"ئەوەی لە هەڵبژاردن بەدەستیان نەهێنا، بە فێل و تەڵەکە بەدەستیدەهێنن"
هەدەپە: دورخستنەوەی هاوسەرۆکی شارەوانییەکان کودەتاى سیاسییە و بێدەنگ نابین

- 8/19/2019 12:41:00 PM 1759 جار خوێندراوەتەوە

خەندان-

پارتی دیموکراتی گەلان (هەدەپە) رایگەیاند، هاوپەیمانیی ئاکەپە و مەهەپە دەستی بەسەر ئیرادەی گەلدا گرتوە و دورخستنەوەی هاوسەرۆکی شارەوانییەکانی ئامەد، وان و مێردین کودەتاى سیاسییە و بێدەنگ نابن.
هاوسەرۆکانی شارەوانییەکانمان کە لە ئامەد بە ڕێژەی 63%، لە مێردین بە ڕێژەی 56% و لە وان-یش بە ڕێژەی 53%ی دەنگەکان هەڵبژێردران

 

دەستەی بەڕێوەبەریی ناوەندیی پارتی دیموکراتی گەلان (هەدەپە) لەبارەی دەستبەسەرداگرتنی شارەوانیی گەورە شارەکانی ئامەد، وان و مێردین ڕاگەیاندراوێکی بڵاوکردەوە و رایگەیاند، "هاوسەرۆکانی شارەوانییەکانمان کە لە ئامەد بە ڕێژەی 63%، لە مێردین بە ڕێژەی 56% و لە وان-یش بە ڕێژەی 53%ی دەنگەکان هەڵبژێردران، بەڵام بە فەرمانی درۆ و پاساوە نایاسایى و بێ مافییەکانی وەزارەتی ناوخۆ لە ئەرکەکانیان دوورخرانەوە".

ئاماژەی بەوەشکردوە، "لە دژی ئەندامەکانمان لە ئەنجومەنی شارەوانییەکان و کارمەندانی شارەوانییەکان ئۆپەراسیۆنێکی قورس و چڕی دەستگیرکردن بەڕێوەدەچێت".
ئەمە کودەتایەکی نوێی سیاسییە، هاوکات هەڵوێستێکی دوژمنانەیە لە دژی ئیرادەی سیاسیی گەلی کورد

 

هەدەپە دەشڵێت، "ئەمە کودەتایەکی نوێی سیاسییە، هاوکات هەڵوێستێکی دوژمنانەیە لە دژی ئیرادەی سیاسیی گەلی کورد، وەزارەتی ناوخۆ ناوەندی کودەتاکەیە، پەلەپیتکەکێشی کردەوە و بڕیارەکانی دژ  بە دیموکراسییە و ناوەندی چەواشەکاریی و زەوتکردنی ئازادی و مافەکانە".

ئەوەش خراوەتەڕو، لە سەردەمی قەیومەکاندا لەو سێ شارەوانییەی ئەو گەورە شارانەدا هەمو سەرچاوەکانی شارەوانییەکان هڵچۆڕان و هەڵلوشران و وێرانەیەکیان لە دواى خۆیان بەجێهێشت، وەکو لە ڕاپۆرتی دیوانی ژمێرکاریدا هاتوە، وەزارەتی ناوخۆ و دەسەڵات لە ڕێگەی قەیومەکانەوە بونەتە ناوەندی گەندەڵکاری و بەرتیلخۆری.
ئەو دەسەڵاتە و وەزارەتی ناوخۆ بەرگەی ئەوەیان نەگرت، کە گەندەڵیەکانی سەردەمی قەیومەکان و گەندەڵکاریی قەیومەکانیان لە دژی سەرچاوەکانی گەل ئاشکرا ببن

 

هەدەپە رونیکردوەتەوە، "ئەو دەسەڵاتە و وەزارەتی ناوخۆ بەرگەی ئەوەیان نەگرت، کە گەندەڵیەکانی سەردەمی قەیومەکان و گەندەڵکاریی قەیومەکانیان لە دژی سەرچاوەکانی گەل ئاشکرا ببن".
ئێستا لە رێگەى زەوتکردنی ئیرادەی گەلەوە ئەوەی لە سەندوقەکان بەدەستیان نەهێنا، دەیانەوێت بە فێل و تەڵەکە بەدەستیبهێنن

 

راشیگەیاندوە، "هێندەی نوکە دەرزییەک ئەو دەسەڵاتە ڕەوایەتیی دیموکراتیکی نەماوە، ئێستا لە رێگەى زەوتکردنی ئیرادەی گەلەوە ئەوەی لە سەندوقەکان بەدەستیان نەهێنا، دەیانەوێت بە فێل و تەڵەکە و توندوتیژییەکانی دەوڵەت بەدەستیبهێنن و ئەوەش بوەتە شتێکی ئاسایی هاوپەیمانیی ئاکەپە– مەهەپە".
ئەو دەسەڵاتە ئیرادەی گەل زەوت دەکات و ئیرادەی سەندوقی هەڵبژاردن قبوڵ ناکات

 

لە راگەیەندراوەکەی هەدەپەدا باس لەوەشکراوە، "لە بەرانبەر ئەو دەسەڵاتەدا، کە ئیرادەی گەل زەوت دەکات، ئیرادەی سەندوقی هەڵبژاردن قبوڵ ناکات، بانگەوازیی پشتگیری بۆ هەمو هێزە دیموکراسییەکان، هاوڵاتییە خاوەن ویژدانەکانمان، حزبە ئۆپۆزسیۆنەکانی پەرلەمان و دەرەوەی پەرلەمان، دامەزراوەکانی کۆمەڵگەی مەدەنی، یەکێتیبەکان و سەندیکا و پیشەیەکان و کۆمەڵە دیموکراتییەکان دەکەین".


Copyright © 2016 Xendan.org all rights reserved

designed and developed by AVESTA GROUP