ساڵی 1989یە و لە بنکەی پۆلیسی زاخۆ مفەوەزی پۆلیس بوە

 

هارون رەشید ئەمین سلێڤانەیی، لە دایکبوی ساڵی 1989یە و لە بنکەی پۆلیسی زاخۆ مفەوەزی پۆلیس بوە، ئەو ماوەی 57 رۆژە دەستگیرکراوە، ئەوەش دوای ئەوەی سکاڵای لەسەر تۆمارکراوە کە "گوایە لە رێگەی چەند پەیجێکەوە هێرشیکردوەتە سەر کارمەندانی ئاسایشی زاخۆ".
ئێوارەیەکی درەنگ کە هارون لە بنکەی پۆلیسی زاخۆ لە ئەرکدا بوە، هێزێکی ئاسایشی زاخۆ بەبێ بڕیاری دادوەر چونەتە سەر بنکەکە و ویستویانە دەستگیریبکەن

 

برایەکی هارون بۆ خەندان-ی گێڕایەوە، "ئێوارەیەکی درەنگ کە هارون لە بنکەی پۆلیسی زاخۆ لە ئەرکدا بوە، هێزێکی ئاسایشی زاخۆ بەبێ بڕیاری دادوەر چونەتە سەر بنکەکە و ویستویانە دەستگیریبکەن، هەوڵیانداوە مۆبایلەکەی بپشکنن لەکاتێکدا رەزامەندی بەڕێوەبەری پۆلیسی زاخۆ و دادوەریان پێنەبوە، ئەوەش وایکردوە گرژیی و دەنگە دەنگ لە نێوانیاندا روبدات".

وتیشی، "ئەو ئێوارەیە هارون خۆی رادەستی هێزەکانی ئاسایشی زاخۆ نەکردوە و چوەتە دەرەوەی بنکەکە و خۆی لە هێزەکانی ئاسایش شاردوەتەوە و هەڵهاتوە، ماوەی رۆژێکیش خۆی رادەستنەکردوە".
هارون ماوەی 57 رۆژە دەستگیکراوە، چونکە گەنجێکی چالاکە و بەڕونی بۆچونی خۆی لە فەیسبوکی خۆیەوە دەڵێت

 

ئەو برایەی هارون دەڵێت، "هارون ماوەی 57 رۆژە دەستگیکراوە، چونکە گەنجێکی چالاکە و بەڕونی بۆچونی خۆی لە فەیسبوکی خۆیەوە دەڵێت، لەکاتێکدا لە زاخۆ هیچ کەسێک بە ئاشکرا ناتوانێت بڵێت من حزبێکی دیکەم جگە لە پارتی، بەڵام ئەو پەیجانەی کە بابەتەکانی لێوە بڵاوکراوەتەوە هیچ پەیوەندی بە هارونەوە نیە و ئەوانە هەمو تۆمەتن".
چەند پەیجێکی فەیسبوک کە تائێستا لەکاردان و هێرشدەکەنە سەر پارتی و ئاسایش زاخۆ، گوایە سوکایەتی بە کارمەندانی ئاسایش زاخۆ کردوە، کە ئەوە هارون دەستی تێیدایەتی

 

ئەو باس لەو تۆمەتانە دەکات کە ئاڕاستەی براکەی کراون و دەڵێت، "چەند پەیجێکی فەیسبوک کە تائێستا لەکاردان و هێرشدەکەنە سەر پارتی و ئاسایش زاخۆ، گوایە سوکایەتی بە کارمەندانی ئاسایش زاخۆ کردوە، کە ئەوە هارون دەستی تێیدایەتی، بەڵام لە راستیدا ئەوانە هەموی تۆمەتن و تەسفیەی حسابە لەگەڵ هارون، چونکە دەزانن خۆی و بنەماڵەکەی یەکێتین".
سەرەتا ماوەی 10 رۆژ هارون لە زاخۆ بو لە زیندانی تاکەکەسیدا بو، تەنانەت رێگەیان بە ئێمە نەدەدا بچین سەردانی بکەین

 

ئاماژەی بەوەشکرد، "سەرەتا ماوەی 10 رۆژ هارون لە زاخۆ بو لە زیندانی تاکەکەسیدا بو، تەنانەت رێگەیان بە ئێمە نەدەدا بچین سەردانی بکەین، ئاسایشی زاخۆ دەسەڵاتی تەواوی بەسەر دادگادا هەبو، بەڵام دواتر دادوەر بڕیاریدا کەیسەکەی رەوانەی دهۆک بکات، لە ئێستادا جار جار سەردانی دەکەین و دەتوانین بیبینین".

هارون رەشید ئەمین،  دەرچوی خولی رێپێدراوە لە كولێجی پۆلیسی سلێمانی، دوای ئەوەی خولەکەی تەواوکردوە گەڕاوەتە بۆ شارەکەی خۆی و لە بنکەی پۆلیسی زاخۆ مفەوەزی لێکۆڵەر بوە.
ئێستا لە زیندانی زرکایە لە دهۆک، ئازاری جەستەیی نەدراوە، بەڵام لەروی دەرونییەوە ماندوکراوە

 

لەبارەی دۆخی تەندروستی هارونەوە کە ئێستا لە زینداندایە، ئەو برایەی هارون دەڵێت، "دوایینجار چەند رۆژێک دوای جەژن بو سەردانیمانکرد لە زیندانی زرکا لە دهۆک، ئازاری جەستەیی نەدرابو، بەڵام لەروی دەرونییەوە ماندوکرابو، سوکایەتیشی پێکرابو".

وتیشی، "هارون بۆی گێڕاینەوە کە چەندینجار لێکۆڵێنەوە لەگەڵدا کراوە و پرسیاری تایبەتیان لەبارەی برا و کەسوکاریەوە لێکردوە و هەندێجاریش سوکایەتی پێکراوە و ماندوکراوە".
11 کەس سکاڵایان لەسەر هارون تۆمارکردوە لەسەر یەک دۆسیە، بەپێی یاساش بێت دەبێت هارون بە کەفالەت ئازادبکرێت

 

خەتاب عومەر، سەرۆکی تیمی پارێزەرانی خۆبەخش لە پارێزگای دهۆک کە پارێزەری هارونە بە خەندان-ی راگەیاند، "11 کەس سکاڵایان لەسەر هارون تۆمارکردوە لەسەر یەک دۆسیە، بەپێی یاساش بێت دەبێت هارون بە کەفالەت ئازادبکرێت، بەڵام لەو ماوەیەدا کە گیراوە دەیانجار داواکەمان بۆ ئەوەی بە کەفالەت ئازادبکرێت رەتکراوەتەوە".
هارون تۆمەتبارکراوە بەوەی کە لە رێگەی پەیجی فەیسبوکەوە هێرشیکردوەتە سەر ئاسایشی زاخۆ

 

دەشڵێت، "هارون تۆمەتبارکراوە بەوەی کە لە رێگەی پەیجی فەیسبوکەوە هێرشیکردوەتە سەر ئاسایشی زاخۆ، ئەوان دەڵێن گومانمان هەیە کە هارون دەستی تێدا هەبێت، بەڵام هیچ بەڵگەیەک لەوبارەیەوە نیە کە بیسەلمێنێت هارون تاوانبارە".

خەتاب عومەر رونیکردەوە، بەپێی یاسا دادوەر دەتوانێت هەتا شەش مانگ کەسێک لە زینداندا رابگرێت و بهێڵێتەوە، بەڵام بۆ دۆسیەیەکی لەوجۆرە نا، کە ماددەی 2ی خراپ بەکارهێنانی مۆبایلە و کەسەکە کارمەندی پۆلیسە، دەتوانرا بە کەفالەت ئازادبکرێت.
هارون وتویەتی لە زینداندا زۆر سوکایەتی پێکراوە و هەندێک جاریش لە روی دەرونییەوە ئازاردراوە، کە ئەوەش نایاساییە

 

ئەو پارێزەرە وتیشی، "هارون وتویەتی لە زینداندا زۆر سوکایەتی پێکراوە و هەندێک جاریش لە روی دەرونییەوە ئازاردراوە، کە ئەوەش نایاساییە لە زینداندا کاری لەوجۆرە بەرامبەر بە زیندانەکان بکرێت".
 
هێمن سلێمان، وتەبێژی پۆلیسی دهۆک لەبارەی دەستگیرکردنی هارون بە خەندان-ی راگەیاند، "هەندێک کەس سکاڵایان تۆمارکردوە و دەڵێن هارون تەشهیری پێکردون".
ئێمە هێشتا حوکممان نەداوە و بڕیار بڕیاری دادگایە، هێشتا هارون راگیراوە و لێکۆڵینەوەکانیش بەردەوامن

 

لەبارەی ئەوەی ئایا بەڵگە هەیە بۆ تێوەگلانی هارون وتەبێژی پۆلیسی دهۆگ دەڵێت، "ئێمە هێشتا حوکممان نەداوە و بڕیار بڕیاری دادگایە، هێشتا هارون راگیراوە و دادوەریش بە کەیفی خۆیەتی و هێشتا لێکۆڵینەوەکان بەردەوامن، بەڵگەکان کۆدەکرێنەوە تا رۆژی دادگا".
ئێمە بە بڕیاری دادوەر دەجوڵێینەوە و بە قسەی ئەو دەکەین، لەسەر هەرشتێک بێت ئێمە نازانین

 

لەبارەی لێدوانی کەسوکاری هارون کە دەڵێن دۆسیەکەی "تەسیفیەی حسابە" هێمن سلێمانی وتی، "ئێمە بە بڕیاری دادوەر دەجوڵێینەوە و بە قسەی ئەو دەکەین، لەسەر هەرشتێک بێت ئێمە نازانین، ئێستا بەپێی ماددەی 2 لە یاسای ژمارە 6ی ساڵی 2008 دەستگیرکراوە و هەر لەسەر ئەو بابەتەیە و لەسەر هیچ شتێکی تر نیە".

نیشانەکردن :

#دهۆك

Copyright © 2016 Xendan.org all rights reserved

designed and developed by AVESTA GROUP