سۆیڵو: دەزانین كێ پشتیوانی لە پەكەكە دەكات

- 8/21/2019 9:51:00 AM 9130 جار خوێندراوەتەوە

خەندان-

وەزیری ناوخۆی توركیا، بەرپرسانی ویلایەتە یەكگرتوەكانی تۆمەتباركرد بە ئەنجامدانی چاوپێكەوتن لەگەڵ پارتی (ماركسی لینین) كە ئەنقەرە لە ریزی رێكخراوە تێرۆریستیەكان هەژماری كردون و راشیگەیاند، ئەنقەرە دەزانێت كێ پشتیوانی لە پەكەكە دەكات.

لەناو خاكی سوریا كۆبونەوەكە ئەنجامدراوە

لەمیانی چاوپێكەوتنێكیدا لەگەڵ تەلەفزیۆنی هابێرتورك، سولەیمان سۆیڵو، وەزیری ناوخۆی توركیا دوێنێ سێشەممە رایگەیاند "پێش 14 رۆژ لەمەوبەر و لەناو خاكی سوریادا، بەرپرسانی ویلایەتە یەكگرتوەكان چاویان كەوتوە بە ئەندامانی رێكخراوی (پارتی ماركسی لینینی)".

ئەنقەرە ناوەڕۆكی كۆبونەوەكە دەزانێت

ئاماژەی بەوەشكرد "ئەنقەرە ناوی سەرجەم ئەو بەرپرسانەی لایە كە لەو چاوپێكەوتنەدا بون و دەشزانێت ناوەڕۆكی كۆبونەوەكە چۆن بوە و لەسرە چ بابەتێك بوە"، بەڵام سەبارەت بەو وتانەی هیچ زانیارییەكی نەخستەرو.

ئاگادارین كێ لە پشتی پەكەكە وەستاوە

ئەو بەرپرسەی توركیا لە درێژەی وتەكانیدا وتیشی "وڵاتەكەی ئاگادارە و دەزانێت كێ لە پشتی پارتی كرێكارانی كوردستان (پەكەكە) وەستاوە، هۆكاری مانەوەی واشنتن-یش لە باكور و رۆژهەڵاتی سوریا رون و ئاشكرایە بۆ ئەنقەرە".

سەرجەم وڵاتانی جیهان هەوڵدەدەن و هەنگاودەنێن بۆ جێگیركردنی شوێنپێی خۆیان باكوری سوریا

راشیگەیاند "ئێمە دەزانین بۆچی سەرجەم وڵاتانی جیهان هەوڵدەدەن و هەنگاودەنێن بۆ جێگیركردنی شوێنپێی خۆیان باكوری سوریا"، بەڵام لەوبارەیەشەوە درێژەی بە زانیارە وردەكان نەدا.



Copyright © 2016 Xendan.org all rights reserved

designed and developed by AVESTA GROUP