توركیا سەدان كەس دەستگیردەكات
ئەندام و لایەنگرانی هەدەپە لەبەردەم شارەوانی ئامەد گردبونەوە

- 8/19/2019 1:00:00 PM 1406 جار خوێندراوەتەوە

خەندان-

لە ئامەد، پەرلەمانتارانی پارتی دیموكراتی گەلان (هەدەپە)و سەرۆك شارەوانیەكان بە مەبەستی رەتكردنەوەی لەكاردورخستنەوەی هاوسەرۆكی شاروانی ئامەد لەسەر پشكی هەدەپە گردبونەوە و حكومەتی ئەنقەرەش سەدان كەسی دەستگیركردوە.

گرژی كەوتە نێوان لایەنگرانی هەدەپە و پۆلیس

 

بە مەبەستی دەربڕینی ناڕەزایی سەبارەت بە لەكارلابردنی هاوسەرۆكی شارەوانی ئامەد و هاوسەرۆكی شارەوانیەكانی وان و ماردین و دانانی قەییومیەكان لە شوێنی ئەو سەرۆك شارەوانیانە، ژمارەیەكی زۆر ئەندام و لایەنگرانی هەدەپە لەبەردەم باڵەخانەی شارەوانی ئامەد گردبونەوە و گرژی كەوتە نێوان لایەنگرانی هەدەپە و پۆلیس.

لەبەردەم باڵەخانی شارەوانی ئامەد رونكردنەوە دەدەن

ئاماژە بەوەشكراوە، سەبارەت بە بڕیارێكی وەزارەتی ناوخۆی توركیا بۆ لەكاردورخستنەوەی سێ سەرۆك شارەوانیەكەی شارەكانی باكوری كوردستان و دانانی سێ قەییومی لەلایەن حكومەتی ئەنقەرەوە، پاش كەمێكی دیكە پەرلەمانتارانی هەدەپە و هاوسەرۆكی شارەوانیەكانی دیكەی سەر بەو پارتە، لەبەردەم باڵەخانی شارەوانی ئامەد رونكردنەوە دەدەن.

پۆلیس هەوڵی بڵاوەپێكردنی خۆپیشاندەران دەدات

لە گردبونەوەكەی لایەنگرانی هەدەپەدا، پۆلیس بە مەبەستی بڵاوەپێكردنی دەنگە ناڕازیەكان و بەرەنگاربونەوەیان، لە رێگەی بەكارهێنانی فشاری ئاو بە ئۆتۆمبێلی سەربازی هێرشیكردە سەر گردبونەوەكە، بەوهۆیەوە ئالۆزی كەوتە نێوان خۆپیشاندەران و پۆلیس لەو ناوچەیەدا.

توركیا سەدان كەسی دەستگیركردوە و ژمارەكە لە بەرزبونەوەدایە

لە هەمانكاتدا بە گوێرەی ئاژانسەكانی ناوخۆی توركیا، لە 29 ناوچەی جیاواز حكومەتی توركیا بە تۆمەتی پشتیوانیكردن لە پارتی كرێكارانی كوردستان (پەكەكە) و رێكخراوەكانی هاوشێوەی ئەو پارتە سەدان كەسی دەستگیركردوە و میدیاكانی نزیك لە حكومەتیش ئاماژە بە بەرزبونەوەی رێژەی دەستگیركراوان دەدەن.

ئەوەش پاش گەمارۆدانی هەرسێ شارەوانی ئامەد و وان و ماردین-ی باكوری كودستان دێت لەلایەن پۆلیسی توركیاوە، كە بەرەبەیانی ئەمڕۆ دوشەممە لە كارەكانیان دورخرانەوە و دەستبەجێ حكومەتی ئەنقەرە سی كەسی دیكەی خستە شوێنەكانیان.



Copyright © 2016 Xendan.org all rights reserved

designed and developed by AVESTA GROUP